بسم الله الرحمن الرحيم
اللى ربى خير من اللى اشترى
سبحان الله لم يخطىء ظنى ابدا فى الناس اللى بتوصل لمناصب كبيره فى البلد دى
ولما تبص على قطاعات كامله فى البلد تحس ان حسنى مبارك عرف يربى فعلا
ومن اهم هذه القطاعات هى القطاع الاقتصادى والمالى ، خصوصا المتعلق بالبورصه
الاستاذ هانى توفيق بيعترف بعبقريه نظام حسنى مبارك واحترافه اقتصاديا
واحلى حاجه لما تعمل مقارنه بين السىء والاسوء والاغرب انك تختار من بينهم الاسوء وتتكلم عنه فنيا انه افضلهم
والحقيقه ان الرفاهيه اللى المواطن كان بيعشها واللى عايشها حاليا خير دليل على العبقريه فى اداره المنظومه خصوصا الاقتصاديه
وحتى المقارنه على الاقل تفتقد ابسط شروط العداله من الناحيه النظريه البحته ، فعصر مبارك كانت الامور فيه اهدى سواء داخليا او على المستوى الخارجى ، ورغم كده كانت اسوء فتره فى تاريخ مصر
انا بس عاوز اماره واحده على العبقريه الاقتصاديه اللى بيقول عليها الاستاذ هانى توفيق !
اوعى تكلمنى عن معدل نمو 5 او 6% ايام مبارك لان ده اسمه معدل نمو طبقى ، ومش قايم على تنميه حقيقيه ده معظمه قايم على بيع اصول وعلى مصادر طياره ، ولا تكلمنى عن احتياطى 36 مليار دولار لان بلد زى لبنان ما يقتش دوله اصلا من عم 1982 وعندها 47 مليار دولار احتياطى ، ولا حد يكلمنى عن اسثتمار اجنبى مباشر ، كان مرتفع فى عصر مبارك لان ربنا عرفوه بالعقل ، ولو كان الاستثمار الاجنبى بالشكل ده له فايده فى الاقتصاد المصرى ، كان المفروض انعكس فعلا على التنميه وعلى المواطن ، قولى ازاى استثمار مباشر اجنبى مرتفع ومعدل نمو مرتفع ومعدل فقر بيزيد ! هتتكلم عن سوء توزيع ولا هتتكلم عن احتكار ولا هتتكلم عن ان اقتصادك كان فى خدمه 30-40 اسره فى مصر ! ماهى كلها اسباب تدين العبقريه الاقتصاديه يا فندم اللى انت بتتكلم عنها ، يا سعاده الباشا هو مش المفروض من العبقريه اللى بتدير المنظومه ، انى اوجه الاستثمار الاجنبى المباشر للمشاريع التنمويه اللى البلد تحتاجها ، او للمشاريع كثيفه العماله عشان يبقى فيه مردود ايجابى على معدل نمو حقيقى وعلى المواطن نفسه ! ولا اسيب الاستثمار الاجنبى يتاجر فى قطاعات استهلاكيه او قطاعات قليله العماله زى قطاع البترول ، اللى فيه الفساد للركب ! ويستفيد هو على حسابى انا ، وفيه ما يشبه القاعده الاقتصاديه كده ، انه اذا كانت الارقام المعلنه عن الاداء الاقتصادى لا تنعكس على المواطنين ايجابا، فهى ارقام كاذبه ،
هو مش من العبقريه بردوا انى اعرف ادير موارد الاقتصاد المتاحه عندى زى ما اتعلمنا فى الاقتصاد ، سعادتك ما تسمعش عن حاجه اسمها كفاءه اداره الموراد الاقتصاديه ! ومن ابرز الامثله فى النقطه دى اليابان اللى ما عندهاش حاجه خالص ومورادها تكاد تكون معدومه ، وبصوا اليابان فين
تقدر تقولى سعادتك فين العبقريه الفذه دى فى اداره ملفات زى استثمار قناه السويس على الوجه الامثل واللى كان يحققلك اضعاف اضعاف اللى بيجى منها الان ، او ملف زى السياحه اللى كنت ايام مبارك بتحتل المركز 19 فيه على مستوى العالم رغم ان عندك تلث اثار العالم وعندك سياحه دينيه غير مستغله على الاطلاق فى حين ان دول تانيه لا تمتلك حتى ربع ما تمتلكه مصر ومن اوائل الدول فى السياحه ، ملفات زى الخصخصه والاراضى المنهوبه للدوله ومكافحه الفساد ، احسب كده العائد من الملفات دى لو احسنت ادراتها واحسب كده تكلفه الفرصه البديله لو كنت استغليت المليارات اللى اندفعت فى مشاريع فاشله زى توشكى وفوسفات ابو طرطور فى مشاريع تانيه زى اقامه منطقه تجاريه حره حول القناه او طورت الخدمات اللوجسيته للقناه ، لو حسبتها هتلاقى ان تريلونات مهدره كان كفيله انها تخلى مصر اعظم دوله فى العالم مع العلم ان اى ملف من دول العائد منه يغطى على خساير ثورتين مش ثوره واحده... وفى الاخر بنتكلم فنيا عن انهم افضل ناس اداروا المنظومه ، امال لو ما كانوش افضل ناس من وجهه نظرك كانوا عملوا فينا ايه !
و الحقيقه انا كنت عاوز اسئل الباشا سؤال رفيع كده
لما هو نظام حسنى مبارك الاقتصادى كان محترف وعبقرى كده هى الثوره قامت ليه !
هو الباشا ما يعرفش اول كلمه قالتها الناس كانت ايه ؟ كانت عيش ، وبعدها حريه ، وبعدها عداله اجتماعيه ، يعنى عندك عنصرين مرتبطين مباشره بالجانب الاقتصادى اللى نظام حسنى مبارك ابدع فيه ، وده على اساس ان الناس كانت فاضيه مش لاقيه حاجه تعملها فقالوا يلا نعمل ثوره
ومش معنى ان فاشل اخد فاشل قبله قدوه فده دليل على عبقريه الفاشل الاول ، ولا هو العقل المصرى من كتر ما شاف من فشل اتبرمج على مقارنه الفاشلين والمستبدين ببعض وبيترحم على الفاشل او المستبد السابق .... شىء بقى غريب جدا فى طريقه التفكير
يا جماعه البلد دى فيها خيرات لا تعد ولا تحصى ، ودوله فيها مقومات انها تقود العالم بأسره ، ربنا وصفها فى كتابه العزيز على لسان سيدنا يوسف بخزائن الارض كنايه عن الخير اللى فيها " قال اجعلنى على خزائن الارض انى حفيظ عليم " بس محتاجين ناس تتقى ربنا ، وتعمل لصالخ الشعب بجد مش ناس همها مصالحها الشخصيه ، وازاى تسرق وتنهب وجايين باجندات لتدمير البلد والشعب ، بصوا على دول تانيه بدءت تجربتها متأخر جدا ، زى الصين فى بدايه الثمانينات وحاليا بقيت فين ، وشوف البرازيل والارجنتين اللى كانت على وشك الافلاس فى 2001 وتركبا من 14 سنه ، واحنا بقالنا اكتر من 60 سنه ماشين من سىء لاسوء ، وللاسف نفس العقليات بتاعه الستينات ما زالت تحكمنا ونفس الكلام يكرر ولا جديد يذكر
اخيرا احب احيل الاستاذ هانى توفيق لمصادر بتتكلم عن عبقريه الاقتصاد فى عهد حسنى مبارك ، يمكن سعادته يراجع رأيه
كتاب "الانهيار الاقتصادى فى عصر مبارك " لاحمد السيد النجار وبالمناسبه ده راجل حبيبهم وكان له برنامج على قناه المخابرات (دريم)
ودى عناوين ، بعض الحقائق على السريع كده نوضح بيهم عبقريه رجال مبارك الاقتصاديه ودى بردوا صحف تبعهم مش اخوان يعنى
http://www.elwatannews.com/news/details/610882
http://www.vetogate.com/1167521
