بسم الله الرحمن الرحيم
الحقيقه من زمان وانا مش بحب اى رئيس دوله يتدخل فى السياسه النقديه لبلده ، وابرز مثالين عندنا هما ترامب واردوغان ، واعتقد ان الهدف من التدخل مش بيكون فى صالح الدوله كما يشاع اد ماهو انتصار للذات ودعم لانجازات الرئيس ، وفى دوله زى امريكا ، حساسيه المنصب لرئيس الفيدرالى الامريكى بتفرض قيود على مسوغات تعينه وغالبا بيكون حامل لدرجه الدكتوراه فى الاقتصاد وراجل تنفيذى يعنى بيكون من اعضاء الفيدرالى 12 المكونين لمجلس الاحتياطى الامريكى وبالتالى العلم والخبره متوفرين بشكل كبير فى من يشغل هذا المنصب ، من الحاجات اللى بندهش لها ان فيه ناس مؤيده لترامب فى هجومه على رئيس الفيدرالى الامريكى وبيقولوا عليه انه بيفهم فى الاقتصاد ، وتقريبا معظم الناس دى اصلا من هواه رفض رفع اسعار الفائده لمجرد انهم بيرددوا كلام عن ان اسعار الفائده
بتأثر على تكلفه الاستثمار وعلى الاسواق الماليه وخلافه واظن انا اتكلمت فى النقطه دى اكتر من مره واثبتنا بالدليل ان الكلام ده مش صحيح فى كل الحالات ومش فى كل الدول ، وان رفع اسعار الفائده له ايجابيات على الاقتصاد زى ما له سلبيات ، ودايما بكرر الجمله اللى ذاكرتى محتفظه بيها من دراسه الاقتصاد " ان المتغيرات الاقتصاديه لا تعمل فى الفراغ" وبالتالى هى تتأثر وتؤثر فى العوامل الاخرى ، وهنشوف ازاى حاليا رفع سعر الفائده فى الاقتصاد الامريكى ايجابى وهيحمىه من مخاطر عديده ،وهنشوف ازى تطبيق المقوله اللى قولتها بشكل واضح على الاثار المترتبه اقتصاديا لو ما حصلش رفع لاسعار الفائده
خلينا اولا نصحح مفهوم شائع عن رفع اسعار الفائده انه بيستخدم لمحاربه التضخم ، والحقيقه ان رفع اسعار الفائده بيرفع التضخم كمتغير تابع نتيجه رفع التكلفه ، وخدها قاعده كده ان اى سعر بيزيد فى المقابل التضخم بيزيد
كمان رفع اسعار الفائده فى الاقتصاديات الرأسماليه مش الهدف الاساسى منه هو محاربه التضخم ، لكن الهدف الاساسى هو ابطأ سرعه معدلات النمو عشان الاقتصاد ما يوصلش لمرحله اسمها OVERHEATING(النمو المتسارع) او يتوغل فيها ، والمرحله دى دايما بتكون مصاحبه لمرحله BOOM او بيسموها PEAK فى الدوره الاقتصاديه وهى اخر مراحل الدوره الاقتصاديه ، واضرار النمو المتسارع على الاقتصاد القومى مش بتقف عند التضخم بس وانفلات الاسعار ، لكن بتمتد الاثار دى لما هو ابعد من ذلك
وعشان نبسط المفهوم ده خد مثال قياده السياره ، يا ترى لو انت بتسوق سيارتك على سرعه 150 كيلو هل السياره هتكون متزنه فى ادائها! بالتأكيد لاء وبالتالى هتلجأ الى المكابح لتخفيف السرعه (سعر الفائده هنا) عشان السياره تمشى بسرعه معقوله وتكون اكثر اتزانا هى نفس الفكره اللى بتلعبه اسعار الفائده حاليا فى ضبط ايقاع النمو المتسارع للاقتصاد
السؤال المهم هنا هل الاقتصاد الامريكى فى مرحله النمو المتسارع ؟
اكيد الاقتصاد الامريكى فى مرحله النمو المتسارع وعندنا اشارات لا تخطئها العين على دخوله هذه المرحله ، منها وصول الاقتصاد الى ما يسمى بالتوظف الكامل FULL EMPLOYMENT اللى فيها الاقتصاد بيكون وصل بدرجه شبه كامله لاستغلال كل موراده المتاحه زى استغلال الطاقات الانتاجيه على اكمل وجه وتشغيل شبه تام للعمال وحاليا نسبه البطاله فى امريكا 3.7% وهو اقل من المعدل المتعارف عليه اقتصاديا عند 4.5% وقوه المشاركه فى العمل بلغت تقريبا 63%، ارتفاع عجز الميزان التجارى نتيجه لارتفاع الواردات عن الصادرات بمقدار 55.5 مليار(الانتاج لم يعد قادر على تلبيه الطلب الكلى للمستهلكين)، ثالث الادله وهو ارتفاع معدلات النمو الفعليه عن معدلات النمو التقديريه وهو ما حدث فى معظم التقديرات الفصليه والسنويه لعامى 2017-2018 ، رابع الادله، نمو الاجور وهو ماحدث بالفعل ان زاد نمو الاجور فى الساعه بنسبه 3.3% وهى اكبر زياده منذ فتره الانتعاش 2009
*الاثار المترتبه على دخول الاقتصاد مرحله النمو المتسارع(كنت عايز اخليها لمره تانيه لان المشاركه طويله جدا بس فضلت ادمجها عشان يبقى الموضوع كله وحده واحده)
1- ما يعرف بدوامه الاسعار والاجور WAGE-PRICE SPIRAL بمعنى ان طالما فيه نمو اقتصادى يعنى اجور بتزيد وبالتالى الطلب على السلع والخدمات بيزيد يعنى اسعار بترتفع ، ولما ترتفع الاسعار العمال بيرجعوا يطلبوا زياده فى الاجور ومع وصول الاقتصاد لحاله التوظف الكامل الشركات ماعندهاش بديل غير انها توافق على طلبات العمال وتنقل عبء زياده الاجور وسعر الفائده الى المستهلك فى شكل زياده الاسعار وهكذا الاقتصاد بيدخل فى دوامه جهنميه، ولو ما حصلش كبح للاسعار ممكن انفلات الاسعار يؤدى الى ما يعرف بالتضخم الجامح زى ما حصل على سبيل المثال مؤخرا مع فنزويلا
2- ظهور الاختلالات الماليه فى باقى قطاعات الاقتصاد الامريكى واهمها القطاع العقارى وظهور الفقاعات فى هذا القطاع كاحد الادله القويه على قرب انتهاء الدوره الاقتصاديه ويمتد الاثر الى ظهور فقاعات الاصول مثل الاسواق الماليه وبالتالى حدوث لحظه منيسكى وانهيار الاصول الماليه
3- وصول الاقتصاد الى حاله النمو المتسارع بيدفع الاسر والشركات الى التفائل بشأن دخلهم المستقبلى وبالتالى زياده ديونهم وهو ما نراه بشكل كبير حاليا فى امريكا
4- عند دخول الاقتصاد فى مرحله النمو المتسارع ورفع اسعار الفائده وزياده التضخم يحدث ان ترتفع العمله وبالتالى تصبح صادرات هذه الدوله لا تتمتع باى ميزه نسبيه وتجد الدوله صعوبه فى تصريف صادرتها
مع ملاحظه ان الفيدرالى الامريكى منذ عام 2004 وحتى 2006 رفع الفائده 17 مره متتاليه من 1.25% الى 5.5% ورغم تشديد السياسه النقديه بهذا الشكل الا ان ذلك لم يحد من زياده الطلب على الاسكان نظرا لنمو ظاهره شراء الديون التى تنامت بشكل كبير منذ 2001 وانتهى الحال بازمه الرهن العقارى 2008
اخيرا من المعروف اقتصاديا انه فى نهايه الدورات الاقتصاديات ، لا تقوم الحكومه بأى اجراءات من شأنها زياده الطلب ، وهو ما فعله المدعو ترامب العام الماضى بالتخفضيات الضريبيه على الشركات ، واجراء زى ده من وجهه نظرى ادى الى تسارع الاقتصاد بشكل كبير وحمل ميزانيه امريكا ما يقرب من 2 تريليون دولار على مدار عشر سنوات قادمه ، ومع تراجع معدلات شراء الديون الامريكيه من عام 2008 واللى هبطت من 55% الى 43%خلال عشر سنوات ، واذا هددت الصين باستخدام هذا السلاح ، لا اعرف من هو الممول الجديد للديون الامريكيه ، واذا قامت البنوك الامريكيه بتمويل العجز ده فالخطر مضاعف على الاقتصاد الامريكى ، ومع احترامى يطلع ناس بعد كل ده يقولوا ان ترامب بيفهم فى الاقتصاد وبيحاربوا رفع سعر الفائده حاليا
