بسم الله الرحمن الرحيم
من خلال تجربتى مع ناس كتير سواء فى الحياه العمليه او على الفسيبوك ادركت شخصيا حجم المؤامره ودور الالة الاعلاميه فى مسخ عقول المصريين لدرجه ان القناعه بقيت عند ناس كتير ان العيب فى الشعب مش فى اللى بيحكموه ووصل الحال ان البعض منهم لما يجى يتكلم يقولك ده شعب ابن تيت وحط مكان تيت ما لذ وطاب من الشتايم وللاسف الناس دى لو بتفكر شويه فى امثله حاضره ويشوفوا شعب زى المانيا الغربيه والمانيا الشرقيه واد ايه كان قرار التوحيد ده مؤذى للالمان الغربيين فى اول الامر لانهم تفاجئوا بمنظومه اخلاق وسلوكيات منهاره وافراد مش عاوزين يشتغلوا بجد رغم انهم كانوا شعب واحد فى الاول لكن شوف الالمان الغربيين حكامهم اشتغلوا ازاى وفى زمن قياسى بقيت المانيا الغربيه يضرب بها المثل فى التقدم والانضباط ، فى حين ان المانيا الشرقيه ذهبت فى غياهب التخلف والقذاره لدرجه ان فى تقرير شوفتوا عن بعض البلدان فى اوربا الشرقيه ومنها المانيا الشرقيه تحس انك فى عذبه نائيه من عذب مصر اللى بتعانى من الفقر والجهل ، والمثال االتانى القائم حاليا وهو كوريا الجنوبيه اللى بتنتج السامسونج وlg واصبحت دوله من اغنى الدول على مستوى العالم وقارن بينها وبين كوريا الشماليه اللى بيحكمها واحد اقل ما يقال عنه انه متخلف عقليا ودول فى الاول كانوا شعب واحد قبل التقسيم لكن العامل الاساسى بين الاتنين هو الحاكم
الرسول عليه الصلاه والسلام قال اذا صلح الراعى صلحت الرعىه ، وفى الامثال العربيه بيقولوا اذا كان رب البيت بالدف ضارب فشيمه اهل البيت الرقص ، وقالوا ان السمكه تفسد من رأسها ورغم كده ما زال الكثير يعتقد ان العيب فى الشعب
اوعى تفتكر ابدا انك كشعب العيب فيك ، العيب الوحيد اللى فى الشعب ده هو سكوته عن الظلم ويعانى من السلبيه ، وللاسف ان تأثير السكوت عن الظلم شرعا تمنه غالى جدا ، والجزء الاخير من عيوب الشعب تأثيره كبير جدا .... وعلم النفس فى النقطه دى بيقول ان العامل السلبى الموجود فى النفس الانسانيه واللى بيسموه الانحياز للسلب ممكن يفسر لنا ظواهر انسانيه كتير جدا زى اللى بنعانيه حاليا من تعاطف الناس مع الجانى او وصم اى شخص عايز يصلح شىء بانه وراها مصلحه شخصيه من فعل هذا الشىء
واوعى تصدق ان مصر فقيره .... مصر بتتسرق من ايام الفراعنه باسم الالهه والكهنوت وما زالت بتتسرق من 64 سنه تحت الحكم العسكرى من 1952 ، مصر اللى وصفها ربنا فى كتابه العزيز ان بها خزائن الارض ولما حصلت المجاعه للمنطقه العربيه ايام سيدنا عمر استنجد بحاكم مصر واهلها فخرجت القوافل من مصر اولها فى المدينه واخرها فى القاهره وفى اوائل القرن الماضى ايام الملكيه فى عام 1917 انقذت مصر بلجيكا من المجاعه ، ولوقت قريب و كان لمصر ما يعرف بالتكيه المصريه فى السعوديه كانت وظيفه التكيه المصريه هى تقديم العنايه الطبيه للحجاج مجانا وتقديم الطعام للفقراء وحتى ستينيات القرن الماضى كانت مصر تدفع رواتب موظفى الحكومه فى الامارات اللى بقينا بنضرب بيها المثل حاليا
مصر دوله غنيه جدا واغنى مما يتصور البعض عشان ما يضحكش عليك ويقولك ان البلد فقيره ومافيهاش فلوس البلد فيها كتير وكتير جدا لكن دور دايما على المستفيد من انه يخلى مصر بالشكل ده ! دور دايما على الحاكم والاراده السياسيه اللى عاوزاك تعيش دايما فى دور العبد عشان الاسياد يرضوا عنهم
خلاصه القول: ان الشعب ده مش هيتصلح حاله الا اذا اتصلح حال اللى بيحكموه هى ده المعادله الصحيحه واخطر شىء ان الناس تعانى من الفساد الرأسى يعنى الفساد البادىء من اعلى الى اسفل واقوى واسهل اصلاح هو الاصلاح الرأسى يعنى البادىء من اعلى الى اسفل
وكم هى عظيمه مقوله لى كوان يو صانع النهضه الماليزيه عندما قال " ان تنظيف الفساد مثل تنظيف الدرج يبدء من الاعلى نزولا بالاسفل"
