بسم الله الرحمن الرحيم
شىء جميل ان الكل بيتكلم فى موضوع ارتفاع سعر الفايده ، لكن للاسف معظم الكلام تحس انه كوبى بست ، ونفس الجمل ونفس الاسباب اللى بيتم استدعائها فى المناسبات الظريفه دى دون دراسه حقيقيه
من الانتقادات الظريفه اللى بشوفها فى كل مره يتم فيها رفع سعر الفايده انها هتأثر على الاستثمار، ده على اساس سعادتك ان التضخم مش بيأثر على الاستثمار وابسط الاشياء مش هيخلى المستثمر يقدر تكاليفه التشغيليه ولا ارباحه المستقبليه والاجمل بقى ان مناخ الاستثمار جاذب جدا لاى مستثمر خصوصا وان الحمدلله الجيش بعيد جدا عن النشاط الاقتصادى وان البيئه السياسيه مستقره جدا جدا
وبرضه من الحاجات الظريفه لما تقرئها ان رفع سعر الفايده هيرفع البطاله ، طب سعادتك تسمع عن حاجه كده اسمها "منحنى فيلبس " 🤣
ببساطه كده منحنى فيلبس بيوضح العلاقه العكسيه بين التضخم والبطاله يعنى لو حبيت تقلل نسبه البطاله ده هيجى على حساب زياده معدلات البطاله
ولو حصل فعلا ان سعر الفايده هيأثر على البطاله يا ترى هيكون التأثير ده فى اى مدى هل المدى القصير ولا المتوسط والطويل ! طبعا مش هتلاقى جواب زى كده ولا تقربوا الصلاه
يمكن تفتكروا انا قلت جمله قبل كده " ان المتغيرات الاقتصاديه لا تعمل فى الفراغ " وبمار ان سعر الفايده فى الاساس هو متغير نقدى لكن الكثير بيعتبره انه متغير اقتصادى بما له من تأثير فى تحديد حجم السيوله فى جسم اقتصاد اى دوله وبالتالى التأثير على الاستثمار والادخار واخير الاثر على السياسه الاقتصاديه العامه للدوله وبالتأكيد اثر سعر الفايده كاداه من الادوات المباشره للسياسه النقديه لها ايجابيات وسلبيات وبتأثر على باقى المتغيرات الاقتصاديه وهنا بيظهر دور البنوك المركزيه فى تناغم الاهداف الرئيسيه ( انخفاض تضخم - انخفاض البطاله- التوازن بين الاستثمار والادخار- تحقيق معدلات نمو مرتفعه) عن طريق استخدام الاهداف الوسيطه اللى من خلالها يقدر الوصول الى هذه الاهداف الرئيسيه بدلا من التأثير مباشره على الاهداف الرئيسيه
وشخصيا بقول ان الاهم هو انه يكون فيه حاجه اسمها " فقه الاولويات" وبالنسبالى بعتبر ان التضخم حاليا اهميه قصوى خصوصا من خلال دراستى اعرف كويس اثاره الخطيره فى المدى المتوسط والطويل وازاى انه ممكن يتحول الى شىء كارثى اسمه التضخم الجامح زى ما حصل مع فنزويلا ووصلت معدلات التضخم الى 275% او يحصل زى ما حصل مع الالمان بعد الحرب العالميه الاولى لما ارتفع التضخم الى 1000000% وانهار المارك الالمانى وقتها وكان التعاملات بتم عن طريقه مقايضه السلع مش بالمارك الالمانى
قناعتى الشخصيه ان رفع سعر الفايده حاليا مش هيكون له تأثير كبير فى الحد من التضخم لانه تضخم ناتج عن سببين اولهم انخفاض الجنيه المصرى امام الدولار وربما يكون تأثير رفع سعر الفايده فقط فى الحفاظ على قيمه الجنيه ومنع تدهوره اكتر من كده وعدم كسر الدولار لحاجز 20 جنيه والسبب التانى طبع النقود بدون غطاء وهو ما يجعل المعروض من النقد بالجنيه مرتفع وبالتالى انخفاض قيمته وقوته الشرائيه وطبعا دى حيله بيلجأ لها البنك المركزى توفير سيوله للدوله لسد احتياجاتها الداخليه وسد عجز الموازنه (التمويل التضخمى) وبالتالى لو عالجت السببين دول عن طريق زياده الانتاج وتوفير مناخ صحى للاستثمار واغلاق حنفيه الفساد ودعم الصناعات اللى لينا فيها ميزه نسبيه وكذلك دعم القطاعات التصديريه اللى بتوفر قيمه مضافه للاقتصاد المصرى وتقديم تسهيلات ائتمانيه لها ومميزات ضربيه اعتقد بنسبه كبيره تقدر تتجاوز الازمه ويا ريت لو يكون لنا اهداف نشتغل عليها زى سياسه استهداف التضخم عن طريق السياسه الماليه والسياسه النقديه لخدمه هدف اكبر وهو تحقيق معدلات نمو حقيقيه مرتفعه
