DOLLAR INDEX

بسم الله الرحمن الرحيم

• مؤشر الدولار على الرسم البيانى اليومى ، ونمط انعكاسى سلبى وهو الرأس والكتفين ، لم يكتمل بعد وارتد المؤشر صعودا مره اخرى ليصل الى مستويات 100 نقطه
• النمط الموجود يعانى من علامات ضعف واضحه قد تؤثر على ادائه الفنى اولها خط العنق المنحدر الى اسفل وثانى هذه العلامات هى السيمتريه بين الاكتاف فنلاحظ تباعد الكتف الايمن بمسافه كبيره عن الرأس عكس الكتف الايسر
• من وجهه نظرى الشخصيه ان رسم خط العنق بهذا الشكل ليس صعبا على الاسعار ان تقوم بكسره وبالتالى استبدال الاغلاق تحت مستوى 99.19 نقطه بدلا من الاغلاق تحت خط العنق ارى فيه استسهال من جانب بعض المحللين وان كانت هذه النقطه هى نقطه خلافيه بين المحللين ، فانا ارجح ان النمط لم يكتمل بعد وان الاغلاق تحت خط العنق فى هذه الحاله هو الاصح فنيا
• لاحظ ان كلستر الدعوم من تلاقى خط الترند الصاعد مع خط عنق النموذج اوقف هبوط الاسعار وفى هذا السياق كنقطه تعليميه نقول ان الترند رقم 1 هو الاصح فنيا حتى وان حدثت له بعض الاختراقات الكاذبه ولكن لم يتم كسره كسرا حقيقيا حتى يتم تعديله بل العكس اكتسب هذا الترند قوه وصلابه من عدد الملامسات  ذات التوازن الزمنى بين كل قاعين وهذه ميزه نسبيه اخرى له وبالتالى خط الترند رقم 1 هو دعم قوى جدا لمؤشر الدولار واعتقد بنسبه كبيره سيكون سببا فى فشل نمط الرأس والكتفين

قطاع الاغذيه والمشروبات

بسم الله الرحمن الرحيم

• قطاع الاغذيه والمشروبات وهو افضل قطاع اداءا فى الربع الاول وتخطى قطاعات هامه فى الاقتصاد المصرى مثل قطاع البنوك والاتصالات والعقارات بنسبه نمو بلغت 39% فى الربع الاول 
• على الشارت الديلى نموذج هارمونيك فراشه بيعى اكتمل النموذج عند مستوى 1297 ووصل القطاع حاليا الى مستوى 1304 وهو تجاوز مقبول حتى الان وبدء القطاع الدخول الى مناطق التشبع الشرائى لذلك يجب متابعه اسهم هذا القطاع خصوصا وان نماذج الفراشه عندما تأتى فى نهايه الترند الصاعد يجب الانتباه
• شخصيا ارى بعض العلامات التى تشير الى ان الترند ما زال بزخمه وبالتالى ما زال امامه صعود بالرغم من دخوله فى مناطق التشبع و هو ما يعنى ان النموذج وارد جدا ان يفشل فى هذه الحاله  وربما وجود شمعه الابتلاع الشرائى (BULLISH ENGULFING) احد هذه العلامات على الرغم من ظهورها فى نهايه الترند الصاعد وقد تعمل فى هذه الحاله على استمرار صعود الترند كما ان فوليوم التنفيذ فى تطور واضح او على الاقل يحافظ على ثباته بمتوسط تنفيذ يبلغ 6 مليون سهم  وثانيا : الى حد ما الشمعه الاخيره تمتاز بطول كبير نسبيا فى منطقه الانعكاس وهو كما ذكرنا فى شرحنا الاخير للهارمونيك قد يكون من احدى علامات فشل الانعكاس  ويبقى التفسير المضاد لهذه الجزئيه الاستعانه بتحليل الفوليوم الذى يخبرنا ان ظهور الشموع الطويله على غير العاده وبفوليوم عالى فى نهايه ترند صاعد عاده ما يكون ورائه بيع مستتر ، لذلك فان جلسه اليوم قد تكون بدايه تأكيد ترجحينا الاول او نفيه

10 نقاط لتعليم الهارمونيك بطريقه صحيحه

بسم الله الرحمن الرحيم

بالنسبه للناس اللى بتتكلم فى الهارمونيك شوفت ناس كتير بتتكلم كلام غريب فىها احنا حاليا فى 2017 وما زالت الناس دى بتتكلم عن نقاط اكتمال النماذج على انها اهداف النماذج🤣 طبعا دى تعتبر كارثه وانا والله العظيم شرحت الكلام ده قبل كده وقلت ان نقاط الاكتمال شىء والاهداف شىء تانى خالص وبعدين اقصى امانى الناس دى لما بتتكلم عن الهارمونيك انها تقول الهدف الهارمونيكى كذا وتسكت طب يا عم لو خدناك على عيبك كده قول للناس تعمل ايه بعد كده يعنى يدخلوا او يخرجوا او ازاى يتاجروا لاء ابدا ما تلاقيش لانه هو اصلا مش فاهم تاللى بيتكلم فيه، والكارثه الاكبر بالتأكيد فى من الناس دى حد بيتابعهم وتخيل لما انت تكون بتتكلم غلط واللى بيتعلم منك بيتعلم غلط تفتكروا النتيجه هتكون ايه ! وفى الاخر هتجيب الشتيمه لنفسك لما واحد يقول للناس اللى اتعلموا منك الله يخربيت اللى علمكوا😄

لازم تعرف ان نماذج الهارمونيك زيها زى النماذج الكلاسيك لها 3 مراحل ، الاولى : وهى مرحله التكوين ،الثانيه : مرحله الاكتمال والتالته : مرحله الاهداف

يا ريت سعادتك تفهم اللى هقوله مش تحفظه لان ده خلاصه كلام كتير فى كتب الهارمونيك هتقعد تدور عليها.......

اولا : نماذج الهارمونيك فى الاساس نماذج انعاكسيه زيها زى النماذج الانعكاسيه الكلاسيكيه وظيفتها الاساسيه القيام على عكس الترند واهمها فى الموضوع ده هى نماذج الفراشه والجارتلى

ثانيا : فلسفه الهارمونيك قائمه على خلق مناطق دعم او مقاومه تسمى منطقه الانعكاس المحتمل(PRZ) ينعكس منها السهم هبوطا او صعودا وبتعتمد فى الموضوع ده على نسب الفيبوناتشى لخلق ما يعرف بكلستر الفيبوناتشى او بيسمى فى بعض الاحيان كلستر الهارمونيك اعتمادا على 3عناصر اولها ما يعرف بنموذج AB=CD او AB=CD البديل وثانيا النسب الخاصه باكتمال الشكل بدءا من نسبه 78.6.8% XA للجارتلى وحتى نسبه .161.8%XA للفراشه والكابوريا ، ثالثا ، امتداد الضلع BC بدايه من نسبه 113% وحتى 361.8% ، ال3 عناصر دول هما اللى بيخلقوا مناطق الدعم او المقاومه فى نماذج الهارمونيك وبالتالى بنرجح معاها الانعكاس واى نموذج فى الهارمونيك على الاقل لازم بيكون اختبر نسبتين من دول وكلما اختبر النموذج اكثر من نسبه كلما زادات احتماليه الانعكاس وفى مرحله متقدمه شويه عند النسب دى لازم تبص على اشكال الشموع الانعكاسيه ومؤشرات العزم

ثالثا :اهم نقطه فى نماذج الهارمونيك الخماسيه المعتاده (XABCD) هى النقطه B اللى على اساس تصحبيها من الضلع XA بنرجح اسم النموذج

رابعا : اهداف نماذج الهارمونيك دائما وابدا فى عكس اتجاه نقطه اكتمال النموذج نفسه مش زى نماذج الكلاسيك اهدافها بتكون فى نفس اتجاه نقطه اكتمالها بمعنى ان نماذج الهارمونيك اللى على شكل حرف M (نقطه اكتمال النموذج الى اسفل ) بيكون اهدافها الى اعلى عشان كده بيتقال عليها نماذج شرائيه اما النماذج اللى بيكون شكلها على حرف W( نقطه اكتمال النموذج الى اعلى) بتكون اهدافها الى اسفل عشان كده بنقول عليها نماذج بيعيه

خامسا : اهم اهداف الهارمونيك هى نسبه 38.2% من اقصى نقطه فى النموذج A الى اقل نقطعه فى النموذج وهى D يعنى تقدر تقول من اعلى نقطه فى النموذج الى ادنى نقطه فيه وعاده بنقول عليها 38.2% AD اوتانى اهم نسبه هى 61.8% AD ، غالبا نقطه حمايه الارباح بتكون عند نسبه 38.2% او قبلها بحاجه بسيطه وغالبا بيتم الخروج عند نسبه 61.8% او على الاقل مراقبه اداء السهم عند النقطه دى لانه فى حاله تجاوها بتكمل عادى اهداف الهارمونيك على تصحيحات الفيبوناتشى يعنى بتكون النسبه اللى بعدها 78.6% ثم 88.6 % ثم 100% ثم 113% ثم 127% ثم 141.4% ثم 161% وهكذا ....

سادسا: فى مرحله متقدمه تقدر تعرف ان باختراق النقطه B او كسرها بتبدء حاجه اسمها BAMM TRRIGER ودى استراتجسيه تداول عامله زى القاع المزدوج او القمه المزدوجه بالظط يعنى اما انك تدخل بعد اختراق النقطه B لاعلى وحتى اكتمال النموذج لو كان النموذج على شكل W يعنى بيعى او تخرج بكسرها اذا كان النموذج على شكل M يعنى شرائى وتنتظر اكتمال النموذج وتدخل شراء عند الانعكاس لاعلى ، والمرحله المتقدمه اوى حاجه اسمها BAMM على مؤشر RSI

سابعا: نماذج الهارمونيك فى الاساس كانت معموله عشان المتاجره عليها بعد اكتمالها لكن حصل تطوير لها على يد كارنى وهو واحد من اهم الناس اللى كتبت فى الهارمونيك وطبعا الاستاذه الكبار زى جارتلى وبيسافنتو فاصبحت المتاجره معاها اثناء تكوينها وبالتالى هى افضل وسيلىه متاجره موجوده وبتناسب جميع المتداولين سواء المغامر او المتحفظ

ثامنا: نماذج الهارمونيك بتفشل زيها زى نماذج الكلاسيك بمعنى ان القاع المزدوج مثلا بيفشل فى حاله ان السعر يرتد هبوطا ويكسر القاع لكن نماذج الهارمونيك فشلها ان السعر يواصل التقدم دون انعاكس بمعنى لو كان عندنا نموذج زى الكابوريا بيكتمل عند نقطه 161.8% لو السعر كمل بعد النقطه دى يبقى كده النموذج فشل او تلاقيه انعكس حاجه بسيطه جدا او مشى بالعرض وبعدها قام مكمل فى نفس اتجاه نقطه الاكتمال وتجاوزها ، لكن خلى بالك من نقطه فنيه انه ممكن يكمل بعد النسبه المفروض يكتمل عندها النموذج ويرتد سريعا يعنى التجاوز يكون مقبول وهنا بنقول على الانعكاس انه انعكاس غير نموذجى

تاسعا: فى منطقه الانعكاس المحتمل فيه علامات ممكن تكون استرشاديه على فشل النموذج فى الانعكاس زى وجود الجاب او ظهور شمعه طويله على غير المعتاد او ان السعر يمشى بالعرض

عاشرا لما تتكلم عن نماذج الهارمونيك هى وبتتكون ممكن يقابلك ان النقطه B مشتركه بين اكتر من نموذج يعنى لو مثلا النقطه B صححت بنسبه 61.8% من الضلع XA هتلاقى النسبه دى مشتركه بين نموذج الجارتلى والفراشه والكابوريا وما تندهش لما تعرف ان نموذج الفراشه بيصحح بنسبه 61.8% لان مكتشف النموذج نفسه بيسافنتو قايل الكلام ده ، هنا هتقابلك مشكله ازاى ترجح بين النماذج دى وبالتالى لازم نستخدم كل اداوتنا سواء نموذج AB=CD او امتداد الضلع BC وممكن تضيف اليهم حاجه تعتبر اجتهاد منى وهى ان نماذج الهرامونيك فى كتير من الاحيان بتحتوى بداخلها على نماذج قاع مزدوج او قمه مزدوجه وبالتالى مستهدف النماذج دى ممكن يديك ميزه اضافيه تقدر ترجح بيها نموذج واحد عن الباقى مع ملاحظه رد فعل السعر عند كل نسبه اكتمال نموذج

لو سعادتك فهمت النقاط دى مع قرأتك لاى كتاب فى الهارمونيك اضمنلك انك هتكون واحد من القلائل اللى بيتكلموا صح فى الهارمونيك ، انت كده هيكون عندك الاساس القوى اللى يخليك تفهم الهارمونيك مش تحفظه وما تكونش زى بقيه الناس اللى مش عارفه تفرق بين اكتمال النموذج والاهداف

المثال الحالى لنموذج فراشه النقطه B صححت بنسبه 78.6% من الضلع XA واكتمل النموذج عند نسبه 127% للضلع XA وباستخدام AB=CD البديل وامتداد الضلع BC بنسبه 161.8% تكونت منطقه مقاومه مقدارها 7115-7185 انعكس السعر عند 7124 مكونا شمعه الاب ثراست الانعكاسيه وشوفنا اازى الاتجاه انعكس وتحققت اهداف النموذج حتى وصل السعر الى قرابه نسبه 161.8% AD

EGX70

بسم الله الرحمن الرحيم

• المؤشر السبعينى وبعد توقعنا فى التحليل الذى قارنا بينه وبين المؤشر الثلاثينى ورجحنا ان السيوله ستتجه اليه وهو ما جعلنا ايضا نرجح وقتها ان المؤشر الثلاثينى ليس يمتلك العزم الكافى لاختراق مستوى 13000 وسيتأرجح حول هذا المستوى ، واليوم يقترب المؤشر السبعينى من احد نسب الذروه الهامه جدا وهو نسبه 161.8% عند مستوى 565 نقطه فى ظل دخول المؤشر مناطق الاوفر بوت واقتراب مؤشر RSI من مقاومه قويه له عند مستوى 76
• ترجيحى الشخصى ان المؤشر السبعينى من الممكن  ان يتراجع من المستوى الحالى او يلامس مستوى 565 ويرتد هابطا نظرا لاسباب المذكوره وضيف عليهم ان هناك نموذج هارمونيك الحقيقه هو مش مشهور فى استخدامه بمفرده وسكوت كارنى مش جايب امثله عنه لكنه خصص له جزء فى الكلام عنه، لكن دايما بيتم استخدامه بداخل نماذج ذات الامتداد الكبير زى الكابوريا والفراشه ، عموما المؤشر السبعينى تجاوز AB=CD عند مستوى 543 تقريبا وباستخدام نسبه 127% AB هنلاقى انها بتساوى 562 نقطه تقريبا وبالتالى ممكن يكون عندنا زون مقاومات فى المنطقه دى  وفى حاله تجاوز هذه المنطقه هيكون مستوى 586 هو النقطه الثانيه لاكتمال هذذا النموذج

OIL

بسم الله الرحمن الرحيم

• النفط على الشارت اليومى ، وللاسف يتضح من الشارت انه يعانى من ضعف ظاهر سواء  من الدايفرجنس السلبى الظاهر على مؤشر العزم RSI ، او زاويه الترند التى اصبحت فلات الى حد ما نتيجه لضعف الزخم الصعودى
• باستخدام اداه بسيطه من اداوت التحليل الفنى ولكنها فى غايه الاهميه وهى خط الترند ، فان النفط قام بكسر الترند الصاعد  طويل الاجل كسرا صحيحا ، وقد ارتد صعودا من مستويات 47 دولار للتجربه مره اخرى على الترند المكسور ولكن لم يلقى العزم الكافى لاختراق هذا الترند وارتد هابطا مره اخرى ولكن مستوى 47 دولار ما زل يدعم النفط حتى الان واعتقد ان كسر هذا المستوى حاليا ربما يكون عامل مرجح لان يحقق الترند مستهدفه عند مستويات 39-40 دولار
• ربما نجد ارتداد صعودى خلال الايام القليله القادمه نظرا لوجود POSTIVE FAILURE SWING على مؤشر RSI
• لاحظ ان مستهدف الترند هو نقطه اكتمال نموذج هارمونيك "الخفاش البديل الشرائى" ولكن زى ما قلنا ان كسر مستوى 47 دولار هو اللى ممكن يفتح الامكانيه للوصول الى هذه المستهدفات
• كنت اتكلمت قبل كده عن مستهدف الترند وزاويته وعدد الملامسات وطول فترته الزمنيه وبعد المسافه الزمنيه بين نقاط الملامسات والفوليوم للترند سواء اثناء تكون الترند او فوليوم الكسر والحقيقه ان شرح كل هذه النقاط مره واحده هيكون اوفر دوس على الناس فخلينا ناخد الكلام ده على مراحل قبل ما اتكلم عن كيفيه حساب مستهدف الترند (المسافه التى يقطعها السعر هبوطا بعد كسر الترند الصاعد) و نوضح شويه حاجات بسيطه وهى ان الترند المرسوم حاليا برغم طول فتره الزمنيه التى تجاوزت العام الا انه بيعانى من بعض نقاط الضعف اهمها ان الترند ده يفتقد لاقل عدد من الملامسات المطلوبه وهو 3 ملامسات ليتحول كما يقول عليه ميرفى الى ترند اساسى واحصائيا وجد ان الترند يحتاج من 3-4 ملامسات (3 قيعان فى حاله الترند الصاعد) فى المتوسط ليكون صحيحا وكقاعده عامه فى الترند كلما زادت عدد الملامسات للترند كلما كان ادائه افضل ، العيب التانى اللى بيعانى منه هذا الترند هو بعد الملامسات عن بعضها وبعض الاراء بتقول ان الترند اذا مر بقاعين متباعدين زمنيا يصبح عديم القيمه واحصائيا وجد ان متوسط الفتره الزمنيه بين الملامسات يبلغ حوالى 28 يوم ، ولكن ميزه هذا الترند ان فترته الزمنيه بعيده نسبيا وكقاعده عامه كلما طالت الفتره الزمنيه للترند كلما كان ادائه افضل ، وخلى الفوليوم لمثال تانى لان الفوليوم ده فى الترندات عامل مهم جدا واعتقد ان ادوارد وماجى فى كتابهم اعطوا اهميه خاصه لهذا العنصر
• عشان تحسب مستهدف الترند وهنا هنتكلم عن حاله الترند الصاعد ، بتاخد اخر قاع مر بيه الترند قبل نقطه الكسر (النقطه رقم 1) وبتحسب المسافه عموديا من اعلى قمه ( النقطه رقم 2 ) الى خط الترند وتسقط هذه المسافه من نقطه الكسر(النقطه رقم 3) لتحصل على المستهدف
• الحقيقه انا كنت قرأت لميرفى فى موضوع مستهدف الترند وانا جايب الشبتر اللى بيتكلم فيه عن الموضوع ده وهنا الكلام انا لونته بلونين مختلفين ، فالكلام الاول الملون بالاصفر تقريبا يعتبر كلام مبهم غير واضح لكن خلى بالك من جمله مهمه انه قال(MEASURED VERTICALLY)  والكلام الملون باللون الاخضر يعتبر هو تفسير الكلام السابق الى حد ما ولكن عندنا هنا مشكله ، وهى ان طريقه القياس فى الرأس والكتفين او مقلوبه اللى استدل بيها ميرفى على قياس الترند تبدو متناقضه الى حد ما مع  ما قاله اولا او تقدر تقول ان الطريقتين متشابهتين من حيث الاداء لكن واقعيا مختلفين فى النتيجه والاستدلال، فالرأس فى نمط الرأس والكتفين هى اعلى قمه بين سائر القمم والمفترض هنا ان السعر هيكون مشى اكبر مسافه عموديه يعنى لما تقيس من الرأس الى خط الترند بخط مستقيم هتلاقى ان المسافه دى هى اكبر مسافه عموديه بالقياس لو طبقت هذه الطريقه مع اى كتف الى خط الترند ، لكن هنا فى الترند يا ترى اعلى قمه وصلت لها الاسعار لما تقيس المسافه منها عموديا وحتى خط الترتد هتكون دى اطول مسافه ؟ ولا ممكن يكون عندى قمه تانيه اقل ولكن المسافه العموديه من القمه دى وحتى خط الترند ممكن تكون اكبر فى الحاله دى؟ تعالى كده ناخدها بمثال عملى وارجو ان بالكم يكون طويل  فى هذه النقطه ، المثال الحالى اعلى قمه متحققه فوق الترند هى قمه 55.24 دولار لما نقيس المسافه العموديه حتى خط الترند  هتعمل حوالى 10 دولار فى حين ان المسافه العموديه من القمه الملونه باللون الاصفر عند 51.67 وحتى خط الترند هى 18.60 دولار تقريبا  بالرغم من ان قمه 51.67 هى اقل من قمه 55.24 لكن المسافه العموديه مختلفه بينهم نتيجه  لتغير زاويه الترند اللى اصبح اكتر تسطحا لحد ما واصبحت الاسعار قريبه من خط الترند ، الحقيقه انا فكرت لحل للمشكله دى وحسب فهمى المتواضع لكلام ميرفى حسيت ان استدلاله بطريقه قياس الرأس والكتفين غير متناسقه مع ما يقوله عن الترند عكس مثلا بولكسكى اللى كان محدد اكتر منه فى هذه النقطه وبالتالى كنوع من الاجتهاد منى قلت اننا خلينا ماشين مع طريقه بولكسكى اللى انا شرحتها وتكون دى هدف اول للترند وان اقصى مسافه عموديه اعلى الترند الصاعد  يتم اسقاطها من نقطه الكسر وتكون دى هدف تانى للترند وبالتالى ممكن هنا نقول ان منطقه 39-40 دولار هى الهدف الاول ومستويات 30-31 هى الهدف الثانى للترند

NONFAIULURE SWING ON EGX30

بسم الله الرحمن الرحيم

• على الشارت مثال لحاجه فى التحليل الفنى اسمها NONFAILURE SWING كنا اتكلمنا عنها قبل كده وقلنا ان معناها هو نجاح موجه الارتداد فى اختراق القمه السابقه لها او كسر القاع السابق دون النجاح فى الثبات اعلى القمه المخترقه او  الثبات اسفل القاع المكسور يعنى نقدر نقول عليه الكسر الكاذب ، وكمان قلنا قبل كده ان النماذج المبنيه على   NONFAILURE SWING بتبقا نماذج قويه  زى القمه المزدوجه او القاع المزدوج حتى انها بتكون اقوى من النماذج المبنيه على FAILURE SWING اللى بتكون على شكل M او W لكن القمه الثانيه اقل من القمه الاولى او القاع الثانى اعلى من القاع الاول
• انا ربطت هنا بين  NONFAILURE SWING وكسر خط الترند لان ربما البعض فى التحليل الفنى يخلط بين كسر الترند ويقصد بيه ان الاتجاه اتغير وبين تغيير الاتجاه فعلا، والحقيقه ان هناك نقطه خلافيه بين المؤيدين لنظريه داو حول تغيير الاتجاه ولو نظرنا للرسم المرقم برقم 1 هنلاقى ان النقطه الخلافيه هى هل كسر النقطه 3 يمثل تغير فى الاتجاه وبالتالى اشاره مؤكده على البيع ولا تغير الاتجاه بكسر النقطه 4 ويبقا  الاتجاه تحول الى هابط واصبح عندنا اشاره بيع مؤكده 
• خلينا هنا نفرق بين كسر الترند فى حد ذاته وبين تغييرالاتجاه وده للناس اللى عايزه تتعلم ، فكسر الترند فى حد ذاته لا يعنى تغيير الاتجاه وانما هو اشاره ترقى الى حد التاكد على بدايه الانعكاس او تغيير الاتجاه ، ولكن تغيير الاتجاه فعليا بيتم  بكسر النقطه 3 اللى هى تساوى هنا على الشارت 12737 ولو تفتكروا فى تحليلى للتجارى الدولى يوم 19/3/2017 قلت على نفس الشكل الموجود تقريبا ده انه نموذج 2B SELL وقلت اننا نقلق من كسر 75.5 اللى معناها تغيير الاتجاه فى المدى القصير المنظور وهنا النقطه 75.5 بتوازى النقطه 12737 ، وخلى بالك انا لما كنت بتكلم قبل كده فى تحليلى عن كسر الترند او كسر نماذج زى الوتد او المثلثات كنت باستخدم اقرب دعم وبقول عليه نستخدمه كفلتر اضافى بجانب الفلتر السعرى والزمنى على صحه الكسر وكنت بسميه SUPPORT BREAK، تقدر سعادتك هنا تستخدم النقطه 12737 كفلتر اضافى لصحه كسر الترند ولتاكيد تغيير الاتجاه وبالمناسبه النقطه 12737 بالنسبه  لظاهره NONFAILURE SWING اسمها FAIL POINT اللى بنسميها فى نماذج القمه المزوجه خط تأكيد النموذج  وبتبتدى على اساسها تاخد اكشن وبنقول وقتها ان الاتجاه تغير وبالتالى من الشرح المفصل ده يتضح لنا اهميه النقطه دى فى التحليل الفنى وانها فنيا هى الاصح للدلاله على تغير الاتجاه وعلى انها نقطه بيع مؤكده
• البعض من المحللين بيختلفوا وبيقولوا ان كسر النقطه 4 هى الاصح عشان نحكم على ان الاتجاه تحول الى اتجاه هابط وبالتالى يبقا عندنا نقطه بيع مؤكده ، كمان فيه نوع اخر زى بولكوسكى بيعبر عن تغير الاتجاه بان الاسعار بعد ما تكسر الترند الصاعد تعمل قاع ترتد منه ( النقطه B فى الرسم رقم 2) للتجربه مره اخرى على القمه التى تراجعت منها الاسعار وممكن الارتداد ده يوصل لاختراق اعلى قمه تراجعت منها الاسعار بقليل(النقطه A) على شرط ان يتم التأكد من تراجع الاسعار وليس استمرارها لتكوين قمم اعلى ، وعند كسر هذا القاع (النقطه B ) يكون الاتجاه قد تغير، والعكس فى حاله كان الترند هابط كما فى الرسم رقم 3 ، 
• على السريع كده كنا قلنا ان المؤشر لا يمتلك العزم الكافى لاختراق مستوى 13000 وقلنا ان حاله التذبذب حول هذا المستوى هى اللى هتكون مسيطره لفتره زمنيه قد تمتد لاخر الشهر وبالتالى المرجح ان المؤشر يتارجح بين 12800-13200 حتى يفىء الله عليه بالعزم الكافى لاختراق 13200 ومن ثم استهداف 13500 والمؤشر بجلسه الامس عمل شمعه الهامر لكنها شمعه ضعيفه جدا تفتقد لمقومات شمعه الهامر اللى تقدر تقول ان فيه قوه شرائيه حقيقيه دخلت بجد وان كان فوليوم التنفيذ تناقص بشكل ملحوظ وعليه يجب انتظار جلسه اليوم للتأكد من الارتداد
• ارجو ان الامور تكون واضحه فى الشرح واعتذر عن الاطاله وربما ان البعض يشعر ان الكلام تقيل شويه وممكن يكون صعب عليه ومش عارف ده عيب عندى ولا الناس اخدت على التيك اواى وعايزه التوصيات جاهزه ،  عن نفسى احب لما استعرض معلومه اقولها بما يرضى الله واجمع اكبر قدر ممكن من المدراس اللى اتكلمت فيها واللى انا درستها وانقل العلم ده للناس بدون بخل منى ، وعلى المتلقى - ان كان عايز يتعلم - انه يتعب شويه لان فى المدونه هنا ممكن تشوف حالات تعليميه تطبيقيه وربط بين ادوات التحليل الفنى واساليبه مع احترامى للجميع قلما تجد مثلها فى اماكن تانيه  ، وهنا عايز انوه عن نقطه تانيه اننا ما اتعرضناش لامور تخص خط الترند نفسه سواء كان خط مؤقت او خط اساسى وفترته الزمنيه وعدد الملامسات وزاويه ميله ومستهدفه فالامور دى  عايزه قعده تانيه وروقان تانى خالص مع كوبايه شاى حبر تقيل وسوجاره بنى عشان الكلام يحلو ونقول يا ليل يا عين😁😁

EUR vs USD

بسم الله الرحمن الرحيم

• زوج اليورو / دولار على الرسم البيانى اليومى ، وانا شايف انه فيه علامات ايجابيه على الشارت ، اولها اكتمال نموذج معكوس الرأس والكتفين باختراق مستوى 1.0788 لمستهدف قد يصل الى 1.1297 ، والاهم حاليا الثبات اعلى 1.0788
• ثانيا الكتف الايمن لمعكوس الرأس والكتفين هو نموذج هارمونيك الخفاش البديل  البيعى يكتمل فى نطاق 1.0830-1.0874 وبالتالى نقدر نقول ان عندنا هدف مبدئى هو منطقه 1.0830-1.0874 ثم هدف 1.1297
• اعتقد ان المؤشرات الفنيه زى مؤشر RSI بيرجح ما نقوله ، فهو فى منطقه المكاسب اعلى خط 50 ويبدو اليورو محتفظا بزخمه الشرائى وهو ما رصده المؤشر
• قلنا قبل كده ان طريقه دمج نموذجين مع بعض ممكن نستفيد منها فى طرق المتاجره ، يعنى هنا كنا ممكن نتاجر على نموذج الهارمونيك باعتلاء مستوى 1.0643(النقطه B ) وتقدر تخرج عند مستوى 1.0788 خط عنق نموذج معكوس الرأس والكتفين) والجزء التانى من المتاجره انك تدخل شراء لونج بعد اختراق 1.0788 وحتى مستهدف 1.1279، او ممكن تدخل شراء على نموذج الهارمونيك عند 1.0643 وتكمل متاجره حتى منطقه 1.0830-1.0874 وتنتظر التراجع اللى ممكن يحصل بعد اكتمال نموذج الهارمونيك وتعيد بعدها الشراء لمستهدف معكوس الرأس والكتفين عند 1.1279، وعموما زى ما قلت قبل كده ان وظيفه المحلل مش بس انه يقول اهداف او مناطق دعم ومقاومه لكن من وجهه نظرى ان اهم حاجه يعملها المحلل انه يعلم الناس ازاى تعرف تتاجر، لان اسواق المال محتاجه لتاجر اكتر منها محلل 

التجارى الدولى

بسم الله الرحمن الرحيم

• التجارى الدولى على الرسم البيانى اليومى ، والحقيقه احنا عندنا اكتر من علامه سلبيه موجوده على السهم ، اولهم : شمعه الاب ثراست وهى شمعه سلبيه من شموع المحترفين يتوافر فيها كثير من المتطالبات باستثناء فقط الفوليوم لذلك نحتاج الى اغلاق اقل من 77.25 لترجيح بدء تغير الاتجاه ، ثانيا : عندنا نموذج 2B SELL اشاره الخروج عليه بالاغلاق تحت مستوى 77.25 وان كنت شخصيا بفضل الانتظارللاغلاق تحت 75.5 ، ثالثا : عندنا بيرش دايفرجنس على مؤشر العزم ، وكل الاشارات دى بتوحى ان الاتجاه الصاعد قصير الاجل منذ الارتداد من مستوى 71 قد يكون فى طريقه الى الانعكاس وكسر 75.5 هيأكد اللى بقوله 

EGX30 vs EGX70

بسم الله الرحمن الرحيم

• فاكرين يا جماعه لما اتكلمنا قبل كده عن انفصال حركه المؤشر الثلاثينى  عن المؤشر السبعينى وقلنا انه لابد هيحدث تماهى فى الحركه بينهم ، وبما ان المؤشر الثلاثينى هو المسيطر بحكم تاريخيته لاحظنا ان التماهى فى الحركه بينهم بدءت فى اواخر شهر اكتوبر الماضى وحتى الان والغريب فى الموضوع ان المؤشر السبعينى حاليا يكاد يتمتع بالاسبقيه عن المؤشر الثلاثينى واذا كان الرأى ده صحيح فمن المتوقع ان يخترق المؤشر الثلاثينى قمته السابقه عند 13544
• فى الفقره السابقه تكلمنا من حيث الاداء الفنى وتوقع الحركه من خلال الشارت فقط ، لكن اعتقادى الشخصى  ان المؤشر الثلاثينى حاليا لا يملك العزم الكافى لاختراق مستوى 13000 خصوصا وان السيوله حاليا فى معظمها متجهه الى الاسهم الصغيره والمتوسطه وترجحينا ان تظل حاله التذبذب حول مستوى 13000 نقطه هى المسيطره ربما الى نهايه الشهر الحالى فى انتظار نتائج اعمال الشركات التى ستلعب دورا هاما فى استكمال الاتجاه الصاعد بوتيره سريعه او الاكفتاء بالاداء العرضى المائل للصعود

GOLD

بسم الله الرحمن الرحيم

• الذهب على الرسم البيانى 30 دقيقه ونموذج هارمونيك ينحصر بين الكابوريا والفراشه ، وللاسف فى بعض الاحيان تبدو صعوبه نماذج الهارمونيك فى ترجيح احد نماذجها اثناء التكوين فعلى سبيل المثال تصحيح النقطه B بمقدار 61.8% يجعل النموذج مشترك بين الجارتلى والفراشه والكابوريا وليس الجارتلى فقط كما يعتقد معظم الذين يتحدثون فى الهارمونيك
• هنا النقطه B صححت بمقدار 67% اى بين نسبتى 61.8% و 70.7% ولكن يظل التصحيح هنا اقرب الى نسبه 61.8% طالما انه لم يلامس نسبه 70.7% وبالتالى نحن امام نموذجين يجب ترجيح احدهما عن الاخر باستخدام نسب تصحيح الضلع BC ونسبتى 127% او 161.8.% من AB=CD
• باستخدام نسبه 224% من الضلع BC ونسبه 161.8%AB=CD مع نسبه 127% من الضلع XA هنلاقى كلستر دعوم متكون عند منطقه 1190-1191 ودى المنطقه الاكثر ترجيحا لارتداد الدهب منها وده يعطى الاسبقيه ان النموذج يكون فراشه ينتهى عند نسبه 127% XA حسب ما سبق ودى الطريقه المفضله عندى لترجيح احد النماذج عن الاخرى فى حاله ان تصحيح النقطه B كان مشترك بين اكتر من نموذج والكلام ده موجه للناس اللى عايزه تتعلم هارمونيك صح
• يفشل النموذج ان يكون فراشه فى حاله تجاوز مستوى 1190 هبوطا او فى حاله الارتداد صعودا قبل الوصول الى هذا المستوى وفى حاله كسر مستوى 1190 هبوطا  يكون النموذج هو كابوريا يكتمل عند مستوى 1184.5

الدولار وقيمه الجنيه المصرى فى العقود الاجله

بسم الله الرحمن الرحيم

الدولار فى العقود الاجله لمده عام وصل الى 19.125 جنيه 🤣 و ده معناه ان المستثمرين الاجانب شايفين ان القيمة الحقيقيه للجنيه بتساوى المبلغ ده خلال المرحله القادمه الاغرب بقا ان سعر الدولار فى العقود الاجله خلال الفتره اللى فاتت ظل مرتفع ولم يتأثر بالانخفاض اللى حصل عارفين ليه ! لان المستثمرين الاجانب - حسب تحليلهم - كانوا متأكدين ان لتراجع اللى حصل غير مبرر😬😬 وده اللى قلناه قبل كده ان التراجع اللى حصل كان مفتعل وبتدخل من المركزى عشان بعثه الصندوق وما زالت ازمه غياب مش اقل من 3 مليار دولار غير مدرجه فى الاحتياطى موجوده فى ظل بلد مناخ الشفافيه فيه معدومه خلاصه الكلام ده ايه ! توقع يا باشا خلال الايام الجايه حتى قبل رمضان ان سعر الدولار هيوصل للرقم ده وربما يتجاوزه ولا بديل امام الدوله العبيطه الا زياده المصادر الدولاريه عن طريق الاشياء اللى قلناها قبل كده ومللنا من تكرارها اذا كانت الدوله فعلا عايزه تتحكم فى سعر الصرف وتوقف نزيف انهيار الجنيه لان ارتفاع التضخم المتوالى الناتج من تدهور العمله المحليه واللى فى تقديرى هيدخلنا فى مرحله لتضخم الجامح اللى هتفقد فيه الدوله السيطره على الاسعار - ان لم تكن فقدتها بالفعل - له عواقب اقتصاديه كبيره من اهمها تحوط المستثمرين الاجانب تجاه الديون المصريه ومن ثم ارتفاع تكلفه التأمين على الديون السياديه وبالتالى اعتماد الدوله على الاموال الساخنه المتثمله فى اذون الخزانه وده اللى حاصل فعليا ، ضيف على كده مين من المستثمرين الاجانب اللى هيجى فى ظل نقص العمله وتدهورها وعدم استقرار اسعارها وفى ظل ارتفاع تضخم وما يصاحبه من ارتفاع تكلفه الانتاج وبالتالى هيحسب هامش ارباحه ازاى ! وبنتكلم عن استثمار اجنبى للبلد ، يعنى ناس بتعمل الشىء ونقيضه فى نفس الوقت ده غير التكلفه الاجتماعيه اللى ممكن يكون تمنها كبير وكبير اوى كمان

EGX30

بسم الله الرحمن الرحيم

• مؤشر البورصه المصريه ونمط الوتد الهابط على الرسم البيانى اليومى ، اكتمل النمط بالاغلاق اعلى مستوى 12235 وعاده ما تستهدف الاسعار اعلى قمه فى الوتد وهى هنا عند 13410
• شخصيا لا اثق كثيرا فى نماذج الوتد و المثلثات ، ولكن المؤشر الثلاثينى عاود اتجاهه الصاعد بعد رحله قصيره من جنى الارباح  وسيمر المؤشر خلال رحلته الصاعده بمحطات اهمها مستويات 13000 ، 13150 ثم 13250 والاهم حاليا ان يرتكز اعلى مستوى 12885

EGX30

بسم الله الرحمن الرحيم

•  بعد ان حقق المؤشر جميع الاهداف التى رجحنا الوصول اليها فى المشاركه السابقه للمؤشر و كان اخرها 12700 نقطه ، حاليا على الرسم البيانى الساعه ممكن نتخيل ان المؤشر الثلاثينى للبورصه المصريه فى طريقه لبناء نمط ايجابى وهو معكوس الرأس والكتفين وحاليا ممكن نرجح تراجع المؤشر لاستهداف منطقه 12500-12600 ، لبناء الكتف الايمن للنمط، لكن مش لازم يحصل تساوى للاكتاف ويهبط المؤشر الى مستويات 12300  وان كان تماثل الاكتاف شىء جيد كاحد الاشارات على قوه النمط
• لو كان توقعنا صحيح فمراقبه قاع الكتف الايمن نقطه شراء جيده للمضارب المغامر والمتاجره على الاقل حتى خط العنق ، واختراق خط العنق عند مستويات 12700 او يزيد قليلا مع الزمن هى نقطه دخول للمضارب المتحفظ
• اذا كان توقعنا غير صحيح فالمؤشر هدفه القادم 12800 ثم مستوى 13000 ثم 13200

USD vs EGP

بسم الله الرحمن الرحيم

• بعد ان حقق الدولار هدفه الهابط عند 15.60 جنيه كمستهدف لنمط الرأس والكتفين الذى حددناه فى مشاركه 14/2/2017 بدء تجميع بسيط ، ارتد منه صاعدا للوصول الى مستويات 17.60،ومكونا نموذج هارمونيك THE5-0 الشرائى على شارت 4 ساعات وفى اعتقادى -حسب متطلبات هذا النموذج - ان الدولار من المفترض ان يرتد من هذه المستويات هابطا لاستهداف مستويات 16.65 ثم يرتد مره اخرى صعودا لاستهداف على الاقل القمه التى من المفترض ان يتراجع منها عند 17.60-17.65
• اى اختراق لمستوى 17.65 يعتبر النموذج لاغى واذا قدر ان يكون توقعنا صحيح وان الدولار سهيبط حتى مستوى 16.65 لاستكمال بناء الضلع الاخير فى النموذج فان اى كسر لمستوى 16.65 ايضا يلغى النموذج ويبقى فقط المتاجره فى هذه الحاله مع النموذج حتى نسبه 88.6% من الضلعBC واذا تجاوزها نصل الى نسبه الفيبوناتشى التى تليها وهكذا
• على مؤشر RSI للرسم البيانى 4 ساعات وصل الدولار الى MEGAOVERBOUGHT وهى مناطق الافراط الشرائى الزائد ، يرجح معاها حدوث جنى ارباح ، ربما حسب اعتقادنا يكون هذا التراجع هو لبناء الضلع الاخير فى النموذج حتى وان استبعد البعض ان يفقد الدولار جنيه كامل ، فمع هذا الجنون لاشىء مستبعد فى كلا الاتجاهيين ، فجمهوريه الموز (مصر سابقا) قمنا بفشخ المنطق فى كل شىء😁

EUR vs USD

بسم الله الرحمن الرحيم

• زوج اليورو دولار على الرسم البيانى 4 ساعات ونموذج معكوس الرأس والكتفين اكتمل بالاغلاق اعلى مستوى 1.0609 لمستهدف قد يصل الى مستوى 1.0771
• لاحظ ان انماط معكوس الرأس والكتفين فى التحليل الكلاسيكى يقابلها نماذج THE 5-0 او THE SHARK فى التحليل التوافقى (الهارمونيك ) وفى بعض الاحيان تحتوى انماط THE 5-0 بداخلها  على نماذج هارمونيك خماسيه (XABCD) على شكل W او شكل M كما فى المثال الحالى ، لكن شخصيا افضل الاصح فنيا وهو الحديث عن نموذج THE5-0 وهو النموذج المسيطر هنا فى الهارمونيك ، وفى حال نجاح هذا النموذج فالضلع الحالى الذى يبنى فيه الزوج يكتمل فى نطاق 1.0793-1.0907 ثم بعدها يتراجع الزوج لبناء الضلع الاخير فى نطاق 1.0644-1.0701 وفى الاخير يرتد الزوج بعدها صعودا مره اخرى ، مع ملاحظه ان ما نتحدث عنه الان هو الشكل المثالى للنموذج

EGX30

بسم الله الرحمن الرحيم

• مؤشر البورصه المصريه على الرسم البيانى للساعه واحد احتمالات الموجه الرابعه MINOR وهى ان تكون  على شكل موجه دبل زجزاج W-X-Y وتكون قد انتهت عند مستوى 11850 نقطه وان تكون الموجه Y قد صححت فيها بنسبه 161.8% من الموجه W وهى من النسب غير الشائعه فى التصحيح
•  يرجح هذا الاحتمال اختراق مستوى 12578 اولا على ان تكون اهداف المؤشر المرجحه هى مستويات 12410 ثم 12578 ثم مستوي 12700
• لاحظ انه كانت هناك جاب منهكه مع ظهور نموذج شموع الهرامى والفيلور سوينج الايجالى الموجود على RSI كلها كانت عوامل ايجابيه على بدء الانعكاس ويحتاج استمرار الارتداد الصعودى الى مزيد من المحفزات الايجابيه واعتقد ان اتمام صفقه سى اى كابيتال قد تكون احد اسباب الانعكاس فى المدى القصير