جلوبال تليكوم على الفريم اليومى ونموذج "خفاش شرائى" اكتمل عند مستوى 1.51 جنيه وبرغم تجاوز مستوى 88.6% وهو المستوى الذى يميز بناء نموذج الخفاش الا ان النموذج اعطى اشاره انعاكس قويه بتكوين شمعه الهاى ويف واكدها بعد ذلك بالاغلاق اعلى 1.62 ثم الوصول الى مستهدفات النموذج المتعارف عليها عند مستويات 1.78 ثم كان من المفترض عند 1.94 لكن اصطدم السهم بكلسترمقاومه عند مستوى 1.90 ووصل الى مستوى 1.91
الحقيقه اننا اتكلمنا قبل كده عن استرتيجيه المتاجره مع نماذج الهارمونيك كخطوات منفصله اعتقد ان هذا المثال هو فرصه جيده لدمج هذه الاستراتيجيه كامله على مثال واحد فالهدف الاساسى من اى تحليل خصوصا الهارمونيك توضيح ليس فقط نقاط الدخول او الخروج للمستثمر ولكن كمان توضيح طرق المتاجره وهى المهاره الاساسيه اللى المفروض يتقنها اى متداول فى البورصه يعنى من الاخر مش انى اقول على اسم النموذج وصدق الله العظيم على كده وانا يمكن اسلوبى قائم على حاجتين الاول انك ازاى تتعلم بطريقه غير مباشره وانى امسكك النقاط الفنيه المميزه اللى ممكن تتوه منك فى الكتب او ما تلاقهاش اساسا والجزء المتبقى فى النقطه دى بيقى عليك انت لان خلاص التعليم بالطرق المباشره انتهى وقته والاساسيات تقدر تتحصل عليها من الكتب يعنى سعادتك لازم برضوا يكون لك دور ، الحاجه التانيه انك تتعلم ازى تتاجر لان اوقات كتير السوق بيكون فيه فرص حتى فى الاتجاه الهابط بس محتاج واحد يعرف يتاجر واعتقد انى قلت قبل كده ان البورصه محتاجه تاجر اكتر من محلل فنى ويا سلام لو جمعت بين الاتنين يبقا انت كده جمعت بين الحسنيين لكن لو مش عارف تتاجر مع الاتجاه وتستغل الموجات التصحيحه لاعلى وتقعد تستنى السوق يغير اتجاهه ويخلص تصحيح او تستنى حد يقولك على ارقام ولو طلعت صح يبقا اعظم محلل ولو متحققتش الارقام تنزل بيه سابع ارض يبقا خدها نصيحه منى اطلع من السوق وشوف حاجه تانيه تتاجر فيها عشان ممكن بالشكل ده تستنى القطر كتير وممكن بطريقه تفكيرك الغلط تكون مستنيه فى مكان غلط وهو خلاص قام من مكانه الصحيح وفاتك القطر
على الشارت لو سعادتك موجود فى السهم فوق 1.90 يبقا كان لازم تخرج من السهم لما تم كسر مستوى 1.90(نفس طريقه الخروج على الدبل توب فى التحليل الكلاسيكى) ولو بتاجر شورت يبقا هتركب السهم من 1.90 الى نقطه اكتمال النموذج وتقفل الصفقه عند 1.51 واللى احنا بنتكلم فيه حاليا اسمه متاجره (Bat Action Magnet Move) وتعرف اختصارا BAMM وهى من انجح المتاجرات مع نموج الخفاش وبتكون سريعه ونسبه نجاحها عالي ولو حبيت تدخل من 1.51 هتدخل دخول عادى بيتقال عليها متاجره لونج لمستهدفين الاول عند 1.78 والتانى عند 1.94 طبعا فى ناس بتأمن نفسها وبتاخد ربحها كله عند نسبه 38.2% من المسافه ما بين النقطه A الى النقطه D(نقطه اكتمال النموذج) اللى هى بتساوى 1.78 فى المثال الحالى لكن الافضل انك تقسم جنى ربحك الى مرحلتين او 3 مراحل يعنى ممكن تجنى ربحك عند نسبه 38.2% (وده ما يشبه القاعده فى جنى الارباح عند النسبه دى فى استراتجيه المتاجره مع الهارمونيك) بنص الكميه مثلا وتنتظر الوصول الى نسبه 61.8% وتجنى باقى ربحك ، طبعا فى اوقات ممكن الصعود يتخطى نسبه 61.8% يبقى الحل انى اراقب السهم لما يقرب منها وانتظر هيكمل ولا يرتد هبوطا لو كمل صعود يبقا هيستهدف 78.6% ثم 88.6% ثم 100% ثم 127% ثم 161.8% ثم 200%.. الخ وهكذا على بقيه نسب الفيبوناتشى وانا معاه محتفظ بباقى الكميه يعنى اسمح للربح انه يستمر بقدر المستطاع وطبعا كل واحد حر فى استراتجيته الملائمه له ورضائه الذاتى بالربح دون ان يتحول الامر الى طمع، و لو السهم تخطى 2.20 صعودا فيه كلام تانى ، طيب ولو السعر ارتد هبوطا؟ وقتها الترند الصاعد المرقم برقم 3(الترند الخاص بتغيير الاتجاه REVERSAL TRENDLINE) كسره هو الخروج وتأمين ربحك وبيتقال على المنطقه دى منطقه جمايه الارباح PROFIT PROTECTION ZONE وطبعا مع كل صعود هترحل نقطه وقف الخساره الى اعلى يعنى ممكن بعد كده مش تحتاج للترند ده اصلا.. اخر حاجه خاصه بالكلام عن الترندات هى فائده الترند رقم واحد ورقم اتنين فى المثال الحالى(الترندات الخاصه بنموذج الهارمونيك لجنى الارباح المبدئيه) ؟ الفايده كبيره طبعا لان الترندات دى المفروض انها بتترسم والسهم فى صعود بعد اكتمال نموذج الهارمونيك (الترندات دى بتترسم من النقطه A او C) يعنى بتبقى مناطق مقاومه وهميه عشان نبنى كلتسر مقاومه بالتقاء كل من الترندات دى مع نسبه 38.2% من AD ونسبه 61.8% من AD وبنتوقع ان السعر بيكون له رد فعل مع مناطق المقاومه الوهميه دى يعنى ممكن يحصل زى ماحصل فى المثال الحالى انه السهم تراجع لما اصطدم بكلستر المقاومات دى عند النسبتين وبالتالى اقدر اخد قرار وقتها بجنى الربح عند 1.78 واستنى اشوف حركه السهم وفى حاله التراجع العادى اخده تانى من تحت او انتظر اختراق الترند رقم 2 لاعلى واقدر اركب السهم مره تانيه او يعتبر نقطه دخول لمن فاته الدخول عند 1.51 لحد على الاقل 1.90 ونفس الكلام عند الترند رقم واحد اختراقه لاعلى بيمثلى فرصه تالته للدخول لمستهدفات اعلى على تصحيحات الفيبوناتشى وربما فى بعض الاحيان بتكون منطقه AC هى المستهدف القادم بعد تجاوز نسبه 61.8% طيب يا ترى النموذج بالشكل ده وبعد ما وصل الى 1.91 ممكن يفشل؟ اه ممكن وده فى حاله الارتداد الهبوطى وكسر مستوى 1.51 لاسفل وكمل هبوط لان من المفترض هنا ان النموذج بيكون عاكس للاتجاه الهابط لكن ممكن يكسر 1.51 هبوطا ويرتد بعدها لاعلى بسرعه هنا يبقا النموذج شغال، طيب وانا هاعرف امتى انه عكس الاتجاه الهابط لما يخترق لاعلى مستوى 2.20
لاحظ ان الانعكاس الصحيح للسعر غالبا ما بيكون زاويه الترند له بتكون حاده يعنى منحدره لاسفل او لاعلى بزاويه حاده وبيكون استمرار السعرفيه سواء فى الصعود او الهبوط واضح بشكل حاسم وحركه السعر فى الارتداد بعد اكتمال النموذج لو اخدت الشكل العرضى بيكون ده مؤشر مبدئى على فشل الانعكاس وبالتالى فشل النموذج وانت مش مطالب بقياس زاويه الترند قياس فعلى لكن ممكن بمجرد النظر تعرف ده وهنا خط الترند رقم 3 الخاص بالانعكاس زاويه صعوده قريبه من درجه 45 اللى هى نقطه التوازن فى السوق زى ما قال وليام جان يعنى زاويه 45 دى وحده السعر بتتحرك عليها مع وحده زمن1:1 بمعنى ان فى زاويا عند جان تحرك السعر فيها بيكون اسرع وده اوقات بيفسر لنا تسارع الاسعار صعودا او هبوطا مع الزمن وفى زاويا تانيه حركه السعر عليها بتكون بطيئه بالنسبه للزمن وده نبقا نتعرض له لما نتكلم عن مروحه وليام جان ان شاء الله عشان كده مهما السوق صعد اوهبط لابد انه يعود لنقطه التوازن دى
بالنسبه للنماذج البيعيه اللى على شكل Wنظام المتاجره مش هيختلف كتيرعن النماذج الشرائيه اللى بيكون النموذج فيها على شكل M(المثال الحالى) بمعنى انك هتدخل شراء لما يتم اختراق القمه اللى بين القاعين لحد نقطه اكتمال النموذج (نفس طريقه الدخول على الدبل بوتوم فى التحليل الكلاسيكى) ونفس الموضوع للشورت سيلنج هتدخل من نقطه اكتمال النموذج والمضاربه على الهبوط لنفس نسبه 38.2% و61.8% من الضلع AD ولكن فى الاتجاه الهابط والفرق الوحيد بس لو السهم لف وطلع يبقى هنا تسحب فيبوناتشى من نقطه اكتمال النموذج لحد القاع اللى ارتد منه صعودا وعند نسبه 38.2% تقفل صفقتك
بالنسبه لوقف الخساره على نماذج الهارمونيك احنا وضحنا بعد اكتمال النموذج ازاى تحمى ارباحك بكسر الترند الصاعد لكن انت لو داخل فى متاجره عاديه هتشترى بعد ما النموذج اكتمل عند 1.51 وبدء يرتد صعودا والسهم نزل بيك مثلا قبل التسويه هتعمل ايه؟ عند اقرب دعم تحت 1.51 وقف خسارتك يعنى ممكن عند 1.47 او 1.44 ماهو 1.51 هى فى الهارمونيك اسمها منطقه الانعكاس المحتمل وطالما السعر تجاوزها يبقى لازم اوقف خسارتى دى قاعده فى الهارمونيك طيب واللى داخل شورت عند 1.90هيعمل ايه ؟ لوافترضنا ان السهم بدل ما يهبط غير رايه وصعد هنا عند اول مقاومه تقابله يقفل صفقته مش لازم يستنى ان السعر يخترق اعلى قمه وفى النماذج البيعيه اللى بتكون على شكل W بيكون وقف الخساره فوق عند اول مقاومه اعلى منطقه اكتمال النموذج
اعتقد اننا كده غطينا تقريبا طرق المتاجره مع الهارمونيك وقدمنا شرح ازاى تتاجر مع الهارمونيك اثناء تكوين النماذج لحد نقاط اكتمالها (الفعل) وبعد اكتمال النماذج والانعكاس(رد الفعل) صحيح ممكن الموضوع يكون تقيل شويه وعايز شغل وان المشاركه لظروف الشرح طولت بس اعتقد اللى هيركز فيها هيستفيد جدا ويقدر يلاحظ الفرق بين وضعه قبل تنفيذ الاستراتجيه دى وبعدها ويا ريت تربط مع الكلام ده المشاركه اللى اتكلمنا فيها عن اداره الاموال وحاول انك تمشى واحده واحده اعتقد مع التمرين و الاتقان هتكون بروفشنال واخطائك هتقل كتير ومش هتكون معتمد على حد بما فيهم انا
بالنسبه للمؤشر العنوان اللى هيتحط بتاع كل مره لو السوق كمل هبوط "القلق من تباطؤ النمو العالمى وانخفاض اسعار البترول"عموما شكل الشموع فى المؤشر والقياديات بيقول انه فيه هبوط بنسبه مرجحه على الاقل جلسه الاتنين 8/2/2016 لكن اللى يهمنا فى الموضوع حاليا انه ما يكسرش دعم 5900 اللى اتكلمنا عليه قبل كده عشان يحتفظ المؤشر بالاتجاه الصاعد قصير المدى وبالتالى استهداف منطقه 6300-6500
