الحقيقه ان اساتذه التحليل الفنى دايما كانوا بيحذروا من القطيع ، ووانك عشان تكسب لازم تكون على الجانب الاخر منهم ، وبرغم انى شخصيا مش بحب استخدم اللفظ لكن اكتشفت فى السنين الاخيره انه لفظ مناسب جدا لتفكير بعض الناس ، اساتذه التحليل الفنى للاسف تناسوا ان فيه نوع منتشر فى وطنا العربى اسمه قطيع المحللين الفنيين وهو احد الاسباب الرئيسيه فى تردى اوضاع البورصات العربيه والحقيقه عشان الانصاف انا بتكلم عن بعضهم فعلى الجانب الاخر هناك البعض الذى يقدم علم محترم فلهم كل التحيه والتقدير ، وللاسف فى من القطيع عدد لا بئس به حاصل على شهادات فى التحليل الفنى ، لكن شهاداتهم دى لعدم وعيهم وثقافتهم الفنيه والاقتصاديه وهما ناس اشبه باللى بيحفظ مش بيفهم وبيستسهل الحصول على المعلومه وغالبا قدراتهم الذهنيه متواضعه فبيردد الشائع والمتداول ، يعنى مش طالب علم يبحث ويدقق ويحقق المعلومه عشان يوصلها سليمه للمتلقى عشان عارف انه هيتحاسب عليها يوم القيامه ، بمناسبه الناس اللى بتحفظ(كان عندنا فى الجامعه ناس بتحفظ مسائل المحاسبه والرياضه وكانوا بيجيبوا امتياز وجيد جدا فى المواد دى) وللاسف ضعف المعلومه والمردود الايجابى اللى بنتظره من الناس دى والغير متناسب مع الشهادات اللى بيقولوا انها معتمده يخليك اول سؤال تطرحه ، الناس دى حاصله على شهاداتها منين !!مع انى شخصيا مش بعترف فى التحليل الفنى غير بالـ CMT ، المشكله عندنا فى الوطن العربى مشكله وعى عشان كده حكام العرب معركتهم الاساسيه مش فى افقار شعوبهم ولا الفساد وبس لكن معركتهم الاساسيه مع شعوبهم هى معركه "الوعى" عشان كده هتلاقى احمد موسى ومصطفى بكرى وتوفيق عكاشه واشكالهم فى كل مجال ، وهتلاقى معظم النخب فى كل مجال سواء سياسى او اقتصادى او ثقافى او رياضى او حتى فى اسواق المال للاسف نخب فاسده وجاهله ، واشخاص بيتم قيادتها من وراء ستار وبيتم اختيارهم عن قصد وعمد عشان يتصدروا المشهد والهدف معروف طبعا وللاسف النخب دى من المفترض انها تقود وعى المجتمع، جايز البعض يظن انى خرجت عن الموضوع لكن انا فى صلب الموضوع وحبيت اوضح للقارىء مدى تغلغل الشبكه العنكبوتيه واذرعها الممتده فى كل المجالات ومجال حيوى زى اسواق المال لا يمكن يترك كده حر طليق بدون سيطره امنيه وتوجيه، فالدول الفاشيه لازم تكون مسيطره على كل المجالات ، عشان كده هتلاقى عدد محترم جدا من القطيع ده شغال محلل فنى ومنهم المعتمد ومنهم الموجود فى اداره البورصه ومنهم اللى بيظهر فى وسائل الاعلام ، دول سعادتك اللى بتلاقيهم منهم قايم بدور الماشطه وبيزين الوش العكر زى اقتصادنا زى الفل بس البورصه بنت الكلب مش بتعكس رفاهيه المستوى الاقتصادى والتنميه المستدامه اللى بتحققها مصر المخروسه ، ومنهم اللى شغال بغبغان يعنى تردد اللى احنا بنقوله فى الوسيله الاعلاميه بتاعتنا لكن تتكلم فى تحليل فنى وفنيات لا يا شاطر روح العب بعيد ، يعنى متخيل انك لو رايح تعمل لقاء فى قناه غير مهنيه زى CNBC عربيه اللى لو اتنين اطلقوا بتقول اطلقوا عشان فيرس كورونا هتتكلم انت تقولهم الاسواق الامريكيه بتصحح عشان فيه ضعف فى الترند ولا قناه سعريه صاعده اتكسرت ولا دبل توب موجود ولا موجه اكتملت ولا فيليور سوينج سلبى موجود !
الحقيقه عندى سؤالين لاصحاب المعالى : اولهم هو ليه الدهب بينهار فى عز انهيار اسواق الاسهم رغم انه ملاذ امن وليه برضوا فى 2008 فقد 35% من قيميته رغم انهيار اسواق الاسهم !! طبعا مع احترامى فيه اجابات هتقولك ان صناديق التحوط بتبيع الدهب كمركز رابح ومحتاجين سيوله عشان يغطوا مراكزهم الخسرانه فى الاسهم ، تبرير منطقى الحقيقى بس عندى اعتراض هنا اللى محتاج السيوله عشان يغطى مراكزه يا ترى ليه نقل السيوله دى للبلاديوم اللى شخصيا كنت محدد له مستهدف عند 2600 ووصل الى 2800 قبل التصحيح!!وليه السيوله دى كمان دخلت السندات بعنف خليت عوائدها تهبط بوتيره مجنونه !! ببساطه هتلاقى الاجابه فى اخر المشاركه ، وتكمله للسؤال وبعيدا عن حاله البانيك الحاليه يا ترى الدهب كان فين كملاذ امن مش بيصعد طوال الثلاث سنوات الماضيه وماشى بشكل عرضى !! او نخليها بدايه من 2018 مع بدء الحرب التجاريه بين امريكا والصين وقعد حوالى 6 شهور فى ترند هابط فى عز اشتعال الازمه
السؤال التانى سئلته من كام يوم هو ازاى القطيع طالع يوهم الناس بمخاوف الفيرس واسهم امريكا والمانيا بتحقق قمم تاريخيه جديده !! يا جماعه ده المانيا اللى صادرتها مع الصين بتمثل 7% من الناتج القومى واكتر دوله هتتأثر صادرتها بسبب الموضوع ده كان الداكس عندها بيحقق قمه تاريخيه جديده يوم 17/2/2020
انا عارف ان السؤالين صعب على القطيع يعرف اجابتهم ، لكن من باب الافاده للناس هجاوبهم انا
الاجابه ببساطه فى "الباترن" PATTERN ولو بصينا للشارتين للداو وللدهب هنفهم المقصود بالباترن ، ان الاسهم الامريكيه حققت قمم تاريخيه برغم مخاوف الفيرس لان كان فيه نموذج او موجه سعريه لازم تكتمل اولا عشان كده الاسواق تجاهلت كل الكلام الفارغ بتاع الفيرس وكملت الموجه اليوتيا او الدبل توب كلاسيكيا وبالمناسبه الدبل توب ده يكاد يكون موجود على كل شارتات الاسواق العالميه ، والباترن ده هو السبب فى انه الدهب فقد 35% فى 2008 ولما انتهت الموجه بدء التصحيح العنيف فيه ايامها ولما خلص التصحيح بدء الصعود فى عز ما الازمه كانت موجوده والصعود بدء 1/9/2008 يعنى قبل افلاس ليمان برذارز مباشره والفتره من 1/9/2008-31/12/2008 الدهب صعد 21% ، والباترن برضوا هو السبب اللى خلى الدهب يمشى بشكل عرضى طوال الثلاث سنوات الماضيه وياخد الترند الهابط فى اول 6 شهور من 2018 بالرغم من بدء الحرب التجاريه ، هو السبب حاليا ان الدهب مش قادر يصعد لانه ببساطه خلص موجته الصاعده اللى كان لازم يخلصها وبدء موجته التصحيحيه اللى لسه بدرى عشان ينتهى منها حاليا واللى لازم تخلص غصب عن اى حد وبعد كده يبتدى الصعود وعلى فكره من الاحتمالات الموجوده حاليا ان الدهب ممكن يكون شطب خلاص موجته الصاعده من قاع 1046 دولار
موضوع الباترن ده وسيكلوجيه الافراد اللى بتقود الاسواق واللى بترسم الباترن بناءا على SOCIAL MOOD وان كان NEGATIVE OR POSITIVE هو اللى ياما لسانى تعبنى وانا بتكلم فيه عن اسعار الفائده وعلاقتها بالاسواق الماليه ، وان اسعار الفائده ملهاش علاقه ثابته بيها ، لكن اخوانا بتوع التحليل الاساسى ومن على شاكلتهم عندهم اعتقاد خاطى بأن هناك حتميه تربط الاسواق الماليه بالاساسيات رغم انهم ووقفوا عاجزين عن تفسير ظواهر زى تجاهل الاسواق الماليه لعديد من الاساسيات زى اسعار الفائده والناتج المحلى الاجمالى والعجز فى الميزان التجارى حتى لو كان اكبر عجز فى تاريح اكبردوله فى العالم او تحقيق ارباح غير متوقعه او على سبيل المثال PMIزى ماحصل مع اوربا يوم الجمعه الماضى وجاءت البيانات افضل من المتوقع ورغم كده بدايه من يوم الاثنين 24/2 دخلت اسهم اوربا فى بانيك ، ولم يؤمنوا الى الان بأن الاسواق الماليه هى من تقود ولها منطقها الخاص بها
THE STOCK MARKETS LEADING THE WAY , AND THEN THE HEADLINES FOLLOW
تقدروا ترجعوا لانهيار 1929 وازمه 2008 للتأكد من اللى بقوله
