المؤشر السبعينى على الفريم الاسبوعى وتحليل موجى ، ومن المشاكل اللى بتقابل اى حد بيحلل موجى للمؤشر ده انه بيبدء تحليله من قمه 1253 وبيتناسى الترند ما قبلها وبما ان المؤشر بادىء من بدايه 2008 فالجزء الصاعد يعتبر جزء من ترند صاعد قبله زى ماهو موضح بالاسهم وبالتالى كقاعده تقدر تتعلمها ، ان اى شارت البيانات فيه مش كامله تقدر من خلال اول موجة تصحيحيه داخل التصحيح الكبير تحدد الدرجه اللى السهم او المؤشر بيصحح عليها، وكمثال عملى على كده قدرنا من خلال الموجه المظلله وهى الموجه A وكانت فترتها الزمنيه 10 شهور ومن خلال معرفتنا بالدرجات هنلاقى ان درجه هذه الموجه هى الدرجه المتوسطه (INTERMEDIATE) ، اللى فترتها الزمنيه من اشهر الى ارباع وبما ان زمن الموجه دى 10 اشهر يعنى اكتر من شهرين واكتر من ربعين يبقى احنا كده قدرنا نتعرف على درجه الموجه ، ولو كانت خماسيه يبقى كل خمسه موجات هتنقلنا للدرجه الاعلى منها ولو كانت ثلاثيه يبقى عند اكتمال 3 موجات (A-B-C او WXY) هتنقلنا للدرجه الاعلى منها ، والموجات الفرعيه المكونه للموجه دى هتكون على الدرجه الاقل
نقدر نرجع الترند الصاعد ده لبدايه اعاده البورصه للعمل عام 1993 زى ما حصل مع المؤشر الثلاثينى وبما ان الموجه من 1993-2008 حوالى 15 سنه يبقى احنا بنتكلم عن فريم السيكل والطريقه الاولى اللى اتكلمنا عنها تقدر تحدد بيها اى درجه على اى شارت ما تعرفش بيانتها بادئه من امتى زى للعملات مثلا ، لكن هنا الموضوع ممكن يكون اسهل بما اننا عارفين تاريخ اعاده العمل للبورصه ، و هنا افترضنا ان الترند السابق هو موجه اولى سيكل والتصحيح من قمه 1253 عام 2008 الى قاع 324 عام 2016 هى الموجه الثانيه سيكل ، واعتقد ان تصحيح استغرق 8 سنوات كافى جدا للترند السابق خصوصا وان الموجه دى تعتبر موجه دبل زجزاج يعنى تصحيح حاد والتصحيحات الحاده مش بستغرق زمن كبير، كمان الموجه دى ارتبطت مع الموجه الاولى زمنيا باحد نسب الفيبوناتشى وهى 50%
الموجه الثانيه جاءت على شكل موجه مركبه دبل زجزاج WXY انتهت الموجه W منها عند قاع 372 والموجه X انتهت عند قمه 672 واخير الموجه Y عند قاع 323 وبدء المؤشر السبعينى فى تصحيح الموجه الثالثه سيكل على الفريم الكبير التى من المرجح لها ان تستمر اكثر من 20 عام اذا ما كان هذا التحليل صحيح
منذ قاع 2016 والمؤشر يسير فى قناه صاعده وانتهى من تكوين اول موجتين على فريم MINOR وكما قلنا ان اول موجه هى من رسمت الدرجه التى يصحح عليها المؤشر ، فقد استغرقت الموجه الاولى من اسابيع الى ربع سنه ، وحاليا المؤشر يبنى فى الموجه الثالثه MINOR والتى جاءت ممتده ، والامتداد هنا واضح من الصعود الحاد للموجه ومن الموجات الفرعيه بداخلها والتى كانت سببا فى هذا الامتداد ، واذا افترضنا صحه هذا السيناريو فتحديدا المؤشر انتهى من الموجه الثالثه على فريم MINUTE (اللون الموف) وبالتالى التصحيح الحالى للمؤشر هو الموجه الرابعه الهابطه على نفس الدرجه ، ومش عايز ازعج الناس ان تصحيح الموجه دى من المفترض انه ينزل لحدود الموجه الرابعه الاقل درجه يعنى مستويات 700 نقطه ، لكن على الاقل ممكن نشوف الموجه دى عند مستويات 740-750 نقطه والاحتمال يتلغى فى حاله اختراق القمه الحاليه عند 827 نقطه
من وجهه نظرى الشخصيه ان نتائج الشركات للفصل الثالث من هذا العام هو من سيحدد اداء المؤشر فى الفتره القادمه وزى ما قلت قبل كده وبكرر تانى انسوا موضوع اللائحه التنفيذيه ده فاثر هذا الخبر اتاخد فى الصعود الماضى منذ الاعلان عن قانون الاستثمار
