الانفراجات فى التحليل الفنى (DIVERGENCES)

بسم الله الرحمن الرحيم

بالنسبه يا  لموضوع الانفراجات (DIVERGENCES) رغم انى مش من هواه التعليم المباشر فى التحليل الفنى ، بس حبيت اوضح  نقطه فنيه ، يمكن اغلبنا بيقع فيها ، وهو ان اول ماحد بيشوف الانفراج ده موجود على مؤشرات المومنتم، بيتكلم عنه وكأنه اشاره على الهبوط او الصعود مسلم بها رغم ان الكلام ده مش مظبوط ، وخلينا الاول نعرف يعنى ايه دايفرجنس.....ببساطه اى جسم بيتحرك له سرعه لحركته دى، السرعه دى بيتقال عليها عزم او زخم او قوه اندفاع او كميه الحركه (MOMENTUM) ، فى التحليل الفنى اوقات كتير بيتم الخلط بين الحجم (VOLUME) والزخم ( MOMENTUM) والناس بتفتكر ان الحجم هو الاساس فى سرعه الصعود مش الصعود نفسه ، فسرعه الصعود فى التحليل الفنى بتتأثر بالقوه البيعيه اللى هنا بتكون اشبه بالعائق امام الجسم المتحرك على سطح املس ميكانيكيا وبالتالى بتقل سرعته ، والدايفرجنس فى التحليل الفنى معناه ان  العزم نفسه او قوه الاندفاع لا تؤكد حركه السعر(directional momentum does not confirm price) وبالتالى هنلاقى فيه اختلاف او انحراف فى الحركه بين  السعر والزخم او قوه الاندفاع بيتم ترجمتها على مؤشرات العزم زى ما هنشوف بعد كده ، لكن الاول خلينا نشوف عمنا مارتن برينج  قال ايه عن الدايفرجنس وهو افضل من كتب عنها - من وجهه نظرى الشخصيه -الراجل له تشبيه بليغ  بيقول فيه ، لو انت خارج الصبح ولاحظت ان السماء ملبده بالغيوم، هتتوقع ان الدنيا ممكن تمطر! وهتعمل حسابك انك تاخد ما يحميك من المطر ، بس هل تقدر تجزم بان الدنيا هتمطر فعلا لمجرد ان السماء ملبده بالغيوم ! التأكيد مش هيجى غير لما تشعر فعلا  بقطرات المطر بدأت تتساقط !

هكذا هو الانفراج  او الاختلاف او الانحراف سميه زى مانت عايز، مؤشر على ان الاتجاه ممكن ان يتغير ، ولكن لابد من السعر نفسه ان يؤكده ، والتأكيد يأتى باحد الطرق الاتيه:-

1- كسر ترند

2-اكتمال نموذج

3- انعكاس فى القمه او القاع تؤكده الشموع

4- تقاطع المتوسطات البسيطه سلبا او ايجابا

والحقيقه ان الانفراج بيتحكم بحاجتين : اولا : الزمن ، فكلما كان زمن الانفراج كبيرا كلما كان اثره اقوى، وثانيا : كلما كان هناك انفراج سلبى بين القمم  وعلى فتره زمنيه كبيره كلما كان البناء الصعودى ضعيف والعكس بالعكس فى الانفراج الايجابى وبالتالى الاثر ايضا هيكون اقوى 

الانفراج بشكل عام بينقسم الى نوعين

اولا : الانفراج الكلاسيكى

وهو موضوح بالجزء رقم 1 فى  الصوره رقم واحد، ينقسم الى نوعين :  اما انه انفراج سلبى ، على شكل حرف M والسعر فيه بيحقق قمه اعلى من قمه لكن مؤشر المومنتم يقوم بعمل قمه اقل من قمه ، والعكس فى الانفراج الايجابى ، السعر يقوم بعمل قاع اقل من قاع ، ومؤشر الزخم يحقق قاع اعلى من قاع

ثانيا :  الانفراج الخفى

موضج بالجزء رقم 2 فى الصوره رقم 1  والصوره رقم 3 ، وايضا هو نوعين ، انفراج خفى ايجابى وفيه السعر يقوم بعمل قاع اعلى من قاع والمؤشر يقوم بعمل قاع اقل من قاع، والنوع التانى وهو الانفراج الخفى السلبى ، وفيه السعر يقوم بعمل قمه اقل من قمه ، ومؤشر المومنتم يقوم بعمل قمه اعلى من قمه والنوع ده بيكون اقوى من الانفراج الكلاسيكى

ثالثا :  الانفراج المفرط او المبالغ فيه
 موضح بالجزء رقم 3 من الصوره رقم 1 وهو مش شائع اوى وفيه منه نوعين ، الاول وهو الانفراج السلبى، يقوم السعر فيه بعمل قمتين متساويتين ومؤشر المونتم يقوم بعمل قمتين متناقصتين ، والنوع التانى، السعر يقوم بعمل قاعين متساويين ومؤشر المونتم يقوم بعمل قاع اعلى من قاع ، وبيكون الشكل العام اشبه بالدبل توب او الدبل بوتوم

الصوره رقم 2 ، بتوضح مثال على تأكيد السعر للانفراج يكسر خط ترند صاعد كمثال على انفراج سلبى(الاسهم الزرقاء) واشاره بيع ، ونفس الصوره بها مثال على كسر ترند هابط كمثال على انفراج ايجابى(الاسهم الحمراء) واشاره شراء
الخلاصه
 لابد ان تستوعب امرين ، اولا : ان الزخم او قوه الاندفاع لابد لها ان يؤكد حركه السعر حتى لا ينشأ الانفراج او الانحراف
وثانيا : لابد للسعر ان يؤكد الانفراج فى حال ظهوره عن طريق الاربعه اشياء المذكوره سابقا وبدون هذا التأكيد ، من السهل جدا ان ترى السعر فى صعود لفترات زمنيه كبيره رغم وجود الانفراج ولكن يكون هذا الصعود ضعيفا ورده الفعل ربما تكون قاسيه بعض الشىء فى هذه الحاله