بسم الله الرحمن الرحيم
- بانتهاء جلسات تانى ايام تداول هذا الاسبوع تؤدى مؤشرات البورصه المصريه اداءا مقبولا فى ظل الظروف الحاليه ومش عايزين ننسى ان بناء الثقه فى الصعود هو بناء تراكمى
- المؤشرات وصلت الى نطاق المقاومات التى سبق ذكرها والمؤشر الثلاثينى وصل الى مستوى 7250 وهو مستوى مقاومه هام وكان الملحوظ اليوم ارتفاع احجام التداول وشمعه اليوم واغلاقها بيدل على انها شمعه شرائيه وكان اليوم شراء من المؤسسات سواء المصريه او العربيه
- كل ما سبق هو اشارات ايجابيه نامل ان تستمر لاستهداف منطقه 7500 ثم 7700 ولكن خلينا حذرين شويه فى ان مناطق المقاومات القويه بتكون مناطق جنى ارباح كمان مش عايزين ننسى ان اليوم هو اخر ايام الربع الثالث فى السنه وبعض المؤسسات بتدخل تشترى اواخر الربع السنوى على طريقه" بايع شارى" لتضمين ميزانيتها الربع سنويه ارباحا ان لم تكن محققه فهى ارباح دفتريه
- المؤشر السبعينى كان استجابته اقل وهناك تباين بينه وبين المؤشر الثلاينى فى الحركه تقديرى الشخصى كان من المفترض ان يكون المؤشر السبعينى عند مستوى 400 نقطه لانه فى حاله حدوث جنى ارباح فى المؤشر الثلاثينى وهذا متوقع خلال هذا الاسبوع بدايه من جلسه الغد بالتاكيد ستتأثر الاسهم الصغيره والمتوسطه به دون تحقيق عائد كبير
- فى اطار النصائح العامه دايما بقول ان البورصه محتاجه تاجر شاطر منضبط عن محلل فنى كبير غير منضبط فالقصه مش فى التحليل الفنى لوحده لكن الاهم انك تعرف تتاجر ومن خلال اداوت بسيطه جدا زى قراءه الشاشه او حتى عن طريق معرفه الدعوم والمقاومات وازاى تكون منضبط فى اوامر البيع والشراء ووقف الخساره والتاجر الشاطر هو اللى يعرف يركب الموجه مع المضاربين وامتى يخرج معاهم او على الاقل يجنى ارباحه اثناء الصعود فى المناطق اللى بيظهر فيها بياع زى المقاومات المهمه ومش يستنى انتهاء الموجه الصاعده او يوقف خسارته عند مستويات دعم هامه بتتكسر دون الانتظار وتبرير الانتظار على امل الصعود ولو سئلنا ناس كتير من المتعاملين فى البورصه انت تعرف انك داخل مجال عالى المخاطره والغلطه فيه بجون او انت داخل البورصه وعارف انت عايز ايه؟ يا ترى انت مضارب ولا انت مستثمر؟ يا ترى تعرف ايه عن العرض والطلب بمفهومه الاقتصادى مش العرض والطلب الخاص باوامر البورصه؟ يا ترى عندك استعداد نفسى لتقبل المخاطر؟ لما تسئل حد الاسئله البسيطه اللى قلتها وده يعتبر ابجديات البورصه تلاقى اجابات غريبه اشبه بمن تقوله صباح الخير يرد عليك يقولك انا مهندس
- حد فاكر يا جماعه نفس الكلام اللى بيتقال الان عن عمران والمؤامره وعن المؤشر لا يعبر عن اداء البورصه مش هو نفسه اتقال قبل كده عن ماجد شوقى وغيره وليه فى الصعود ماحدش بيتكلم ولما الدنيا تخرب بنفتكر الكلام ده؟ يا ترى حد فكر بدل ما يلوم الناس دى لوحدها يلوم المسؤل عن ترسيخ مناخ عام سائد فى البلد عمران وماجد شوقى وغيرهم احد افرازته و يلوم نفسه هو كمان فى انه ما اخدش بالاسباب عشان ينجح ومستنى غيره يقوله بيع هنا واشترى هناك حد فكر انه يتعلم الاول ويعد نفسه قبل الدخول فى اى مجال؟ هو انت سعادتك اخدت باسباب الربح فعلا عشان تحققه؟ بدل ما نقعد نكرر فى كلام قديم جدا عن المؤامره وهى موجوده من قديم الازل فى الاسواق الماليه العالميه واللى يسمع عن ويليام جان الاسطوره الحيه فى التحليل الفنى وحجم المؤامره اللى اتعرضت له نظريته بعد ما كان الرجل بيتنبأ بارتفاع السهم او انخفاضه بالثانيه والدقيقه قبل الساعه واليوم ومات الرجل غما وكمدا فى الاربيعنيات من القرن الماضى على ما اصاب نظريته ودفنت معه اسرار نظريته العظيمه
- اخى المتعامل فى اسواق الاوراق الماليه اعلم انها معركه تكسير عظام ولن يرحمك احد فيها الا ما رحم ربى ممن اخذ بالاسباب فان كنت تريد ان تظل وقود للبورصه فاهلا بك فى خانه الخاسرين وعليك الصمت فلا تلومن الا نفسك وان كنت تريد ان تنتفض حقا فعليك الاخذ باسباب النجاح واولها ان تتعلم الانضباط فى المتاجره و ان تعرف من انت وما ذا تريد وهل قدراتك الشخصيه تناسب هذا المجال ام لا ثم عليك بالتعلم واخذا العلم من مصادره الموثوقه فعليك ان تسعى وعلى الله قصد السبيل
