بسم الله الرحمن الرحيم
الحقيقه انا مش عارف ابدء الموضوع ازاى لكن الحاجه يلين رئيس المركزى الامريكى اضافت غموض وضبابيه على المشهد المالى والاقتصادى العالمى بشهادتها امام الكونجرس الامريكى اليوم وحاليا انا وبكتب هذه المشاركه الداو جونز ما يقرب 250 نقطه بعد ما وصل الى 400 نقطه تقريبا وفى تقديرنا الخاص اانه هيروح الى15400 مبدئيا ، وهناك انهيار فى باقى اسواق العالم وعلى العكس الملاذات الامنه زى سندات الخزانه الامريكيه ترتفع بشده والذهب ضرب توقعنا له بالوصول الى 1207 دولار ووصل الى 1260 دولار وربما يدخل منطقه 1280-1360 دولار وربما اذا وصل الى هذه المنطقه فمن المتوقع له هبوط قوى قد يصل به الى منطقه 1265-1205 مره اخرى ولكن الدهب كده كده لازم هينزل حتى ممكن قبل ما يوصل الى المستويات المشار اليها لانه كل مؤشراته بتقول انه وصل الى تشبع شرائى مبالغ فيه(MEGA OVERBOUGHT) وبالتالى لازم يحصل جنى ارباح فيه لكن انا بتكلم عن وضع عام عالمى كنا حذرنا منه فى مشاركه الذهب يوم 4/2/2016 وقلنا ان هناك وضع اقتصادى عالمى متراجع وبعد ما كانت التقديرات بتتكلم عن 3.4% نمو عالمى فى 2016 نزلت التقديرات الى 2.7% وطلع رئيس فرع المركزى فى الامريكى فى نيويورك بيعترف ان رفع سعر الفائده عمل مشاكل كثيره بالنسبه للوضع المالى العالمى ونصحنا وقتها المركزى الامريكى بان يعلن صراحه عن انه مش هيرفع الفائده خلال 2016 او اذا رفعها يرفعها بوتيره بطيئه.
يلين فى كلمتها امام الكونجرس اليوم بتعترف بصعوبه الوضع العالمى الاقتصادى وتأثيره على الاقتصاد الامريكى وان متغيرات الاقتصاد العالمى بتفرض ضغوطا ماليه بخطى اسرع مما يريده البنك المركزى الامريكى طب انتوا يا جماعه بتحضروا العفريت ومش عارفين تصرفوه ، اعتقد من الاول كان باين ان الصين عندها مشكله كبيره وماحدش قادر يتنبأ بعمق هذه المشكله وان البترول فى انهيار وان حركه التجاره العالميه منخفضه والمشهد كله سلبى ماكانش المفروض بقا اجى واكملها برفع سعر الفائده فى الوقت ده
لكن الحقيقه اللى ادهشنى بجد فى كلامها انها بتقول الكلام ونقيضه يعنى هى بتعترف بصعوبه وضع الاقتصاد العالمى واحتمالات الركود فى اى سنه ورغم كده بتطالب ان الجميع لا يقفز الى استنتاجات بشأن الوضع المالى العالمى وما يفرضه على الاقتصاد الامريكى والاغرب انها مش قادره تتوقع سقف زمنى ىوضح استقرار النفط والدولار وما زالت رغم كده بتدافع عن تقديراتها اللى فى اعتقادى ممكن تكون خاطئه
خلاصه كلام الحاجه يلين انها مش عايزه تقول ان الاقتصاد العالمى ربما على مشارف ركود اقتصادى وان الوضع المالى العالمى فى ازمه واحنا شايفين قطاع البنوك تقريبا على مستوى العالم بيحصل فيه ايه وكل ده مش مهم عند السيده يلين المهم نسبه التضخم توصل الى 2% زى ماهما مخططين وانها تخلق كام الف فرصه عمل للامريكان ومش مهم الدنيا تخرب عادى زى ما خربناها هنصلحها ومعانا الفانوس السحرى واحنا اللى بندير العالم
انا عاوزكم تفتكروا كلامى كويس اللى هقوله حاليا لو استمر الوضع على ماهو عليه عادى جدا انكم تشوفوا انهيار اكتر فى الاسواق الماليه قد يدفع مؤشرات زى الداو جونز الى النزول لحدود 14000 نقطه وربما اقل والبترول قد يكسر حتى حدود 20 دولار والذهب قد يصل الى مستوى 1500 دولار وانهيار الدولار الى مستويات 80 نقطه
اما بالنسبه لسوقنا المحروس فوقتها حتى مستوى 4500 نقطه مش هيكون قادر على ايقاف الهبوط
