بسم الله الرحمن الرحيم
الحقيقه لفت نظرى فى شهاده جيروم باول رئيس الفيدرالى الامريكى اثناء شهادته النصف سنويه امام اللجنه المصرفيه فى مجلس الشيوخ وردا على سؤال من السيناتور الجمهورى تيم سكوت عن احجام الشركات عن الاستثمار رغم ان الاستثمار كان قوى فى 2017 وفترات من 2018
رد باول بأن مخاطر الحروب التجاريه اللى بيقودها ترامب فى اكثر من جبهه و بالتالى ضبابيه المشهد الى جانب تباطؤ النمو فى الاقتصاديات الكبرى لهما تأثير كبير على تراجع الاستثمار
عايز من سعادتك كده تتخيل لو السؤال ده اتسئل لاى واحد من اللى بيسموهم خبراء عندنا هيكون رده ايه !!
ببساطه كان هيقرء من الاسكربيت اللى بيتوزع عليهم ان سعر الفائده هو السبب😁
بالمناسبه تقريبا احنا الناس الوحيده على مستوى شعوب الارض اللى بندخل سعر الفائده واثره فى مشاكل الاستثمار والتغاضى عن عمد عن باقى المنظومه الفاشله فى الاستثمار عندنا، تقدر تقولى ازاى يكون فى استثمار وعندك جيش بيحارب القطاع الخاص وبيزاحمه فى كل مجال ! تقدر تقولى هيكون فيه ازاى استثمار وانت عندك بيئه استثمار طارده له سواء روتين وفساد متفشى وتضخم مرتفع والناس كل يوم تقوم من النوم تلاقى قوانين جديده بتتسلق، والاخطر من كده ومن مجموع حديث الناس الكل بقى خايف يستثمر ويخاطر ومافيش ثقه فى بكره ، مناخ الاحباط بقى مسيطر على الكل وهو ده اللى بيتقال عليه NEGATIVE SOCIAL MOOD وعن نفسى بعتقد انه التفسير المنطقى لهبوط البورصه المصريه ، ومن خلال متابعتى للتحليل الاقتصادى الغربى ما حصلش فى مره تقريبا انى شوفت حد منهم ربط سعر الفائده بالاستثمار ، لكن الكلام كله عن اثر الفائده على مديونيه الشركات والقطاع العائلى خصوصا لما تعرف ان الشركات الامريكيه على سبيل المثال فى اخر 55 عام هى اكثر الشركات عدم وفاءا لالتزاماتها وان ارتفاع اسعار الفائده غالبا بيكون لمنع النمو المتسارع للاقتصاد وبالتالى انفلات التضخم ولكن فى الاخير سعر الفائده مربوط بقدره الشركات نفسها على تحقيق النمو واستقراره الارباح وده اللى شايفينه مع الشركات الكبيره الامريكيه من نتائج الربع الاول
لو احنا بنتكلم عن خبراء من المفترض انهم بيقدموا معلومه جديده وبيعملوا تحديث لمعلوماتهم بدلا من استهلاك كلام عفى عليه الزمن وشغل بغبغنات ، والموضوع سهل مش صعب ، ولو اى واحد منهم كلف خاطره انه يراجع علاقات الاسواق بسعر الفائده واعتقد انا اكتر من مره اتكلمت واثبت بالشارتات ان مافيش علاقه خطيه بين سعر الفائده والاسواق الماليه ، وسهل ان اى واحد يراجع الحقبه من 1983-1989واللى فولكر رئيس الفيدرالى الامريكى ايام ريجان تخيلوا رفع سعر الفائده لحد كام ؟! 22% لتتجاوز نسبه الرفع نسبه ارتفاع التضخم واللى عرف بعد كده بمبدأ تايلور ورغم كده الاسواق الامريكيه كانت صاعده ، ومؤشر نيكى اليابانى على سبيل الذكر من 1989-2003 تم خفض الفائده من 6% الى 0.10% ورغم كده المؤشر فقد 80% من قيمته😁
ولسه قريب جدا من 2015-2018 بنتكلم تقريبا فى حوالى 8 مرات متتاليه رفع للفائده ورغم كده الاسواق الامريكيه بتعمل قمم تاريخيه جديده وقبلها من 2004-2006 رفع الفائده 17 مره بشكل متتالى من 1% الى تقريبا 5% وكانت الاسواق صاعده وحققت برضوا قمم تاريخيه، وفى مصر عندنا تم رفع الفائده 7% فى اقل من سنه وكانت افضل فترات البورصه ، وفى بدايه 2018 تم خفض الفائده مرتين وبعدها المؤشر هبط والبورصه فى اداء سىء من وقتها ، ورغم كل ده عندنا ناس فى غيبوبه ولسه بيقولوا ان سعر الفائده بيأثر على الاسواق الماليه ولسه ناس بتكلمنا عن قاعده اديسون من ستينات القرن الماضى😲ويظهر انهم ما زالوا عايشين حقبه الستينيات واعلام احمد سعيد
*عندى كده شويه تساؤلات*
- يقدر حد من الافاضل يقولنا ايه علاقه سعر الفائده بالتسعير فى ظل بيئه احتكاريه زى مصر وهل المحتكر بيهمه ارتفاع سعر الفائده او انخفاضها ! وهل بيقيم اسعاره فعليا على اسعار التكلفه ولا على حسب قدرته على فرض الاسعار اللى عايزها!!
- يقدر حد منهم يقول ان الحكومه هى السبب الرئيسى فى ارتفاع اسعار الفائده فى ظل الطلب المستمر منها على السيوله ومزاحمه القطاع الخاص فى الاقتراض !!
- هل حد منهم يقدر يقول ان الجيش بقى غول واطلقت يداه فى الاقتصاد المصرى يفعل به ما يشاء واصبح هو من يعطى ومن يمنع على حسب هواه ، واصبح القطاع الخاص فى كثير من الاحيان اشبه بمقاول الباطن فى ظل سيطره الجيش على معظم الانشطه الحيويه فى البلد وعندى كثير مما يقال فى هذه النقطه وبامثله عمليه ارجئها فى مره اخرى ، ويكلمونا بعد كده عن مناخ الاستثمار والاستثمار المباشر😁 ، ويخرج علينا اذنابهم فى الفضائيات والجرائد ليرددوا ما يملى عليهم ، وشخصيا اعلم 99% منهم كيف يتم وصوله الى هذه الشاشات والمناصب وكيف يتم التقاطهم فى مراحل مبكره مثل مرحله الجامعه😉😉
الكل بيستخبى ورا اسعار الفائده وبيجعلها المتهم الاول والمعوق للنمو حتى من بعض المحللين فى الغرب للتغطيه على الاسباب الرئيسيه والهيكليه فى الاقتصاديات الكبيره ومن اهم الاسباب دى على سبيل المثال عدم قدره كل القطاعات المشاركه فى النمو بنسب معتبره وان الموضوع تقريبا بيكون قاصر على قطاعين الى ثلاثه ، ايضا ضعف الطلب من المشاكل الهيكليه ، وبالمناسبه تبنى سياسه فائده صفريه وعدم اقترانها بحسن وكفاءه الاداره وهو ما يتطلبه الاقتصاد الاسلامى ايضا، قد يكون وبالا على الاقتصاد اذا لم يحفز الانفاق الاستهلاكى وبالتالى يبقى الطلب الكلى ضعيف وهو ما يعرف " بفخ السيوله" وكنت تققدر تلاحظ الموضوع ده فى اول ثلاث سنوات تقريبا بعد ازمه 2008 وفى مشاركه قادمه ان شاء الله هوضح استطلاعات رأى حسب مؤسسه جالوب تقدر تستخلص منها ان مؤشرات الاقتصاد الكلى مؤشرات خادعه وملهاش تاثير حقيقى على ارض الواقع ، وان الانبهارات اللى احنا شايفنها فى الاقتصاد الامريكى فى نظر ما لايقل عن نصف الشعب عباره عن "فنكوش" لعدم احساسهم بتطور حقيقى يمس حياته اومال لو شافوا الفنكوش بتاعنا هيقولوا ايه 😁😁
