بسم الله الرحمن الرحيم
بالمناسبه يا جماعه فى موضوع الاقتراض الخارجى :-
مش دايما كله سىء لكن ده بيتوقف على استخدام الدوله للاقتراض الخارجى ، فلو الدوله استخدمت الاقتراض الخارجى فى توليد منفعه حاليه او مستقبليه فده يعتبر شىء ايجابى للدوله وقيمه مضافه للاقتصاد زى انى استخدم الاقتراض ده فى مشاريع تنمويه تدر دخل للدوله منه اقدر اسدد اقساط الدين ومنه اخلق فرص عمل للناس عندى (قيمه مضافه) ومن ثم زياده الانتاج
اما حضرتك لو الدوله استخدمت الاقتراض ده فى سد الفجوه التمويليه اللى عندها وللصرف على الاحتياجات الداخليه للدوله فهنا بيتخلق مشاكل كتيره للاقتصاد اهمها مش بس زياده الالتزامات الخارجيه او ارتفاع تكلفه الديون السياديه ، لا كمان و زياده اعباء خدمه الدين اللى بدورها هتأثر على عجز الموازنه وتدخل فى قصه التمويل التضخمى لسد عجز الموازنه وبالتالى ارتفاع التضخم ثم رفع اسعار فائده ثم زياده الدعم للمحافظه على الحد الهامشى من الاستقرار الاجتماعى ..... وهكذا وندخل فى دايره جهنميه خلاصتها تدمير موارد الدوله الاقتصاديه والانبطاح السياسى المصاحب لها
اللى انا قلته ده شبيه بمفهوم النفقه فى الفكر المحاسبى
يعنى لو حضرتك ضحيت بموارد اقتصاديه فى سبيل الحصول على منفعه اصبحت نفقه (EXPENDITURE)
اما اذا ضحيت بالمنافع دى وما حصلتش على منفعه يعتبر خساره (LOSS)
فمابالك ان دوله زى مصر بتضحى مش بس بموارد اقتصاديه لا كمان بتضحى بموارد بشريه وعلى حساب قيمتها السياسيه كدوله رائده فى المنطقه
اللى بتعمله مصر ده فى الاقتراض الخارجى اسمه خساره (LOSS) بالفكر المحاسبى والفكر الاقتصادى والسياسى........ بس خلاص
