بسم الله الرحمن الرحيم
بمناسبه عقد مؤتمر الشمول المالى :-
يعتبر الشمول المالى خطوه جيده جدا لاى دوله عايزه نمو اقتصادى حقيقى ، وتقديم خدمات ماليه ميسره لكل فئات الشعب دون تميز ليستفيد منها الافراد والدوله
والحقيقه وان كان مفهوم الشمول المالى مفهوم حديث نسبيا من حوالى 10 سنوات لكن كان بيسبقه حاجه اسمها التضمين المالى وده مفهوم انتشر منذ منتصف التسعينيات تقريبا
انا عندى قناعه تامه ان اى فكره مستورده من الخارج لما بتدخل الخلاط المصرى بتخرج حاجه تانيه خالص ، فسياسه القفز على الحواجز اللى ماشيه بيها مصر ، ويلا بينا نعمل كده بدون اعداد او ترتيب بيخلينى اشك فى النتائج المرجوه
فكان من المفترض ان يكون هناك جدول زمنى لتطبيق الشمول المالى مدته مثلا سنتين او تلاته بحيث ان الكل يستعد له سواء بنوك او افراد ،لان ده هيخلينى عندى شويه تحفظات فى صوره اسئله بعيدا عن البنيه التحتيه والفوقيه للبنوك والكلام ده
1- يا ترى حضرتك عندك مناخ لتداول المعلومات بشفافيه ! حضرتك الشمول المالى اول حاجه فيه انه قائم على توافر المعلومه واتاحتها للجميع سواء كانت معلومه اقتصاديه او ماليه
2- يا ترى حضرتك عندك مناخ استثمارى جيد يستفيد منه الافراد والشركات فى حاله تطبيق الشمول المالى ولا هيكون دوره بس قاصر على الاقراض ولطبقات معينه فى ظل تشريعات وبيئه استثماريه طارده للاستثمار ومرتبط بيها بيئه سياسه محتقنه وفساد ادارى ومالى فى جميع مستويات الدوله
3- حضرتك قمت بالدور المنوط بيك فى تقيف وزياده وعى الافراد او القائمين على اداره هذا الموضوع فى التعامل مع الافراد ! سعادتك تقدر تطلع على دور القائمين على الموضوع ده فى اوربا والدول المتقدمه ، ودورهم بس مش بيقتصر على تقديم الخدمات الروتينيه المعروفه لكن بيتعدى ذلك الى ما يعرف بالمستشار الاقتصادى او المالى يعنى هو اللى يوجهك لنوعيه الاقراض المناسب لحالتك وممكن كمان يوجهك للاستثمار المناسب
4- هل البنوك فعلا هتكون مستعده للشمول المالى ! وانا هنا بتكلم مش على البنيه التحتيه للبنوك لكن بتكلم عن الرغبه الحقيقيه فى القيام بالدور الاستثمارى المنوط به البنوك واللى اتعملت من اجله ، فى ظل قيام البنوك بالاستثمار الامن فى اذون وسندات الخزانه بعائد يتعدى 18%
5- حضرتك ازاى عايز تعمل شمول مالى فى ظل اجراءات روتينيه معقده للخدمات الماليه واغلب الاجراءات دى موجهه لمحاربه الارهاب وكأن مصر هى الدوله الوحيده اللى عندها ارهاب، فى حين ان الشمول المالى اصلا مقدم فى جزء منه لتسير الخدمات الماليه لافراد مش تعقيدها ، تخيل ان حضرتك على سبيل المثال عشان تفتح حساب فى البنك لازم تجيب خطاب من جهه العمل عشان يعرفوا مصدر الفلوس دى ، طب سعادتك واللى فلوسه دى من ميراث او مثلا كان مشغلها فى مشروع بسيط وانسحب منه او الناس المهنيين اللى وفروا جزء من فلوسهم وخلافه هيجيب لسعادتك منين ما يثبت الكلام ده ! واللى انت بتعمله ده يا ترى بتوجه رساله ايجابيه ولا سلبيه للمدخرين ! وانت عندك اصلا من القوانين ما يكفى لمحاربه غسيل الاموال والارهاب فايه الداعى لمزيد من التعقيد فى ظل مستويات متدنيه من الادخار هبطت من 14 % من اجمالى الناتج القومى المحلى الى اقل من 6%
النجاح له اسبابه وعمر ما كان الموضوع بالفهلوه زى ما كل حاجه فى مصر ماشيه كده ، وطول ما الامور ماشيه بدون تخطيط مدروس واداره علميه ، فإنسى الموضوع وقول يا باسط
