شىء طيب جدا انك تسمع معلومه عن انخفاض العجز التجارى بنسبه 37% بعد 8 شهور من 2017 ، لكن كان فيه بعض الملاحظات اللى بشوفها مهمه فى التعليق على الانفجراف الموجود ، وهى انه ما زال نمو الصادرات بعيد جدا عن الارقام المستهدفه بعد التعويم عشان تشعر بقيمه التعويم فعلا لعملتك ، فنمو الصادرات الغير بتروليه بنسبه 11% يعتبر رقم بعيد عن نسبه الانخفاض فى قيمه عملتك وده رقم مهم بالنسبالى باعتبار اننا دوله مش بتروليه ، وصحيح انك مش هتحقق النسبه دى من اول سنه للتعويم لكن كان على الاقل تبقى نسبه الزياده لا تقل عن 20% فى ظل انك تمتلك ميزه نسبيه حاليه ربما لن تتوفر فى قادم السنين اذا حصل ان الدولار اخد اتجاه نزولى امام عملتك وبالتالى ممكن تفقد بعض من مزايا الانخفاض النسبى لاسعار صادراتك ، عشان كده قلنا سابقا ان التعويم لوحده مش كفايه ولازم اولا اوجه اولوياتى فى الانفاق نحو دعم القطاعات التصديريه زى قطاع الاسمده والكيمياويات اللى كنت اتكلمت عنه قبل كده فى دعم الطاقه له ممكن تخلق لنا فرص تصديريه بنحو 3 مليار دولار فى السنه وحسب الانفو جراف الحالى يعتبر من افضل القطاعات التصديريه ، وتانى حاجه الاهتمام باصلاح الجهاز الانتاجى فى مصر سواء بالتحديث التقنى لمعداته او بتدريب العماله المصريه
الحاجه المهمه هنا ان انخفاض الواردات لاز يقابله زياده فى الصادرات بنفس نسبه انخفاض هذه الورادات ولو تجاوزنا هذه النقطه ، فهناك نقطه اهم من وجهه نظرى وهى هل كفاءه الجهاز الانتاجى فى مصر قدر يعوض انخفاض الواردات ؟! بالتأكيد لاء، لان من مشاكلنا الكبيره فى مصر هو نقص الانتاج الحقيقى اللى راجع اما لتوجهات سياسيه او للفساد او لتهالك انظمه التشغيل والانتاج وبعدها عن التحديث التقنى واسلئوا قطاع الغزل والنسيج او لعدم تدريب العماله المصريه تقنيا ، الحقيقه ان عدم كفاءه جهاز الانتاج المصرى فى تعويض الواردات بيخلق تضخم فى حد ذاته ، فثبات المعروض من السلع والخدمات ومع توافر سيوله فى جسد الاقتصاد يخلق نوع من التضخم اسمه تضخم طلب وهو ما يعبر عنه اقتصاديا " ان نقود كثيره تطارد سلعا محدوده" وحتى وان كان المركزى المصرى بيشتغل على انه يلم السيوله من السوق باجراءات من وجهه نظرى فاشله لانه هو -البنك المركزى - سبب رئيسى فى وجود السيوله دى طالما ماكينه طبع النقود شغاله بدون غطاء سلعى او خدمى
اعتقد ان فقه الاولويات فى مصر غير موجود فبدلا من الصرف الهلامى على العاصمه الجديده وبميزانيات مفتوحه فالاولى لمصر ان تعيد تشغيل المصانع العاطله والتى يبلغ عددها تقريبا اكثر من 5000 مصنع وحتى الشركه التى ازمعوا انشائها وهى شركه مصر لرأسمال المخاطر المنوط بيها حل للشركات والمصانع المتعثره ما زالت لم تظهر الى الوجود بسبب الروتين ، فان كانت مصر جاده فى الاصلاح الحقيقى فعليها توجيه النفقات الى ما يصلح الانتاج الحقيقى واوله انتاج السلع الرأسماليه بدلا من الانفاق الترفى الذى لا عائد منه اقتصاديا فأى نفقه فى المفهوم الاقتصادى لابد لها من عائد اقتصادى والا تصبح خساره ، حتى لا نتفأجا بعد ذلك ان العاصمه الاداريه كانت لرفع الروح المعنويه زى تفريعه القناه الجديده
للمره المليون لو عايزين نهضه حقيقيه بجد لابد اولا من اصلاح المناخ السياسى عشان تقدر تجذب استثمار مباشر حقيقى فأول حاجه بيسئل عنها المستثمر الاجنبى هو المناخ السياسى والهدوء ثم بيئه الاستثمار نفسها فبدون حلول سياسيه اولا وتحسين مناخ الاستثمار ثانيا - اللى للاسف مصر فيه من اسوء 20 بيئه استثماريه على مستوى العالم - لن يكون هناك تقدم ملموس
