المؤشر على الرسم البيانى اليومى وضعف واضح فى الصعود لاستهداف الحد العلوى للقناه وزى ما اتكلمنا قبل كده اكتر من مره ان فى حالات الارتفاع الجزئى(PARTIAL RISE) او الانخفاض الجزئى (PARTIAL DECLINE) فى القنوات السعريه ممكن يكون مؤشر على انعكاس الاتجاه -حسب فترته الزمنيه - والوصول الى الجانب الاخر للقناه ، لكن هنا الوضوع مرتبط برقم مهم جدا وهو مستوى 13260 نقطه وده الرقم اللى اشرت اليه فى التحليل الموجى السابق ، والحقيقه الرقم ده له اهميه كبيره فى اداء المؤشر واحنا ما اتكلمناش عليه اعتباطا او من قبيل الصدفه فالرقم ده موجيا وكلاسيكيا هيفرق فى حاجات كتير ، واعتقد ان اى محلل لو ما ادركش اهميه الرقم ده على الاقل كلاسيكا بلاش نقول موجيا ، يبقى عليه ان يراجع معلوماته فى التحليل الفنى عموما
رقم 13260 هو خط تأكيد اكتمال نمط سلبى وهو القمه المزدوجه الغير متماثل اللى قلنا قبل كده انه مبنى على ظاهره NONFIALURE SWING واوقات بيتقال عليه 2B SELL ، ولو حصل كسر للمستوى ده والحد الاسفل للقناه الصاعده ما قدرتش توقف الهبوط ، بنسبه كبيره ممكن المؤشر يصل الى منطقه 12500-12600
اللى بيفهم فى التحليل الموجى ، هيعرف ان كسر مستوى 13260 هو اللى هيرجح عنده غالبا ان سيناريو الموجه الخامسه انتهت ايا كان ايه هو السيناريو اللى بيتبعه ، والموضوع مش فهلوه ولا بالنظر لان التحليل الموجى لوحده مش كفايه ، لكن دايما التأكيد بيجى من التحليل الكلاسيكى وان المقاومات والدعوم وخطوط الترند والنماذج الانعكاسيه لها دور كبير فى ترجيح احد سيناريوهات اليوت المتعدده او تعديل بعض الاهداف للموجات
بدون كسر 13260 انسى الموضوع فى الهبوط واشتغل على اما الحركه هتكون عرضيه لفتره قصيره او تحقيق قمه جديده
