ازاى تعرف تتاجر ببساطه مع الهارمونيك والانماط الكلاسيكيه (تطبيق على مؤشر الدولار)
ما زال من اهدافى لما بدءت اكتب فى التحليل الفنى ان الناس تعرف تتاجر مع اكتر من مدرسه من مدارس التحليل الفنى وازاى تدمج المدارس دى مع بعضها لتاكيد المستهدفات او استغلال فرص للمتاجره ،هنحاول بقدر المستطاع توضيح الفكره على مثال واقعى لكنه محتاج تركيز شويه من الناس اللى عايزه تتعلم
- فى الشارت الاول : نموذج هارمونيك خفاش بديل بيعى، منطقه 95.87-95.97 هى المنطقه الاهم للنموذج ده ، لكن عشان النموذج يكون صحيح ، لابد اولا الوصول الى منطقه 94.30-94.65
-الدخول الصحيح شراء لونج كان باختراق النقطه B عند 90.89 فيما يعرف بتكنيك اسمه المختصر BAMM وهو اختصار BAT ACTION MAGNET MOVE وانا اتكلمت عنه قبل كده وبعيد الكلام عن اهميته فى المتاجره مع نماذج الهارمونيك ، اللى من وجهه نظرى بتوفر افضل فرص للمتاجره سواء اثناء تكوينها او بعد انتهائها ، واعيد تانى ان فكره BAMM هى نفسها فكره الدبل بوتوم فى النماذج الكلاسكيه او الدبل توب عند اكتمالهم
- ممكن السعر فى بعض الاحيان مش هيوصل لنقطه اكتمال النموذج وينعكس قبله وفى الحاله دى ، تقدر تغطى مركزك اما بكسر اقل قاع فى نموذج الهارمونيك او اقرب دعم بالنسبه للنقطه B حسب استراتيجيتك
-الشارت الثانى عندنا انماط كلاسيكيه كتير جدا ، لكن شخصيا بحب جدا الانماط العاكسه للاتجاه بداخل المثلثات وبقدر ادمج الاتنين مع بعض فى المتاجره ، المثلثات بتوفر فرصه الدخول المبكر ولو المسافه كبيره بين اختراق المثلث واكتمال النمط الكلاسيكى تقدر تتاجر بينهم وتضع نقطه اكتمال النمط العاكس للاتجاه كهدف اولى لك ، او لو كان اكتمال النمط الكلاسيكى قريب من نقطه اختراق المثلث ممكن تستخدمه كفلتر اضافى فى تاكيد صحه الاختراق او الكسر، وهنا نقطه اكتمال نمط معكوس الرأس والكتفين او سميه قاع ثلاثى مش مهم التسميه لانه فى الاخير نقطه الاكتمال واحده عند 90.89 والاتنين بيأدوا نفس الوظيفه ، كانت قريبه من نقطه اختراق المثلث عند 90.10 وبالتالى ممكن نستخدمها كفلتر اضافى لتأكيد صحه الاختراق ، والاستعانه بخط ترند نمط البامب اند رن كهدف مبدئى للسعر عند 92 واختراق المستوى ده والثبات اعلاه نظريا يؤهل السعر الى استهداف قمه النموذج عند 103.81 ودى نقطه دخول صحيحه اخرى ، لكن حسب العد الموجى قبل كده احنا محددين مستوى 95 كهدف مرجح الوصول اليه اولا وممكن الاهداف دى تصل الى مستويات 97.90 او حتى مستويات 100 وكل ده راجع لشكل موجه الارتداد
-حضرتك متخيل فوق المسافه اللى ممكن تستغلها فى المتاجره بين اختراق المثلث وبين نقطه اكتمال اى نمط كلاسيكى يكون كبير شويه ! طيب متخيل حجم المسافه دى بين اختراق المثلث واختراق خط الترند لو انت بتاجر مع عمله وفى بينهم مثلا 150 نقطه ، او سهم مقدار المسافه بينهم 10 دولار ! من المهم انك تكون تاجر يستغل اشباه الفرص وباستراتيجيه واضحه
- مازال الدولار يبلى بلاءا حسنا ويواصل تقدمه نحو الاهداف الموضوعه له ، ورغم ان الدولار بدء يغوص فى مناطق التشبع الشرائى وهو معرض لجنى ارباح ، لكن تقديرى ان مومنتم الموجه الحاليه هياخده الى مستويات اعلى من كده وهيأكد الترجيح ده استقرار الذهب تحت 1303 ، واستمرار الاداء السلبى لليورو خصوصا وانه بدء الدخول فى المناطق المرجح ينتهى فيها الهبوط او على الاقل الجزء الاول من الموجه الهابطه وهى منطقه 1.2094-1.1553
