اعتقد ان من افضل القرارات اللى اخدها ترامب هو تعيين جيروم باول وكنت اتكلمت عنه قبل كده انه مرشح ثانى بنسبه 28% بعد كيفين وارش بنسبه 41% وهو من الصقور المتشدده فى رفع سعر الفائده وبمعدلات عاليه
لكن جيروم باول راجل وسطى ومن مدرسه يلين يؤمن برفع الفائده لكن بشكل تدريجى ما يضرش الاسواق الماليه ، وكمان من الناس اللى بتؤمن بالتنظيم لقاعده فولكر لمنع الرهانات التى تنطوى على مخاطر عاليه ، ومن القواعد اللى يجب حمايتها بعد ازمه 2008 حسب ما ذكرسابقا (ارتفاع السيوله -معايير رأس المال- اختبارت الضغط المصرفى ) يعنى الاختيار ده حسب وجهه نظرى الشخصيه مش هيسبب قلق للاسواق الماليه زى اختيار واحد زى وارش ، كمان الراجل ايده فى المطبخ من عام 2012 وانا من الناس الغير مؤمنه تماما بانك تجيب واحد اكاديمى مهما علا شأنه وتعينه فى منصب تنفيذى ، العمل الاكاديمى مختلف خالص عن العمل التنفيذى ، وده من اكبر المشاكل على سبيل المثال اللى بتواجها مصر ، طبعا مع احترامى الكامل للاقتصادى المعروف جون تايلور واللى له قاعده باسمه منذ اوائل تسعينيات القرن العشرين لحساب معدل الفائده النقديه وكان من اقوى المرشحين لتولى هذا المنصب
