سبحان الله من رحمه ربنا بعياده سواء العاصى منهم او الطائع انه بيقبل توبتهم مهما كان عظيم ذنبهم ، وسبحان الله من رحمته بينا كمسلمين جعل لينا مصادر للحسنات تعتبر ببلاش بس كتير مننا غافل عنها ....
هل فكرت حضرتك مثلا وانت داخل الفيس بوك بدل ما تشتم وتجادل انك تجعل نيتك افاده الناس بما تكتب ! تخيل انت ممكن تاخد كام حسنه عن كل حرف بتكتبه بهذه النيه
هل جربت انك تجعل نيتك وانت نازل لشغلك انه فى سبيل الله ولافاده دينك ومجتمعك وطاعه لله ! متخيل استحضار النيه فى حاجه زى دى هتخلي انتاجيتك فى الشغل عامله ازاى او لو بتاخد رشوه هيكون ايه موقفك !
فكرت حضرتك تتاجر مع ربنا بالنيه ! وهى التجاره الرابحه باذن الله
يعنى لو سعادتك من الناس اللى بتصلى النوافل لو افترضنا بتصلى السنه بعد الضهر او الشفع والوتر بعد صلاه العشاء وصليت النوافل دى باكتر من نيه زى انها تكون بنيه النافله و بنيه انها سنه عن الرسول صلى الله عليه وسلم وانها بنيه جبر صلاه الفريضه اذا حصل سهو فيها او ما كنتش مركز فيها كلها ، او انها لوجه الله تعالى وتقدر تضيف نوايا زى مانت عايز تخيل كم الحسنات اللى ممكن تاخده
فكرت مثلا بدل ما تقول استغفر الله العظيم عند الغضب او لا حول ولا قوه الا بالله - ده اذا كنا بنقولها - يعنى وقت الغضب ان الذكر ده يكون فى لسانك معظم الوقت
تخيل كلمتان زى سبحان الله وبحمده سبحان الله الظيم ممكن يتقلوا ميزانك فى الاخره ويحولوا وجهتك من النار الى الجنه
جربت ان يكون ليك ورد قرأنى كل يوم ولو حتى 10 اياات وتقرأهم باكتر من نيه عشان ما يكونش القرأن حجه عليك بدل ما يكون شفيع ليك
جربت مثلا انك تقول بسم الله الرحمن الرحيم فى اى حاجه تعملها !
تخيل ان اى عمل بدون ذكر الله فهو ابتر يعنى قد يعطيك الله فضل العمل فى الدنيا ولكنه يحرمك من فضله فى الاخره ، والاقوال فى ثواب فضل البسمله كثيره اقلها الوقايه من الشيطان الرجيم والبركه فى العمل نفسه
تخيل ان ابتسامتك هى سنه عن الرسول صلى الله عليه وسلم !
مش عايز طبعا اتكلم عن زكاه اموال او صلاه او صيام او حج فالعبادات التوقيفيه امر مطالب بيه المسلم ابتدءا ، لكن انا بتكلم عن مصادر للحسنات ببلاش وسهله جدا وبدون عناء ، وكل اللى قلتله هو تجاره مع الله بالنيه فقط ، واكيد فيه ابواب كتير تانيه ممكن تاخد منها حسنات بسهوله
ربنا خلقنا مش عشان يعذبنا ابدا فهو ارحم بعباده من الوالده بولدها ورحمته سبقت غضبه وقد اقسم على نفسه بالرحمه " كتب على نفسه الرحمه" فهو رحمان الدنيا ورحيم الاخره
اللهم ان رحمتك وسعت كل شىء ونحن شىء ، فارحمنا يا رب العالمين
