المشاركه اليوم تختص بالمتاجره مع المؤشر اكتر منها حاجه تانيه وغدا اول يوم تداول فى شهر رمضان المعظم كل عام وانتم بخير وفى احسن حال
المؤشر الرئيسى للبورصه يسير حسب التوقع اللى اتكلمنا عنه فى مشاركه الاربعاء الماضى بتاريخ 24/5/2017 وبالتالى اللى عايز يتاجر مع نموذج الهارمونيك الفراشه اللى نقطه اكتماله غالبا هتكون عند 13845 نقطه لابد له الاول ان المؤشر يستقر فوق 13082 وهى نقطه الدخول والمتاجره حتى نقطه اكتمال النموذج عند 13845
خلينا نقول ان الدخول هنا فيه مخاطره لازم تعمل حسابها وهى انك هيقابلك كلاستر مقاومات اولها خط العنق لنمط معكوس الرأس والكتفين الاستمرارى عند 13400 واللى نموذج الفراشه هو جزء من كتفه الايمن ، ومقاومه 13540 وهى القمه التاريخيه التى تراجع منها المؤشر ، ضيف على كده ان مؤشر العزم RSI ما اخترقش اخر قمه تراجع منها وهى المقابله لقمه السعر عند 13082 بالرغم من انه مؤشر سابق لحركه السعر ، وغالبا كرأيى الفنى انه ده بيرجح ان المؤشر بيعانى من مقاومه 13100 ولسه حتى الان مافيش عزم كافى لاختراقها وخلى بالك ان منطقه 13000-13500 هى منطقه بسميها " منطقه كعبله للمؤشر "
اذا حبيت سعادتك تقوم بالمجازفه والمؤشر نزل بيك عليك انك تحضر نقطه ايقاف الخساير يعنى لو عايز يكون مستوى 12700 هو ايقاف الخساره لك مافيش مشكله لو عايز تتقل شويه وتخليها عند 1500 او 12350 كل دى مستويات من وجهه نظرى ينفع انها تكون مستويات وقف خساره وكل حسب استراتجيته
نقطه توضيحيه للى عايز يتعلم هارمونيك ، النقطه B هنا صححت بنسبه 70.7% وبالتالى الضلع CD هيكتمل عند النسبه المقابله وهى 141.4% والنسبه دى مش هتلاقيها عند سكوت كارنى فى نماذج الفراشه لكنها خاصه بواحد من مكتشفى النموذج وهو لارى بيسافنتو ، على ان نسبه 127% تؤخذ فى الحسبان فى هذه الحاله ( 13700) ، وفى الهارمونيك هذا نموذج الهارمونيك الصغير هو جزء من نموذج اكبر وهو نموذج الكابوريا الغارقه DEEP CRAB
