*العربيه حليج*
- الحقيقه خلال الايام الماضيه كان فيه كلام كتير عن السهم ده وكالعاده كان فيه كميه من الشجار حوليه لكن اللى لفت نظرى ان ناس شيرت اراء ناس محسوبه من الخبراء فى البورصه خصوصا فى الناحيه الماليه
لكن هو السؤال البديهى دايما اللى بنسئله للناس اللى درست تحليل مالى او اشتغلت بيه عشان نقدر نفرق بين اللى مارسه عمليا من اللى قراه فى الكتب
هو ايه علاقه شركه مجالها حلج القطن بان عندها اصول ثابته كاراضى وما عرفش كام الف متر
🤔🤔العلاقه دى سيادتك عامله زى واحد بتقوله صباح الخير يرد عليك يقولك انا مهندس
اظن انا اتكلمت فى النقطه دى قبل كده وقلت دايما ان اى اصول خصوصا لما تكون اصول ثابته لابد لها ان تكون من جنس النشاط عشان اعرف بعد كده اقيم كفاءه الشركه فى اداره اصولها اللى من المفترض انها بتولد ارباح ، والف باء تقييم الشركات ان فيه حاجه اسمها " الارباح الناتجه عن النشاط التشغيلى" اللى انا كمستثمر لازم احط عينى عليها جنب رقم نمو المبيعات وبالتالى طول ما بيحصل نمو عندى فى الارباح الناتجه عن التشغيل فانا كشركه ماشى فى الطريق الصح
لكن لما قطاع كامل زى قطاع الغزل والنسيج عايش فى تداولاته فى البورصه على شويه اراضى بيمتلكها يعنى ارباح رأسماليه مش ارباح ناتجه عن النشاط التجارى الخاص بالشركات دى وبعد كده نطلع نلبس على الناس ونقولها ان الشركه الفلانيه عندها اراضى معرفش بكم مليون ، هو سيادك الشركات دى اتحولت بقدره قادر لشركات بتشتغل فى المجال العقارى واحنا مش حاسين ولا انتوا بقيتوا سماسره مش محللين !
😁طبعا ما نقدرش نقول هنا هى فين الدوله اللى دمرت قطاع كامل كان بيضرب بيه المثل سابقا وكانت له بورصه قائمه بحد ذاتها لتداول الدهب الابيض المصرى ، لكن نقعد نطبل ونشتغل الناس بمعلومات اقل ما يقال عنها ان العامه بيتداولوها بينهم ، عشان نلعب على مشاعر الناس وندخل ناس اكتر فى المفرمه تحت مسمى ان شركه مجالها حلج القطن تمتلك اراضى المتر فيها ماعرفش بكام ، مش كده وبس لاء وكمان نسب ونلعن فى البورصه اللى فيها اسهم قيمتها دهب جنب اسهم ما تساويش حتى تمن الورقه اللى بيطبع عليها البيانات اللى بتتكتب عنها ، طب يا باشا ما تكلمنى كلام علمى اقدر افهمه وقولى لو فيه نمو مبيعات المبيعات دى جايه منين ، كلمنى عن ارباح التشغيل اخبارها ايه كلمنى عن تكلفه المبيعات والتحكم فى عناصر التكاليف اللى ممكن تغنينى عن النمو فى المبيعات ، لما تيجى تكلمنى عن اصول ثابته لشركه زى حليج الاقطان كلمنى عن كام محلج تمتلكه كلمنى عن كام اله بتشتغل باحدث تكنولجيا فى جميع مراحل حلج القطن عشان تعملى قيمه مضافه للشركه والاقتصاد كلمنى عن خطط استثماريه لاقامه مزيد من المحالج والتوسع فى النشاط ومعدلات النمو المستهدفه مش تقولى الشركه عندها اراضى وما اعرفش ايه ، ويمكن اخيرا الشركه انتهبت لتقسيم الشركه الى جزء اخر لاداره الاصول مع انه خبر على ما اعتقد كان قديم من 2009 ولما نشوف
يا ترى العربيه لحليج الاقطان هتقدر تعيش من غير انبوب الاكسجين اللى كانت معتمده عليه ولا لاء ؟!
- اخر حاجه عايز اقولها هو حضرتك لما ترمى معلومه ان الشركه الفلانيه عندها اصول وبس على كده ، لو سعادتك منصف فى المعلومه قلنا كمان تأثيرها على نسب الربحيه ! او نسب كفاءه النشاط ، يا ترى وقتها تقيم حضرتك للاداره هيكون ايه ؟!
- فنيا السهم مش محتاج كلام كتير على المدى الطويل طالما انه مش قادر يخترق 6.70 ويثبت اعلاها فما تنظريش من السهم خير وهيفضل التحرك العرضى المائل للهبوط هو الارجح خصوصا اذا كسر الترند الصاعد واكد كسره بكسر دعم 5.50 وناخد بالنا ان عندنا فيلورسونج سلبى يعنى السهم الارجح له الهبوط ما لم يحدث اكتساب عزم جديد للسهم يخليه يخترق 6.70 ويثبت اعلاها ووقتها يبقى فيه كلام ايجابى عن السهم
