-عايز اقسم المشاركه الى جزئين ، الجزء الاول خاص بتحليل المؤشر بنماذج الهارمونيك ، والجزء الثانى نقدر نقول عليه خاص بالمتاجره وعقليه المضارب المجازف فى استغلال الفرص
- فى الشارت الاول : نموذج " القرش الشرائى" اكتمل بمثاليه كبيره وكانت شمعه المطرقه (TERMINAL BAR)الايجابيه مع الديفرجنس الايجابى الظاهر على مؤشر RSI والذى تاكد باختراق الترند الهابط عند مستويات 13450 تقريبا يؤكدان على اكتمال النموذج والانعكاس لمستهدف رئيسى عند 13750ويجب مراقبه المؤشر عند هذا المستوى لربما يعاود المؤشر الهبوط من عنده وبذلك قد يتحول نموذج الشارك الى نموذج THE5-0 البيعى وبالتالى مواصله الهبوط ، وفى حاله اختراق 13750 لدينا مستهدف اخر يعتمد فى الاساس على الفريمات الزمنيه الكبيره عند نسبه 88.6% من طول الضلع BC عند مستويات 14150(مستهدف ثانوى)
الجزء الثانى
المتاجره لا تخلو من المغامره
- الشارت الثانى : وهو الاهم بالنسبه لى لانه خاص بالمتاجره اكتر من كونه تحليل
لو حضرتك من غير ما تكون بتعرف تحليل فنى و من مجريات جلسه 31/7/2019 هتتأكد من ضعف القوه البيعيه وان القوه الشرائيه هى اللى اخدت زمام الامور وده ببساطه واضح من تعويض 150نقطه داون وكمان مكسب 28 نقطه اب
اللى حصل ده بنسميه فى التحليل الفنى ، SPRING(القفزه) او PROFESSNAL SUPPORT(دعم المحترفين) او حتى تقدر تسميها شمعه الاب ثراست فى الاتجاه العكسى
الحقيقه ان الاسبايك اللى حصل لكسر دعم 13400 كان الهدف منه التخلص من البياع الضعيف والفوليوم اللى حصل لو كان كله فوليوم بيع ما كانش حيحصل الارتداد والاغلاق عند اعلى نقطه فى الشمعه ، وده بيقولنا ان فيه دعم حصل من المضاربين الكبار عشان يمتصوا فوليوم البيع اللى حصل اول الجلسه
شخصيا لما كنت فى السوق قبل كده شمعه المطرقه كانت من احب الشموع عندى للمتاجره معاها وبدون انتظار لتاكيد حتى ولو حصل ان السعر رجع وكسر القاع بتاعها ، فمن وجهه نظرى مخاطرتها محسوبه وبوضوح ، لان تاكيد الشمعه هنا فى منطقه ملغمه بمستويات مقاومه قريبه هيكون صعب ده غير الاراء اللى ممكن تسمعها من نوعيه ده ارتداد تصريفى ، او لازم تتاكد الاول من اختراق مستويات 13500 وكلام كتير عن التاكيد ممكن يضيع منك فرص حتى لو كان كلام صحيح فنيا
البورصه يا جماعه محتاجه لتاجر اكتر من محلل فنى ودى جملتى دايما اللى بكررها ، وطالما قبلت بالتجاره فى اى مجال يبقى لازم يكون لك عقليه التاجر اللى بيستغل انصاف الفرص واللى ذهنيا ونفسيا مهيأ ان الخساره جزء من اللعبه فلما تحصل الخساره مش هيقعد سورى يعنى يلطم وعايز حد يشيله الليله ، لكن هيتعامل ازاى يقلل خسارته ويدخل فى ديل تانى يكسب منه ، التغيير فى السيستم تبعا لمجريات الامور هيفرق كتير ، وافتكر دايما ان اى نظام ناجح مش بينجح عشان فيه مقومات النجاح فى حد ذاته ده جزء لكنه مش الكل بالعكس من مجموع القراءه لنظم اداره الاموال كان القاسم المشترك ان العقليه والسمات الشخصيه كانت هى السبب فى نجاح النظام ، وفى الاخير كلها انظمه من صنع البشر يعنى فيها قصور والنظام المناسب لـ س قد لا يتناسب مع ص
ببساطه لو دخلت اشترى على شمعه زى شمعه المطرقه للمؤشر واتاكدت ان فيها مميزات كتير تخلينى اشترى وبمخاطره قليله ليه ما استغلش الفرصه ! هتقولى انا ما اضمنش السوق وممكن يكون ارتداد تصريفى ، وماله يا سيدى خليه ارتداد تصريفى مانا ببساطه اتاجر مع الكاونتر ترند لحد ما يقولى اتفضل ،ده فيه ناس متخصصه فى المتاجره مع الكاونتر ترند بس ومعرفه نفسها للسوق على هذا الاساس ، اكسب ولو 3%-4% فى كل سهم ولو معاك سهمين او تلاته يبقى الاجمال بتاعك 10%-12% واخرج والمكاسب الصغيره مع تكرارها هى استراتيجيه فى حد ذاتها وافضل من انك تستنى القطر اللى ممكن ما يعديش على المحطه اللى انت واقف عندها 😁
تارجت شمعه المطرقه عند 13575 تقريبا واحنا عندنا تارجت مبدئى عند 13750 لو انت دخلت شارى من نهايه جلسه 31/7/2019 وحبيت تبيع على التسويه عند تارجت الشمعه مافيش مشكله اخرج لو لاقيت السوق بدء يرجع ولو حتى بنصف الكميه ولو حصل تست على قاع شمعه المطرقه ابقى زود الشرا طالما التست ما كسرش قاع الشمعه وهيبقى عندك منطقه دعم قويه جدا لانه ممكن يحصل تست على قاع شمعه المطرقه ووقتها تغير من استراتيجيتك فى انك تزود لمركزك، ولو السوق غدر بيك انت وقف خسارتك تحت قاع الشمعه سهله وبسيطه
طول مانت معاك 4 قواعد ومحافظ عليهم وبتطبقهم صح ودول من وجهه نظرى خلاصه المئات من القواعد فى اداره الاموال واداره المخاطر ، بنسبه لا تقل عن 70% هتكون كسبان اولهم انك تتاجر مع الترند حتى ولو كان ارتداده ، وتانى حاجه انك ملتزم بوقف الخساره ودى الحاجه الوحيده اللى قادره على تصحيح اى خطأ ممكن تعمله فى توقيت الدخول وتالت حاجه انك ما تعاندش السوق ورابع حاجه خلى الطمع والخوف عند حدهم الادنى فى معظم الوقت والالتزام بشكل عام فى حده الاعلى طول الوقت ، وعشان تتغلب على موضوع وقف الخساره انصحك انك وانت وبتشترى تضع امر وقف الخساره مع امر الشراء ولما السعر يصعد ابقى اعمل ترلينج لوقف الخساره عند كل قاع جديد بيتعمل فى الترند الصاعد
