بسم الله الرحمن الرحيم
مناسبه ان بعض الاخوه الافاضل اللى بيتكلموا فى التوصيات وبيدعموا توصايتهم بالشق المالى ، الحقيقه ان ده تفكير ممتاز جدا ولازم يكون ده المنهج فى التوصيات لان اى توصيه لازم تجمع بين التحليل الفنى والتحليل المالى ، وكمان لازم اعرف انا بوجه توصياتى دى لمين ، يعنى مين الفئه المستهدفه منها سواء المضارب مثلا او المستثمر متوسط الاجل ولا طويل الاجل
لكن مع احترامى شوفت ناس بتتكلم عن التحليل المالى وحصرته بس فى الكلام عن مضاعف الربحيه وبقى فيه شىء من التزيين للناس بان سهم مضاعف ربيحته مثلا 6 مرات او 7 افضل من سهم مضاعف ربيحته 15 مره او 20 فكده يبقى سهم ممتاز وفرصه وكلام كتير من هذا القبيل
اعتقد انا وضحت قبل كده ان مضاعف الربحيه استخدامه بمفرده هو رقم مضلل ، لان ببساطه مضاعف الربحيه ليس له امتداد مستقبلى ولا يعكس الصوره الحقيقه للشركه مستقبلا ، واى مستثمر يهمه المستقبل وليس الماضى ، فالبيانات التاريخيه عن الشركه لا تعنى المستثمر فى شىء غير انه ياخد فكره عامه عن اداء الشركه ، لكن انا بستثمر فلوس عايز عليها عائد منتظم ، يبقى كلمنى سعادتك عن توسعاتك المستقبليه وهتمولها ازاى ، ويا ترى توسعاتك دى بشكل افقى ولا انت بتتوسع بشكل رأسى ، كلمنى عن نمو مبيعاتك واستقرارها وبالتالى نمو ارباحك واستقرارها ، ويا ترى انت بتشتغل باستراتيجيه نمو المبيعات وقادر على اجتذاب اسواق جديده والوصول الى عملاء جدد ولا انت بتشتغل باستراتيجه تخفيض تكلفه المبيعات عشان تحافظ على نمو ارباحك ، كلمنى عن وضعك داخل القطاع اللى انت بتنتمى اليه وهتكون ازاى قادر على مواجهه التحديات والصعوبات اللى ممكن تواجه الصناعه اللى الشركه بتنتمى لها ، اللى يهم المستثمر دايما الكلام عن المستقبل وليس الماضى ، وبالتالى لازم نعدل مكرر الارباح العادى بحاجه اسمها مضاعف الربحيه المستقبلى ، واتكلمنا قبل كده عن مكرر الارباح المستقبلى ومعادله بيتر لينش الذهبيه فى الموضوع ده ، وهى انك تبحث عن الشركات ذات النمو السريع حتى لو مكرر ارباحها عالى وبتحقق ارباح اقل حاليا ، عن انك تستثمر فى شركه ارباحها الحاليه عاليه ومكرر ربحها بسيط لكنها لا تمتك نمو مستقبلى لان النمو المستقبلى قادر على تحقيق ارباح عاليه تعمل على خفض مكرر الربح مستقبلا ، وطالما ان مكرر ربح الشركه اقل من معدل نموها المستقبلى فده يعتبر فرصه استثماريه لا تعوض
ومثال بسيط تانى لتوضيح الفكره عشان توصل بشكل صحيح
لو عندى شركتين الاولى مكرر ربحها 10 مرات وبتحقق نسبه نمو 5% خلال السنوات الخمسه القادمه وارباحها اعلى من الشركه الثانيه ، والشركه التانيه مكرر ربحها 20 مره وبتحق نسبه نمو 30% خلال الخمس سنوات القادمه وارباحها الحاليه اقل من الشركه الاولى ، لو هتختار بمفهوم مكرر الربح العادى اكيد هتختار الشركه الاولى ، لكن لو بتشتغل ماليا صح هتشتغل على مكرر الربح المستبقلى هتلاقى ان الشركه الاولى مكرر ربحا المستقبلى 2 مره (10/5) ، فى حين الشركه التانيه هيكون مكرر ربحها المستقبلى 0.66 (20/30) مره ومعنى كده ان الشركه التانيه تمتلك فرص افضل للنمو فى المستقبل وان ارباحها المستقبليه هتكون افضل من الشركه الاولى صاحبه مكرر الربح المنخفض حاليا والارباح العاليه حاليا ، كمان سهم الشركه التانيه هيكون مقوم باقل من قيمته الحقيقيه وبالتالى عنده فرصه لمزيد من الارتفاع لاستهداف قيمته الحقيقه ، وهنا الفرق بين استخدام مكررات الارباح وعرفنا ازاى من خلال مثال بسيط اد ايه استخدام مكرر الربح العادى بمفرده هو رقم مضلل
احنا بنذكر مره تانيه بالكلام ده لعل الذكره تنفع المؤمنين والناس اللى اخدت خطوه ايجابيه فى توصايتها يعدلوا الديفوه القاتل ده فى توصايتهم عشان الصوره تبقى اوضح واصح للناس
