عن بيان الحكومه الرشيده

بسم الله الرحمن الرحيم

اعلنت الحكومه عن برنامجها  "المتفائل" امام مجلس الشعب ، اللى فى سابقه تاريخيه يصفق رئيس مجلس الشعب لرئيس الوزراء ، بعد انتهائه من الخطاب ويمدحه قبل القاء خطابه ، ومن المفترض انها الجهه الرقابيه على الحكومه، ده غير منظر النواب وهما واقفين طابورعلى الوزراء عشان الامضاءات ، نفس منظر برلمان موافقون ايام حسنى مبارك ، مش كده وبس ، ده السيد رئيس مجلس القلل كون لجنه من 50 عضو ، لمناقشه بيان الحكومه منهم 28 عضو من دعم مصر الموالى للسيسى و6 معينين ، وماحدش عارف اختارهم على اى اساس ! وحصلت مشكله بين النواب بسبب الموضوع ده ، وسلملى على الرقابه

نيجى للبيان نفسه واعتقد اننا سمعنا بيانات مشابهه من عشرات السنين ، وتقريبا بنفس الجمل حتى شعار البرنامج منقول يعنى مافيش اى ابداع ، ونفس الاسباب الواهيه لتبرير الفشل ، والملفت للنظر ان الاخ رئيس مجلس الوزراء، مافيش مره كلمنا مثلا ، عن اطار زمنى لتنفيذ بنود البرنامج ، او ايه هى الاليه المتبعه فى تحقيق البرنامج والخطوات اللى المفروض تكون معروفه للناس ، يعنى مثلا عشان اخفض عجز الموزانه من 11.5% الى 9%-10% المقترحه المفروض اعمل ايه ! المفروض الباشا يبقى عنده خطه اجرائيه وزمنيه للحل  لعرضها على المجلس ، على الاقل انا كنائب اقدر اناقش الخطه والاجراءات لكل محور من محاور البرنامج، لكن الموضوع مش بالنيه والكلام الانشائى  ، فين الكلام الجاد عن تحسين الخدمات للمواطن ، او اننا نشعر ان فيه اهتمام حقيقى بالامن القومى المائى او بقضيه التنميه بشكل عام وفى سيناء بشكل خاص

اعتقد انه كلام كله مطاط ، ووعود الناس شبعت منها ، وبيان تقليدى انشائى يستخف بالعقول ويفتقر حتى الى معلومه احصائيه واحده ، لكن الحمدلله عرفنا من البيان ، انه لسه فى مزيد من الخياطه للشعب المصرى
وعلى رأى المثل الشعبى :  " يا مستنى السمنه من بطن النمله "

فعلا انها حكومه رشيده فى نظام سياسى رشيد