- مقارنه بين المؤشر والتجارى الدولى على فريم الساعه ، عندنا نمط رأس وكتفين مركب اكثر وضوحا على التجارى الدولى حقق مستهدف نموذج الرأس والكتفين الداخلى والان يبنى فى نموذج الرأس والكتفين الخارجى ، وربما اليوتيا الموجه الزاجزاج البادئه من قمه 70.5 والتى انهى القدم الاولى منها عند قاع 65.93 (A) وبدء فى تصحيح الموجه B والمفترض انها تنتهى عند 69.40-69.50 ثم يعاود التجارى الدولى الهبوط لمستويات 61-62 جنيه .... السؤال هنا اللى هيجى فى ذهن اى حد يا ترى السيناريو ده قابل للفشل ؟ بالتأكيد طبعا اى سيناريو فى التحليل الفنى عموما مش مقدس والتحليل الفنى علمنا ان نتجدث عن ترجيح وليس يقين، اعتقد ان خبر بيع 70% من سى كابيتال شوفنا اثاره فى جلسه الامس وممكن يكمل لجلسه اليوم ونشوف اختراق لقمه 70.5 وبالتالى يفشل سيناريو الزجزاج وسيناريو الرأس والكتفين الخارجى
- بالنسبه للمؤشر كان فيه اختلاف فى تكوين النموذج وانه ما قدرش يكمل هبوط واخترق قمه الكتف الايمن اللى قلنا عليها فى تحليل الامس عند 11309 ، طبعاباختراق زوون المقاومات عند 11320-11350 ده شىء ايجابى و اصبح عنده مقاومه عند 11500 نقطه قبل اصطدامه بقمته اللى تراجع منها عند 11700
- الحقيقه انا دايما بخاف من نماذج الرأس والكتفين المركبه لانها دايما بتضع المحلل او المستثمر تحت ضغط انك لو خلصت من النموذج الداخلى بتلاقى فيه امكانيه لتكوين نموذج خارجى ونفس ما قيل تقريبا عن التجارى الدولى نقدر نقوله اليوتيا عن المؤشر انه حاليا فى الموجه B من الموجه الزجزاج واللى ممكن نشوفها تصل الى حدود 11570 نقطه كاقصى حد تصل اليه ثم يعاود المؤشر الهبوط ليصل الى 10600 ونضع خطين تحت مستوى 10600
- السؤال نفسه امتى يفشل السيناريو ده ؟ باتأكيد باختراق مستوى 11700 واعتقد ان صفقه سى اى كابيتال مع اتفاق اوبك على تقليل انتاجها وبالتالى دفع النفط للصعود ، اعتقد ان الخبرين دول ممكن يكون لهم تأثير ايجابى على المؤشر وان كنت افضل شخصيا اخذا العزم الكافى لاختراق 11700 ومن بعدها 12000 قمه المؤشر التاريخيه، لكن يبقى الحذر واجب والحرص على المتابعه هو الاهم حاليا نظرا للتذبذب العالى فى حركه المؤشر
بالنسبه لبعض الملاحظات الخاصه باليوت
- الحقيقه مش عارف ليه البعض من الاخوه المهتمين بالتحليل الموجى مزاج عندهم يقلبوا اى موجه خماسيه حافزه لموجه تلاثيه دبل او تربل زجزاج مع انى وضحت قبل كده فى المدونه هنا ازاى تفرق بين الموجه الحافزه والموجات الدبل او التربل زجزاج ، يا جماعه امتداد الموجه التالته( مش اقل من 161.8% من طول الموجه الاولى ) هو اكبر دليل على ان الموجه هى حافزه ، تانى شىء تقدر تستدل بيه على الفرق بين الموجه الحافزه والدبل او التربل زجزاج انك لو شديت قناه متوازيه تصل مابين الموجتين 2 ، 4 وبين الموجتين 1 ، 3 هتلاقى 4 ملامسات بس على جانبى القناه (زى ماهو حاصل على المؤشر فى المثال الحالى ) طبق كده القواعد دى هنا على المثالين اللى عندنا وقلى ايه النتيجه ! اما التربل زجزاج والدبل زجزاج بيكون عدد الملامسات كتير على جانبى القناه وبالتالى هنا الخمس موجات الهابطين من قمه 11700 فى المؤشر وقمه 70.5 فى التجارى الدولى هى موجه خماسيه حافزه تخزء عين التخين بدون فلفسه كتير ، وده كان نقطه حوار مع اكتر من واحد ايام ما كانوا بيتكلموا عن سلوك الموجه الهابطه من قمه 10066 الى 5526 انها موجه حماسيه حافزه وقلنا ان سلوك الموجه دى لا يمكن يكون سلوك موجه حافزه ابدا وكان استدلالنا ان الموجه التالته فيها مش ممتده وان عدد الملامسات فيها كتير على جانبى القناه ، دلؤتى فيه منهم الحمدلله شغال فى سيناريو اطول من سيناريو المسلسلات التركى عن المؤشر لسه بيقولوا ان المؤشر فى موجه تانيه ما خلصتش ولسه فيها نزله تانيه لموجه C منها والحمدلله كل ما المؤشر يعدى قمه بقولوا لاء خلينا القمه اللى بعدها عل وعسى يتكعبل ويتحقق سيناريو السراب 😆😆😆
