بسم الله الرحمن الرحيم
كنت من حوالى يومين كده عايز اتكلم عن المصريه للاتصالات بمناسبه دخلوها اليوم عالم المحمول وموضوع التخارج من فودافون والكل عارف ان حصتها فى فودافون 45%
كنت متوقع -وده الطبيعى انه يحصل - ان المصريه للاتصالات تتخارج فعلا لسببين :-
اولا : ان هناك تضارب فى المصالح ومن المفروض ان قوانين حمايه المنافسه بتمنع حاجه زى دى واللى اعرفه ان فيه قرار من مجلس الوزراء يقضى بتخارج المصريه للاتصالات من فودافون بعد حصول المصريه على رخصه المحمول بسنه والسنه اهى عديت
ثانيا : ان اعباء التمويل والممثله فى النفقات الرأسماليه فى حدود 12-13 مليار جنيه دفعت منهم المصريه للاتصالات عام 2016 حوالى 10 مليار جنيه (بمافيهم ثمن الرخصه 7.1مليارجنيه) وفى النصف الاول من 20017 حوالى 1.7 مليار جنيه والشركه كانت بنبحث اقتراض 13 مليار جنيه من 5 بنوك على 8 سنوات لتمويل توسعاتها الحاليه والمستقبليه والاستثمار فى البنيه التحتيه لخدمات الانترنت والمحمول وبالتالى كان من الطبيعى انه يتم التخارج سواء لاعباء التمويل او تبعا للقوانين المنظمه لحمايه المنافسه
لكن الغريب ان رئيس جهاز الاتصالات من سنه تقريبا قال تصريح غريب ان قرار مجلس الوزراء اشار لتشكيل لجنه لبحث سبل التخارج ولكنه لم يلزم المصريه للاتصالات بالتخارج ..... لا يا راجل 😀
لانهارده رئيس المصريه للاتصالات احمد البحيرى استفزنى بتصريحه انه لا يوجد نيه لدى المصريه للاتصالات للتخارج من فودافون ..... شغل بلطجه يعنى
وماحدش عارف فودافون هيكون ايه رد فعلها ! خصوصا انها ممكن تلجأ للتحكيم الدولى للاضرار بمصالحها ، ولا الموضوع ممكن يتساوى كده بينهم وبين بعضهم من تحت الترابيزه ويا دار ما دخلك شر!
بصراحه استمرار الوضع على ماهو عليه هو صوره حيه للفساد بعينه
