بالنسبه يا جماعه لموضوع الانفراجات (DIVERGENCES) رغم انى مش من هواه التعليم المباشر فى التحليل الفنى ، بس حبيت اوضح نقطه فنيه ، يمكن اغلبنا بيقع فيها ، وهو ان اول ماحد بيشوف الانفراج ده موجود على مؤشرات المومنتم، بيتكلم عنه وكأنه اشاره على الهبوط او الصعود مسلم بها رغم ان الكلام ده مش مظبوط ، عمنا مارتن برينج وهو افضل من كتب عن الانفراج له تشبيه بليغ بيقول فيه ، لو انت خارج الصبح ولاحظت ان السماء ملبده بالغيوم، هتتوقع ان الدنيا ممكن تمطر! وهتعمل حسابك انك تاخد ما يحميك من المطر ، بس هل تقدر تجزم بان الدنيا هتمطر فعلا لمجرد ان السماء ملبده بالغيوم ! التأكيد مش هيجى غير لما تشعر فعلا بقطرات المطر بدأت تتساقط !
هكذا هو الانفراج ، مؤشر على ان الاتجاه ممكن ان يتغير ، ولكن لابد من السعر نفسه ان يؤكده ، والتأكيد يأتى باحد الطرق الاتيه:-
1- كسر ترند
2-اكتمال نموذج
3- انعكاس فى القمه او القاع تؤكده الشموع
4- تقاطع المتوسطات البسيطه سلبا او ايجابا
وكقاعده عامه: الانفراج يحتاج الى زمن ، فكلما كان زمن الانفراج كبيرا، وكلما كان هناك عددا من الانفراجات السلبيه بين القمم ، كلما كان ذلك دليلا على ضعف بنيه الاتجاه ، والعكس بالعكس
الانفراج بشكل عام بينقسم الى نوعين
اولا : الانفراج الكلاسيكى
وهو موضوح بالجزء رقم 1 فى الصوره رقم واحد، ينقسم الى نوعين : اما انه انفراج سلبى ، على شكل حرف M والسعر فيه بيحقق قمه اعلى من قمه لكن مؤشر المومنتم يقوم بعمل قمه اقل من قمه ، والعكس فى الانفراج الايجابى ، السعر يقوم بعمل قاع اقل من قاع ، ومؤشر الزخم يحقق قاع اعلى من قاع
ثانيا : الانفراج الخفى
موضج بالجزء رقم 2 فى الصوره رقم 1 والصوره رقم 3 ، وايضا هو نوعين ، انفراج خفى ايجابى وفيه السعر يقوم بعمل قاع اعلى من قاع والمؤشر يقوم بعمل قاع اقل من قاع، والنوع التانى وهو الانفراج الخفى السلبى ، وفيه السعر يقوم بعمل قمه اقل من قمه ، ومؤشر المومنتم يقوم بعمل قمه اعلى من قمه والنوع ده بيكون اقوى من الانفراج الكلاسيكى
النوع التالت : وهو الانفراج المبالغ فيه موضح بالجزء رقم 3 من الصوره رقم 1 وهو مش شائع اوى وفيه منه نوعين ، الاول وهو الانفراج السلبى، يقوم السعر فيه بعمل قمتين متساويتين ومؤشر المونتم يقوم بعمل قمتين متناقصتين ، والنوع التانى، السعر يقوم بعمل قاعين متساويين ومؤشر المونتم يقوم بعمل قاع اعلى من قاع ، وبيكون الشكل العام اشبه بالدبل توب او الدبل بوتوم
الصوره رقم 2 ، بتوضح مثال على تأكيد السعر للانفراج يكسر خط ترند صاعد كمثال على انفراج سلبى(الاسهم الزرقاء) واشاره بيع ، ونفس الصوره بها مثال على كسر ترند هابط كمثال على انفراج ايجابى(الاسهم الحمراء) واشاره شراء
