بسم الله الرحمن الرحيم
- تيلكوم للاعلام والتكنولوجيا على الفريم اليومى وموجود اكتر من نموذج هنعرف مستهدفات النماذح دى واهميه مستويات معينه لاتخاذ القرارات الصحيحه والشارت يعتبر حاله تعليميه جيده وشخصيا مش عاوز اخوض فى خبر الصراع بين ساويرس او بالاحرى اللى مشغلينه وبين الحكومه للاستحواذ على سى اى كابيتال لان مش ده المهم... المهم فى الموضوع ان اخوانا بتوع التوصيات ما يعملوش فيلم على خبر زى ده ويبدئوا يدخلوا ناس على اساس ان ساويرس هيمتلك مفاتيح البورصه ومستقبل مصر السياسى وان خبر زى انسحاب البنك الاهلى من الصفقه هيكون ايجابى ويتعمل فرح بقى لكن نخلى بالنا ان الاخبار فى حد ذاتها لها تحليل يعنى لازم اسئل نفسى ليه دايما مثلا الاخبار السيئه بتتقال عند قمم و السوق شكله ايه وقت ظهور الخبر ولو انا كمستثمر فى السوق هستفيد ايه من الخبرولو انا بره السوق هستفيد ازاى منه لازم اسئل نفسى الاسئله دى قبل ما اخد قرار لان معظم الاخبار مش بتكون حقيقيه ووراها محترفى التداول اللى بيكونوا عارفين رد الفعل النفسى عند الناس وبيكونوا محضرين نفسهم كويس جدا للخطوه القادمه واخر حاجه فى النقطه دى انك لازم تعرف ان تأثير الخبر لحظى وكفاعده عامه كده عمر الاخبار ما تغير فى اتجاه حركه السعر الاساسي يعنى الخبر اخره يأثر على اتجاه الاسعار فى المدى القصير ومش ابعد من كده لكن فى المدى المتوسط او الطويل لا انسى .. هو مش مسلسل تركى يعنى ومقوله بيع على الخبر اقدر اقول انها صحيحه فى معظم الاحوال
- بالنسبه للسهم فى المدى القصير بنى لنفسه مقاومه عند 60 قرش وواضح من شكل الشموع والاسبريد بتاعها والفوليوم عند الحد العلوى لاول نموذج معانا وهو الرايه الموجوده على يمين الشارت ان المحترفين تقريبا رافعين ايديهم عن السهم ومافيش رغبه حقيقه بالصعود بالسهم واختراق الحد العلوى للرايه... ربما يكون لسه فيه تجميع فى السهم وانهم عاوزين يجمعوا فى اسعار اقل من كده وتقريبا اخر شمعه فى جلسه الامس الملامسه للحد السفلى للرايه وضح منها ترجيح اللى بقوله لان اخر شمعه هى شمعه الاب ثراست والفوليوم عالى جدا فيها وكنا اتكلمنا عنها قبل كده وقولنا ان دى شمعه خطيره فى قرائتها وانها شمعه دخول المحترفين وشغلهم بيكون واضح فيها عن طريق رفع السعر فى اول الجلسه والسهم يعمل هاى جديد عن اليوم اللى قبله وبعدين يحبسوا الناس فوق وفى اخر الجلسه بنزلوا بالسهم لقرب اقل سعر جابه وبالمناسبه الشمعه دى موجوده بشكل واضح فى التجارى الدولى وطلعت مصطفى وطبعا محتاجين تاكيد فى جلسه اليوم ... طيب يا ترى لو تم كسر الحد السفلى للرايه عند 54 قرش ده يقلق حد موجود فى السهم ! ابسلوتلى خليهم يتسلوا فى المنطقه من 54-50 زى ما هما عاوزين وهنعرف ليه فى السطور القادمه
- تانى نموذج وهو الاهم نموذج رأس وكتفين محتمل مكمل للاتجاه ما زال فى طور التكوين يكتمل بالاغلاق تحت مستوى 50 قرش لمستهدف قد يصل الى 27 قرش طيب هو المستهدف ده ممكن يتحقق؟ يتحقق فى حاله ان السوق قلب وشه بجد وحصل نوع من البانيك وخلى بالك ان نموذج الراس والكتفين فى حال تحققه هيكون مكمل للاتجاه الهابط و ممكن يتقلب لنموذج تجميعى... ...ازاى؟ بان السهم قبل ما يكسرمستوى 50 يلف ويرجع تانى ويكمل صعود او حتى بعد ما يكسر 50 يعمل بولباك ويصعد يغلق فوق 73 قرش ووقتها ممكن نشوف احلى رالى فى السهم
- لاحظ ان الهبوط الحاصل من من قمه 73 قرش الى قاع 50 قرش ده اسمه القدم الاولى لنموذج هارمونيك AB=CD شرائى وان الصعود من 50 الى 61 قرش ده الارتداد الصعودى اللى من قمته بدءت القدم الثانيه للنموذج واللى ممكن تكتمل عند منطقه 36-38 ولو كسرها يبقى المستوى المرجح هو 32 قرش.تقريبا بس ده مرهون بشرط وهو كسر مستوى 50 قرش ووقتها لازم تطبق متاجره BAMM وتخرج من السهم (لاحظ ذكرنا مستوى 50 قرش كام مره؟ )
- لما قلنا خلي المحترفين والناس اللى بتقود السهم يلعبوا فى منطقه 54-50 لانى انا كمستثمر مش هاخد اى اكشن الا بكسر مستوى 50 قرش وحط 200 خط تحت كسر مستوى 50 قرش لان كسر المستوى ده ممكن يفتح ابواب جهنم على السهم
- يا ترى وجود نموذج الرايه على الشارت استفدنا منه؟ الحقيقه مافيش استفاده فنيه منه فى تحديد مستويات ممكن يرتد منها السهم لكن الاستفاده الكبيره منه انه حاله تعليميه تعرف من خلالها ازاى صانع السهم بيفكر وبالتالى تكون محضر نفسك ذهنيا ونفسيا للقادم لان معظم الوقت تقريبا الناس بتتفاجىء بللى بيحصل ومش بتكون محضره نفسها والضغط النفسى الواقع وقتها على المستثمر بيكون كبير وبالتالى بياخد قرار انفعالى تحت احساسه بالخوف والعقل المشوش ويرمى اسهمه بأى سعر ويلاقى بعدها ان السهم ارتد وده اللى ممكن يحصل لو واحد اشتغل على نموذج الرايه بس وماعرفش يقرء باقى الشارت او يقرء تحرك اللى ماسكين السهم وبالتالى هيكون قراره متسرع بالخروج بعد كسر مستوى 54 وممكن يلاقى بعدها السهم عند 50 قرش بيرتد صعودا لكن فى نفس الوقت ده مش سبب انى املى الشارت بنماذج واداوت تحليل وخلاص وبدون هدف ده اسلوب مرفوض شكلا وموضوعا وهتكعبل نفسك وتكعبل غيرك بدون سبب... لازم اكون عارف ومخطط انا عايز اقول ايه للناس وايه الهدف منه وعلى اساسه ياستخدم الادوات اللى تساعدنى فى كده وانا هنا دمجت نموذج كلاسيكى زى الرأس والكتفين ونموذج هارمونيك عشان نأكد اهميه مستوى 50 قرش وانه ده مفتاح الشارت حاليا لان استخلاص نتيجه واحده من دمج اسلوبين مختلفين او نموذجين مختلفين بياكد اهميه النتيجه اللى تم التوصل اليها سواء كان مستهدف او نقطه محوريه على الشارت ولاحظ ان مستوى 50 قرش اتكلمنا عنه قبل كده فى مشاركه بتاريخ 21/12/2015 وحددنا بعدها مستهدف صاعد للسهم عند 68 قرش ثم 84 قرش والسهم وقتها وصل الى مستوى 73 قرش
- دايما راقب الفوليوم وراقب العروض والطلبات وفين بتتحط البلوكات الكبيره على الطلبات والعروض وده هيساعدك انك تعرف التصريف والتجميع فى السهم واذا كان البيع او الشراء فى السهم ده شغل افراد ولا شغل محترفين
