الحقيقه فى تحليل الامس ما كانش فيه فرصه انى اربط التحليل الكلاسيكى بالتحليل الموجى لان الشارت كان هيزدحم اكتر والمشاركه هتطول اكتر ماهى طويله وفضلت انى اربط التحليلين ببعض عشان الصوره تضح اكثر امام القارىء ونناقش السهم بموضوعيه واثره على تحرك المؤشرونخلص من السهم ده بقا
الشارت الاسبوعى عليه نموذج رأس وكتفين مركب (ثنائى الرأس) اكتمل بالاغلاق تحت مستوى35.90 تقريبا لمستهدف يصل الى 23.5 ، السهم عمل بولباك مرتين لاختبار خط العنق وفيه طريقه عمنا مارتن برينج اتكلم عنها كمؤشر على فشل النموذج ، وهى انك تسحب خط ترند يصل بين القمه والكتف الايمن واختراق الترند الهابط ده هو بدايه فشل النموذج ويتم التأكد من ذلك بالاغلاق اعلى الكتف الايمن عند 44.57 وطبعا الاغلاق اعلى 47.38 يعنى فشل النموذج رسميا وطبعا فشل النموذج ده هيحوله لنموذج تجميعى وفى الحاله دى انتظر رالى صاعد قوى جدا وربما فى هذه الحاله نتأكد من انتهاء تصحيح الموجه الرابعه اليوتيا وترجيح احد السيناريوهات اللى اتكلمنا عنها امس
لاحظ ان خط عنق النموذج والخط الواصل بين القمه والكتف الايمن انشأوا مثلث هابط اعتقد انه لا قيمه له فى وجود كبير النماذج السلبيه وهو الرأس والكتفين الا فى حاله المتاجره وانا مش عاوز اتكلم عن نقاط دخول او خروج فى السهم او متاجره لانى ما زلت عند رأيى ان السهم ده من الاسهم المحرمه شرعا وهو سهم ربوى وتقريبا انا اول مره فى حياتى اقوم بتحليل السهم فى المدونه لانى مش عاوز حد يتأثر ايحابا برأيى ويشترى فيه وانا استخرت ربنا فى تحليل هذا السهم وعقدت النيه ان يكون تحليل هذا السهم من باب معرفه تحرك المؤشر فقط ، وبذكر الناس للمره المليون من خطوره الربا على المسلم ومش عاوزين ندخل على بيوتنا فلوس حرام ويكفى حديث عن الرسول صل الله عليه وسلم فيما معناه ان الربا مقسم الى 99 درجه اقل درجه فيه كأن يزنى الرجل مع امه والعياذ بالله ، واللى معاه السهم ده يخلص منه ولو حتى بخساره واكيد ربنا هيعوضه عن ترك معصيه بافضل منها او اللى مش عاوز يخسر يسترد رأس ماله مصداقا لقوله تعالى "وان تيتم فلكم رؤؤس اموالكم لا تظلمون ولا تظلمون" واللى كسب من السهم بدون علم فخلاص يكفى لتوبته الندم على ما فعل اما من يعلم فتوبته التبرع بمكسبه فى المصارف العامه زى المستشفيات او لبناء طرق وما شابه لكن ما يتبرعش بالفلوس دى لمسجد ، وبالتالى انا ابرء الى الله من اى فرد يقوم بالشراء فى السهم ده تأثرا برأى ايجابى فى السهم فالحمدلله لسنا من المبشرين او الداعين الى الحرام ولسنا ممن يدعون لاى سهم ايجابا او سلبا وارجعوا الى التنويه المكتوب فى المدونه ، فالحمدلله نحن خارج البورصه منذ عام 2010 وما نقوله هو رأى فنى بحت نبذل فيه اقصى طاقه ونأخذ بكل الاسباب الممكنه حتى نعطى معلومه صحيحه او تحليل اقرب الى الواقع وانا حبيت اقول الكلام ده عشان يكون اساس التعامل ونتفق عليه اذا ما حدث وقمت بتحليل هذا السهم مره اخرى اواى سهم اخر بدلا من التكرار فى كل مره ..... دمتم بخير
