استراتيجيه بسيطه للتداول فى الاسواق الماليه

بسم الله الرحمن الرحييم

• كلامنا النهارده على استراتيجيه بسيطه للتداول يقدر اى حد مبتدء فى التحليل الفنى ينفذها بسهوله وانا شايف انها استرتيجيه رغم بساطتها الا انها تنفع اى مستوى فى التحليل الفنى 
• ببساطه الاستراتيجيه اسمها شراء التراجعات فى الترند الصاعد وبيع الارتدادات فى الاتجاه الهابط ، الاستراتيجيه دى اتكلم عنها جى ويلس ويلدر فى عام 1978 فى كتابه مفاهيم جديده فى انظمه التداول المتخصصه وبعد كده طور الاستراتيجيه دى اندرو كاردويل بانه ربط  الاستراتيجيه دى بمستويات معينه على مؤشر RSI ، والعبد لله اضاف بعض الاضافات التى ربما تكون مساعده بشكل ما فى تطوير هذه الاستراتيجيه

شرح الاستراتيجيه

• فى الاتجاه الصاعد لابد من حدوث تصحيحات ثانويه سواء كانت قصيره الاجل او متوسطه الاجل ، ببساطه كده تقدر انك تشترى فى الترجعات دى  وطول ما الاسعار بتصعد تقدر انك تضيف لمركزك الشرائى عند اى تراجع ، السؤال الاهم هنا امتى اعرف اشترى وازاى اعرف ان التراجع انتهى و نفس السؤال فى الاتجاه الهابط امتى اعرف ان الارتداد لاعلى انتهى وبالتالى اقدر ابيع ؟!

ده اللى طوره اندرو كاردونيل بانه قال عاده التراجعات دى تقدر ترصدها على مؤشر RSI بالوصول الى مستويات 40-50 على المؤشر بحيث انك تشتغل على الدعم الاقل عند خط 40 وقت الشراء فى الترند الصاعد ، وفى الترند الهابط انك تستغل البيع فى الارتدادت التصحيحيه لاعلى ورصد الكلام ده على مؤشر RSI بوصوله الى منطقه 50-60 بحيث انك تبيع عند المقاومه الاقل عند خط 50 ، وبكده تقدر انك تعيد الشراء فى كل مره عند المستويات المذكوره  فى الاتجاه الصاعد وكذلك انك تبيع فى الاتجاه الهابط  عند المستويات المذكوره ايضا والكلام ده موضوع على الشارت بالدوائر ، طبعا مش عايز اذكر الناس ان الكلام ده مش قرأن لازم يحصل بس هى وسيله بسيطه للتداول وانا شخصيا اضفت حاجتين من عندى مش هعتبرهم تطوير للاستراتيجيه دى لكنها اضافات ممكن تساعد اكتر فى تحديد صحه قرارات الشراء او البيع

• انا اشتغلت على حوالى 25 شارت وده للتنويه ممكن ما يكونش عدد كافى للحكم لكن ممكن نعتبره مؤشر على احتماليه الوصول الى نتائج صحيحه بنسبه لا تقل عن 70% 
• انا اضفت الى الاستراتيجيه دى تصحيحات الفيبوناتشى ومن خلال الملاحظه والتجربه لاقيت عشان نوصل للمستويات اللى ذكرها اندرو كاردويل غالبا لازم التراجعات دى تصل الى نسبه 50% من تصحيحات الفيبوناتشى فى الاتجاه الصاعد ، وكذلك فى الارتدات لاعلى فى الاتجاه الهابط وربما تصل الى نسبه 61.8% فى بعض الحالات القليله يعنى تقدر تقول ان نسبه 50% هى العامل المشترك فى الاتجاهين والاكتر ترجيحا للوصول اليه ، والاضافه التانيه هى الشموع اليابانيه ، وبالتالى حضرتك انت وشغال بالاستراتيجيه دى ، اول ما يحصل تراجع فى الاتجاه الصاعد تشد فيبوناتشى عادى من اخر قاع ارتدادى الى قمه الموجه وتنتظر التراجع ده يخلص عند غالبا نسبه 50% مع ملاحظه مناطق 40-50 على مؤشر RSI وبعدها تدور على الشموع الارتداديه من  نوعيه المطرقه مثلا  او الابتلاع الايجابى او الهرامى وشخصيا بفضل الشموع الثنائيه فى الحاله دى سواء الهرامى او الابتلاع الايجابى او قاع تويزر او غيرها ، ونفس الموضوع فى الاتجاه الهابط  ، تقدر تشد فيبوناتشى عادى من قمه اخر موجه الى قاع الموجه الحاليه وتنتظر نسبه 50% فيبوناتشى وتراقب مستويات 50-60 على مؤشر RSI مع مراقبه نوعيه الشموع المتكون الانعكاسيه سواء كانت الرجل المشنوق او الابتلاع السلبى او الهرامى البيعى وخلافه وتقدر طبعا تشتغل بالاستراتيجيه دى بالادوات البسيطه على RSI زى ما طورها اندرو او تضيف الحاجات اللى  انا اضفتها حسب استيعابك للموضوع ، وكما تقدر تفيدك الاستراتيجيه دى فى الاستغناء عن الشورت سيلنج فى الاتجاه الهابط وتتحرى الحلال ، وتقدر تحقق مكاسب كويسه لو قدرت تلتزم بوقف خسائر معقول وقدرت تنفذ الاستراتيجيه دى 
• وجهه نظرى الشخصيه انك لازم عند نسبه 38.2% فيبوناتشى يكون لك تدخل معين سواء ببيع جزء من المحفظه فى الارتداد لاعلى اثناء الترند الهابط  او شراء بجزء من محفظتك ولو نسبه بسيطه عند التراجعات اثناء الترند الصاعد
• ان شاء الله ربنا ييسر الامور لكل مستثمر تجارته حلال فى الاسهم  ويتوب على اى مستثمر دخل الحرام فى فلوسه  ويهدى القائمين على البلاد والقائمين على البورصه المصريه لما فيسه مصلحه العباد والمستثمرين