بسم الله الرحمن الرحيم
الحقيقه السؤال اللى بتسئله كتير القاع فين !
خلينى اقول ان توقع القاع يظل فى حيز التوقع والاجتهاد وغالبا القاع بيتعرف بعد تكوينه وانا كنت اتكلمت فى مشاركه للمؤشر امس قلت ان فيه مؤشرات ممكن نستطلع بيها القاع منها ارتفاع الفوليوم والزخم الشرائى المصحوب بظاهره (MEGA OVER BOUGHT) ونضيف عليهم اليوم :- تداول اسعار الاسهم تحت قيمتها الحقيقيه ، والتشائم وتوقع المزيد من الهبوط وللاسف هنا بنعانى من عدم وجود مقياس حقيقى نعرف منه نفسيات المتعاملين والترجمه الحقيقه لها على مؤشرات موثوق بها
وبشكل عام عشان ما نشغلش نفسنا بالسؤال ده خلينا نفكر بشكل منظم ومنطقى وتسئل نفسك كام سؤال كده
ااولا:- قدراتك فى المتاجره ومدى انضباطك !
ثانيا:- طبيعه شخصيتك ان كنت بتحب المغامره او انك متحفظ بشكل عام
ثالثا:- الفتره الزمنيه اللى انت بتشتغل عليها
واعتقد ان 3 اسئله دول يقدروا يصيغوا شخصيتك الاستثماريه وطريقه شغلك مع البورصه
فلو انت راجل قدراتك كويسه بتعرف تشترى وتبيع ومنضبط فى ايقاف الخسائر وعندك استعداد للمغامره فتقدر تشتغل مضارب سوينج يعنى تركب الموجه من اولها وتعرف تنزل منها قبل نهايتها واعتقد ان الاسلوب ده مش محتاج انك تعرف القاع فين وزيه تقريبا الناس اللى عاوزه مبلغ معين بجانب مرتبها او معاشها انك تستغل اى تراجعات للمؤشر فى تعديل مراكزك لو انت موجود بالفعل فى السوق او دخول جديد تحقق منه ربح معقول بدون طمع وتكون عارف تحمى ارباحك فين بدون ما تحول مكسبك لخساره اما لو كنت شخص متحفظ وامكانياتك مش كويسه فى المتاجره وبتحب المتاجره على فترات زمنيه ممتده نسبيا (3شهور الى اقل من سنه)فأنت يهمك اولا الاتجاه وبناء عليه هتاخد قرارك بالدخول ولو انت موجود بالفعل فى السوق وفى اتجاه هابط فمن الافضل وقتها انك تستغل الموجات الصاعده لتخفيف مراكزك الشرائيه اما المستثمر طويل الاجل( سنتين الى خمس سنوات) فبيستغل فترات الهبوط دى فى تكوين مراكز شرائيه بغرض الاحتفاظ وبيختار القطاعات الجيده اللى ليها مستقبل خلال السنوات القادمه على ان يختار شركه او اكثر تتميز بالمركز المالى الجيد والثبات النسبى فى الارباح وتنويع الاستثمارات والقدره على النمو لان الحاجات دى هتنعكس عليه فى شكل توزيعات او زياد ربحيه سهمه.
وبالتالى انشغال الناس بالسؤال عن القاع ملهوش اهميه قصوى الا عند نوع واحد تقريبا من اللى قولناهم وشخصيا انا افضل فى حالات الشك وعدم اليقين بالترتيب كده :- المتاجره مع الموجات الصاعده ولو بتحقيق مكسب بسيط ، او الشراء على مراحل بغرض الاحتفاظ ، او الابتعاد نهائيا عن السوق
والمحبوس فى اسهمه باسعار عاليه للاسف ملهاش حل غير الانتظار الا لو كان معاه كاش يقدر يعمل بيه حاجه من اتنين اما انه يعدل بيه اسعاره فى نفس السهم باسغلال اى صعود ويعتبر الجزء اللى داخل بيه كأنها متاجره جديده وعند تحقيق ربح يخرج ويطرح الربح ده من سعر السهم اللى شارى بيه وبكده يقلل من سعر شراء السهم او الحاجه التانيه انه يدخل فى اسهم جديده يحقق منها ربح والربح ده يطرحه من اجمالى خسايره . لكن ما تحاولش انك تضيف فلوس لمركز خسران لمجرد انك تقلل متوسطك وبعد كده ياخدك السهم وينزل يبقى انت كده ضاعفت خسارتك ...
الكاش مهضوم حقه يا جماعه على السفره المصريه
