شكل الاهرامات فى الصوره دى اوحى لى بأن الحضاره المصريه كانت فى ترند صاعد خماسى من الناحيه الاليوتيه ، وزى ماهو معروف عن مصر فى عصر الدوله القديمه اللى كانت بتتميز بالخير والرخاء وازدهار العلوم والفنون والاداب و اتعرف عن الدوله القديمه انها عصر بناه الاهرام
الهرم الاكبر اللى اتبنى فى عهد الاسره الرابعه بيمثل نهايه الترند الصاعد الخماسى ، وده متوافق تاريخيا بان الدوله القديمه بعد اسقاط الاسره الرابعه واللى تم فى عهدها بناء الاهرامات ومعظم التماثيل الكبيره بدء الضعف يدب فيها خصوصا مع بدايه الاسره السادسه واللى ازداد فيها دور حكام الاقاليم وبعد ان كانت مصر وحده واحده ، بدء حكام الاقاليم يستقلوا باقاليمهم عن الفرعون وحصل ده فى عهد الملك بيبى التانى اللى حكم مصر حوالى قرن من الزمان وبكده تفككت مصر وضعفت وبدءت نهايه الدوله القديمه بنهايه الاسره السادسه ، وبدءت مصر فى ترند هابط منذ اواخر الاسره الرابعه وكان هرم الملك منقرع بمثابه "رفسه القط الميت" وبه تعرفنا على شكل التصحيح انه سيكون تصحيح حاد على شكل موجه زجزاج ABC وذلك مع بدايه عصر الاضمحلال الاول من الاسره السابعه وحتى التاسعه ، لتكوين الموجه التانيه الهابطه لكن يظهر ان الفراعنه حسوا بالخيبه اللى منتظره مصر وان الشعب ده خلاص مش هتقوم له قيامه تانى فقالوا مافيش داعى اننا نعمل الموجه التالته اليوتيا الصاعده واللى معروف عنها انها اقوى الموجات الدافعه فى العد الموجى
كلاسيكيا عندنا نمط سلبى رأس وكتفين اكتمل بزوال الحضاره الفرعونيه وما زال لم يحقق مستهدفه حتى الان ، وحتى الوصول الى مستهدف الرأس والكتفين ما زلنا فى ترند هابط لانتهاء التصحيح ، وبدايه تكوين قاع الموجه الثالثه القويه على الفريم طويل الاجل جدا جدا جدا والذى قد يمتد الى الالاف السنين او الوصول الى يوم القيامه ايهما اقرب
