بسم الله الرحمن الرحيم
فى مكان شغلى فيه مدرسه ابتدائى قريبه منه وماشاء الله الميكرفون بتاعها الاطرش يسمعه
النهادره لاقيت ناظر المدرسه فى البريك ماسك الميكروفن وبيخطب خطبه عصماء عن عظمه مصر فى التاهل لكأس العالم وبعدها قلبت بزغاريد فى الميكروفون وتحيا مصر ولا كأنه فرح ام عباس 😁
الغريبه انه من 3 ايام كان فيه ذكرى 6 اكتوبر كان اولى بيه انه يطلع يتكلم فيها عن عظمه مصر الحقيقيه ويتكلم عن الشهداء الابرار من الجيش اللى ضحوا بارواحهم عشان كرامه هذا الوطن ويزرع فى عقل وووجدان الاطفال دى يعنى ايه عظمه مصر الحقيقيه وان ازاى تتحول من الاندحار والانكسار الى الانتصار فى فتره زمنيه لا تتجاوز 6 سنوات وبامكانيات قليله
الناس ممكن ما تاخدش بالها من اهميه الوعى فى السن الصغير للاطفال سواء فى المدرسه او البيت مع انه ده السن اللى بتزرع فيه كل شىء سواء ايجابى او سلبى واللى بعد كده الانسان لما بيكبر بيستدعى مخزون المعلومات دى والوعى اللى اتربى عليه لاكمال مسيره حياته.
جميل جدا انك تتكلم عن عظمه مصر بس مش لدرجه اننا نزرع فى وجدان النشىء الصغير ده ان عظمه مصر محصوره فى الوصول لكاس العالم مع انه الطبيعى ان مصر فى ظل امكانياتها البشريه ووضعها التاريخى يكون موضوع الوصول لكاس العالم القاعده مش الاستثناء ، وان عظمه مصر مش بس فى هز الوسط والفن والمسوخ البشريه من الفنانين والمطربين ، مصر اعظم واكبر من كده بكتير جدا ويكفى ذكر القرأن الكريم لمصر فى اكتر من موضع والقرأن لا يذكر الا كل عظيم .
اربط كده النقطه دى بنظام التعليم فى اليابان وشوف الفرق انهم ازاى بيزرعوا مفاهيم ايجابيه فى عقول الاطفال عندهم واحنا هنا بنزرع فيهم مفاهيم سلبيه وتافهه
تخيلوا مثلا ان لعبه زى لعبه الكراسى المشهوره ، الاطفال هناك فى الحضانه بيلعبوها بمفهوم جديد وهو ان الفريق الكسبان هو اللى مش هيفضل منهم واحد واقف ، فالاطفال بتحتضن بعضها وبتضحى من جزء من عدم راحتها فى القعده عشان يديقوا المسافات وبالتالى عدد الكراسى الناقص عن عددهم يستوعبوهم كلهم (مفهوم الجماعيه ) فى حين اننا فى مصر بنلعب اللعبه دى بمفهوم الفرديه يعنى عشان تكسب لازم تلحق انت الكرسى والفكره المسيطره هنا الفرديه والانانيه عشان كده تلاقى النفسنه بين الناس فى مصر كتير وانه مافيش فى مصر حاجه اسمها روح الفريق والجماعه لازم فى الاخر العمل ينسب لفرد مش للمجموع ، وفى المرحله الابتدائى فى اليابان بيعلموهم ماده اسمها الاخلاق هدفها انك ازاى تتعامل مع المجتمع وتتواصل معاهم باحترام عشان كده تلاحظ ان الشعب اليابانى من اكتر شعوب العالم تأدبا بالاضافه الى ان الطلبه حتى السنه الثالثه فى التعليم الابتدائى لا يتم تدريس مواد لهم عشان يمتحنوا فيها ولكن بيتم غرس قيم ومبادىء معينه فى السن ده وملخصها تهدف الى كمال المجتمع اليابانى ، عشان كده اليابان تستحق يتقال عليها كوكب اليابان
ونصيحه لاى بيت مصرى عنده اطفال صغيره انك تكون حريص على غرس القيم الدينيه والاخلاقيه والمفاهيم الايجابيه فيهم لان ده الاساس اللى هتقوم عليه الشخصيه بعد كده وده اللى هيكون بمثابه المناعه لهم ضد امراض المجتمع .
لو حضرتك عايز تنيمه حقيقيه وتقدم لازم التعليم يكون رقم 1 واتنين وتلاته واربعه فى سلم الاولويات وان الاستثمار فى البشر هو احسن استثمار حقيقى واسئلوا مهاتير محمد والنمور الاسيويه فى بناء نضتها الحديثه و اسئلوا اليابان نفسها بعد الحرب العالميه التانيه عن التعليم الحقيقى حتى كان بيتم تعليم الطلبه فى العراء بعد تدمير اليابان وبنيتها الاساسيه فى الحرب
لكن على رأى بحر العلم وترعه المفهوميه. "يعمل ايه التعليم فى وطن ضايع" 🤣
