نزل ايجاز للبيت الابيض من شويه فى تعليقه على جلسه البانيك للاسواق الامريكيه ليوم الاربعاء بيتكلم فيها بلطجى امريكا ان السبب فى التصحيح ده هو البنك الفيدرالى ورفعه لاسعار الفائده ، ونسى ان تقريبا يوميا لازم يطلع بتصريح يمارس بيه هوايته فى البلطجه على دول العالم
شخصيا انا من الناس اللى بكره اى رئيس يتدخل فى السياسه النقديه لبلاده من امثال ترامب واردوجان ، خصوصا ان الاتنين خلفيتهم الاقتصاديه بعافيه شويه
الباشا نسى ان شهر سبمتبر واكتوبر تاريخيا بيكون فيهم ذبذبه عاليه فى السوق الامريكى الا قليلا ، ونسى كمان ان تصريح صندوق النقد الدولى وتخفيضه للنمو العالمى مبنى تقريبا على اثار الحرب التجاريه بين امريكا والصين(يعنى بسببه) وان الاصول الماليه والعقاريه خصوصا فى امريكا تعتبر مرتفعه (بدايه لحظه منيسكى)
حضرتك من غير ما تتعب نفسك فى المقارنه بين اهتمام الحكومه الامريكيه بالسوق الامريكى وبين اهتمام الحكومه المصريه بتوفير سجون زياده وده عشان حل مشكله الاسكان 😁 احب افكرك ان نسبه المتعاملين فى السوق الامريكى قبل ازمه 2008 بلغت 63% وانخفضت النسبه الى 53% حتى 2015 ومن المرجح انها ارتفعت تانى مع 2016 ، طيب يا ترى حضرتك هنا نسبه المشتغلين فى الصناعه دى كام ؟ ده ان كان الدوله بتبص لها على انها صناعه مش كازينو قمار 😉
حاجه تانيه برضوا عشان ما تتعبش نفسك ، يا ترى قطاع السياحه المفروض انه قطاع حيوى ومصدر رئيسى للعمله الاجنبيه تقدر تقولى ايه هى الخطوات الفعليه والاهتمام الحكومى لزياده اعداد الوافدين من السياح ؟ مع ان اقصى رقم وصلتله مصر كان 12 مليون سائح ايام حسنى مبارك ودويله زى كتالونيا فيها 18 مليون سائح سنويا وخد بقى التقيله ان دوله تشوفها نقطه على الخريطه ومع احترامنا لها محافظه القاهره اكبر منها وهى دوله الامارات اعداد السياح بيصل الى 21 مليون سنويا ، واحنا عندنا كنوز فى كل القطاعات وماحدش بيسئل عنها وحضرتك بتصرخ وتزعق كل يوم فين الدوله والاهتمام بالبورصه
ده حتى الكوره اللى 70% من الشعب مهتم بيها الدوله مش عارفه تديرها ولا حتى تستفيد منها ولا حتى تنظم ماتش فيه جمهور، وجايين فى الاخر عايزين الدوله تهتم لامر البورصه ايه البذخ اللى انتوا فيه ده ، الدوله المصريه مشغوله بما هو اهم ،مشغوله ازاى تفتش فى جيوبك اكتر لحد ما تقلعلك اللى..... وكتير ناس خلاص قلعت 😁
عموما نرجع للداو وما زلت برجح النظره الايجابيه بالرغم من الداو كسر القناه الصاعده متوسطه الاجل وظهر نموذج رأس وكتفين(ضعيف نسبيا) واعتقد ان الداو ممكن يصل الى منطقه 25200-25400 ، وكل السيناريوهات الاليوتييه ترجح النظره الايجابيه حتى الان ويكفى وجود المثلث كموجه رابعه او حتى لو كانت الموجه الرابعه زجزاج وكانت الاولى من الخامسه على شكل قطريه اماميه فالموجات التى تعقب الشكلين موجات قويه وممتده وطول ما الداو اعلى مستوى 24000 مافيش خوف ، والاثر على باقى الاسواق بالتاكيد هيكون سلبى خلال الجلستين الاخيرتين من الاسبوع لحد ما تعود الثقه تانى للناس ويطمنوا ان ده جنى ارباح مش بدايه لتصحيح كبير ، من وجهه نظرى مرجح حدوثه خلال 2019-2020
