بسم الله الرحمن الرحيم
بص سعادتك:-
1- لو انت بتتبع سياسه
انكماشيه فما ينفعش تقولى ان فى السياسه الانكماشيه عندنا تضخم وصل الى 35% اذا
كان انت بتتبع السياسه الانكماشيه عشان تقلل التضخم لكن طول مأنت مش بتعالج المرض
نفسه وهو التوزان بين العرض الكلى والطلب الكلى يبقى انسى الموضوع وازاى هيحصل
التوازن ده وانت ابسط حاجه بتعملها انك بتتوسع فى اصدار النقود(تضخم نقدى) والباشا
بتاع الماليه والباشا بتاع المركزى خاربينها فى الموضوع ده ، اطبع يا زكى قدره
يطبع زكى قدره 😁 وزى ما قلت قبل كده ان مشكله التضخم فى مصر انه تضخم مركب جزء منه
التضخم النقدى
2- طول ما انت مش بتقدر تتحكم فى
الانفاق االخاص او العام وفى دوله متخلفه زى مصر اقصى ما تسطيع فعله انها تيجى على
الانفاق الاستثمارى دون ترشيد حقيقى فى الانفاق الحكومى سواء على الامن(الانفاق
على الجيش وتسلحيه) او المرتبات والمزايا الاجتماعيه اللى بتمنح لفئات معينه من
الشعب لضمان الولاء يبقى بردوا انسى الموضوع ، مع العلم ان الدول الناميه بتنفق فى
المتوسط 50% من ميزانتيها على تسليح الجيوش اللى اساسه حمايه الانظمه الديكاتوريه
، وفى دوله زى مصر المخروسه كلنا عارفين ان الجيش بياخد مش بيدى ابدا وكلنا عارفين
انهم صحاب البلد واحنا ضيوف عندهم بس ضيوف رخمين 🤣
3- طول مأنت عايز تحقق مستويات نمو
وهميه (يستفيد منها فئه معينه من الشعب على حساب باقى الشعب نفسه) قايمه على
سياسيه تمويل تضخميه(التمويل بالعجز) فأنت كده بترفع الطلب الكلى على حساب ثبات
المعروض من السلع والخدمات (تضخم طلب) يبقى بردوا انسى الموضوع ، وفى مفهوم
التنميه المستدامه اذا كانت عوائد معدلات النمو تتم لصالح الاغنياء فقط مع عدم
عداله التوزيع فى الدخل والثروه وما يعقبها من ظلم اجتماعى فاعلم انها معدلات نمو
وهميه (تخيلوا ان فى مصر فقط 30 اسره بتستفيد من معدلات النمو وباقى الشعب يسف
تراب )
4- طول ما فيه زياده فى الاستثمار
المخطط عن الادخار المخطط(المدرسه السويديه الجديده) فالتوسع فى مشاريع البنيه
التحتيه على حساب الادخار المخطط لازم ينتج عنه فجوه تضخميه تنعكس فى وجود فائض
طلب فى اسواق السلع وفائض فى الطلب فى اسواق عوامل الانتاج (الارض ورأس المال
والعمال) يبقى بردوا انسى الموضوع
نقول كمان ولا كفايه !
يا امه ضحكت من جهلها الامم
