الحقيقه انا من الناس اللى مش بهتم بتحليل الاسهم ومش بشغل دماغى بيها ، بس شوفت كلام كتير عن سهم القلعه ولما فتحت الشارت لاقيت حاجه مشجعه جدا ، ايشى نماذج كلاسيك واليوت وهارمونيك وحاجه تفتح النفس 😁 ، فكرنى السهم ده بمشاركه كتحليل مالى كنت اتكلمت فيها عن السهم ده العام الماضى، وايامها كانت الهوجه بتاعه ايقاف السهم وتقدير قيمه عادله له اقل من القيمه العادله للمقيم المالى اللى عليه علامات استفهام كتير وشخصيا طلبت بمعاقبته لاسباب مذكوره فى المشاركه ، وكالعاده الناس كلها كانت ضد الراجل المسؤل عن هيئه الرقابه الماليه مع انه خدمهم خدمه كبيره بدل التدليس عليهم من قبل المقيم المالى
بغض النظر عن اللى بيحصل للسهم حاليا لكن سهم القلعه من الدلائل على تكاسل الناس وعدم اكترثها بفلوسها وعدم قيامها بما يجب ان تقوم به وهو محاسبه مجالس الادارات اولا ، وكدليل عملى بسيط على عدم كفاءات الادارات ويجب محاسبتهم هو رأس المال العامل ، وعلى سبيل المثال ، وفى الميزانيه المجمعه عن الربع الاول لعام 2019 للقلعه هتلاقى ان اجمالى الخصوم المتداوله 34.3 تقريبا ضعف الاصول المتداوله 16.4 يعنى فشل ادارى معتبر ونسبه تقريبا تكاد تكون زى ماهى من العام الماضى وده اللى خلى مدقق الحسابات فى الايضاح المتمم رقم 27 يقول فى الربع الاول من عام 2018 ان الشركه تواجه خطر الافلاس وهو تقريبا ما دفع حازم حسن للاعتذار عن مراقبه حسابات هذه الشركه ، طبعا لما تقعد تقرأ فى تفاصيل وارقام الشركه وازاى الاداره بتتباهى بتحقيق 13% ايرادات مجمعه فى الربع الاول 😁 ومش عارف انا ايه علاقتى كمستثمر بالارباح المجمعه او الربح قبل الاهلاكات والضراب والليله دى، لان محاسبيا معروف استخدام الكلام ده عشان تشتغل سورى الزباين وتوحى لهم بان دى تدفقات نقديه داخله للشركه ، زى كده اشتغاله الحكومه فى الفائض المبدئى😁 اللى لما تطرح منه فوائد الديون هيبقى فائض بس من الناحيه التانيه ، انا كمستثمر تقولى صافى الربح كام عشان اقدر اعرف ربحيه السهم بدون اشتغالات كتير ولما تبص على صافى الربح فى الربع الاول 154وبمقارنته مع الربع المقارن من العام الماضى هتلاقيه تراجع من 186 يعنى تراجع بنسبه 17% تقريبا وما زالت الاشتغالات مستمره
- فنيا السهم كلاسيكيا عمل نمط رأس وكتفين مستهدفه تقريبا عند 1.80 وخطوره النمط ان كسر خط العنق تم بجاب دليل على قوه البيع ، اليوتيا السهم حاليا شغال فى موجه ثالثه من Cفى تصحيح زجزاج لاكمال الموجه الثانيه MINORk والتأكيد جه من السقوط الحر للاسعار بهذا الشكل، والجابات الموجوده فى السهم، ومبدئا الموجه دى ممكن تخلص عند 2.40 ، لكن الارتداد لاعلى هيكون مش كبير( تقريبا عند 3) يعنى الجاب الاستمراريه عند 3.10-3.20 مش هيتم اغلاقها حاليا وان كان الترقيم صحيح فاجمالى الموجه التانيه MINOR يخلص فى نطاق 2-2.25 ، واعتقد ان احتمال ضعيف ان السهم يلامس 1.30 كأحد الاحتمالات فى الموجه الزجزاج اذا كانت هى نفسها موجه تانيه ولكن يؤخذ فى الحسبان فى كل الاحوال
