بسم الله الرحمن الرحيم
بمناسبه تصريح الاخت كريستين لاجارد مدير عام صندوق النقد الدولى النهارده عن ان الحكومه المصريه والبنك المركزى اتخذا الاجراءات الصحيحه فى كبح التضخم وتخفيض عجز الموازنه لا ومش كده وبس ده كمان بتحيى الحكومه على الاجراءات والتدابير المتخذه لحمايه الفقراء ومحدودى الدخل وان الحكومه هتواصل برامج الانفاق الاجتماعى لدعم الطبقات الفقيره
السؤال هنا هو الاخت لاجارد من كوكب تانى ولا ايه ؟!
ولا هو استخفاف بالعقول وكلام غير مسؤل لتبرير دعمهم وخلاص
فين الاجراءات اللى كبحت التضخم ده اذا كان التضخم فى 8 شهور زاد الضعف رغم رفع الفائده 7 مرات ، وفين تخفيض عجز الموازنه اللى مقدر فى الميزانيه الجديده 385 مليار وبعد زياده الفايده هيوصل الى 420 مليار جنيه ونخلى بالنا ان سعر البترول هنا محسوب على 45 دولار للبرميل يعنى كل زياده دولار عن السعر ده شوف هيكلف الدوله كام وبالتالى ممكن نلاقى وقتها عجز الموزانه ده يصل الى 450 مليار جنيه ، واذا كان الضحك على الناس بالنسبه والتناسب بين عجز الموازنه واجمالى الناتج المحلى من السلع والخدمات ، فالناتج المحلى المصرى عام 2017 بلغ 3 تريليون جنيه مصر ولاجارد بتقول انه هيزيد 1.5% عند تطبيق ضريبه القيمه المضافه كامله يعنى هيوصل تقريبا الى 3.5 تريليون جنيه يعنى بنتكلم فى 12% عجز موازنه ، والاخ وزير الماليه اللى بيحلم او بيقول اننا هنستهدف فى موازنه 2018 ان الناتج المحلى يصل الى 4.1 تريليون عايز اقوله بأماره ايه؟ باماره المصانع المتوفقه اللى بتزيد ولا انخفاض القوه الشرائيه للناس اللى بدء تأثيره يظهر فى مجالات كتيره ولا السياحه المتوقفه ، ولا بأماره تقرير بنك بى ان باربيا عن مخاطر الاستثمار فى المدى المتوسط واللى حدده البنك فى 3 عوامل اولها الارتفاع المطرد فى التضخم وثانيا استمرار عجز الموازنه وثالثا العجز فى ميزان المعاملات الجاريه ودى اسباب داخليه ده غير الاسباب الخارجيه الناتجه عن التوترات الجيوسياسيه فى المنطقه يعنى حلمك ده مبنى على اساس ايه ! ولا لسه نوعيه المسؤلين بتاعه الصحاف ايام حرب العراق و اعلام جوبلز واحمد سعيد شغالين فى تضليل الناس
للاسف ان استخدام الاقتصاد الرقمى فى الضحك على الناس العاديه والتلبيس عليهم كنت فاكرها صناعه مصريه خاصه بالمسؤلين فى مصر اتضح انها ماركه عالميه ، وصندوق النقد اللى دمر اقتصاديات 22 دوله ناميه قبل كده ناوى على خراب مصر اكتر ماهى خربانه ، وصندوق النقد بيشتغل الحكومه فى مصر والحكومه بتشتغل الشعب والشعب عامل نفسه انه مصدق
و عادى بقى عبيط بيشتغل عبيط واحنا اللى بندفع تمن عبطهم
