بسم الله الرحمن الرحيم
الحقيقه انا مندهش جدا من الناس اللى بتروج الى الان ان الاستدانه من المؤسسات الدوليه كانت خطوه حتميه ولابد منها ، فى حين ان البديل كان اسهل وتكلفته اقل وهيعزز ثقه المواطن فى البلد وفى الحكومه وهيرفع من انتمائه وحسه الوطنى الحقيقى بدلا من الهبل اللى بيعملوه الايام دى واخره اذاعه السلام الوطنى فى المستشفيات
الغريبه ان الناس اللى بتدلس على الشعب واستمرئت الفعل ده مش بيقولوا ان بكره فيه حساب والكل هيقف امام رب العالمين فردا ، والكل هيقول نفسى نفسى ، يعنى لا رئيس بتعرضله هينفعك ولا مدير ولا غيره
الساده المعرضين بزياده فى الموضوع ده يا ترى حضرتك ما فيش فى مره سمعت عن تجارب زى سنغافوره او ماليزيا او تركيا او البرازيل او حتى نيجيريا فى مكافحه الفساد!
من خلال قرأتى فى تجارب البلاد دى فى التنميه كان قاسم مشترك بينهم هو محاربه الفساد ولك ان تتخيل ان مستعمره صغيره زى سنغافوره بدءت من بدرى جدا فى انشاء هيئات مستقله لمكافحه الفساد من عام 1952 عشان تجلب الاستثمارات الاجنبيه وبعد جهود مضنيه ومتواصله سنغافوره بتصل الى الترتيب الخامس على مستوى العالم فى الدول الاقل فساد عام 2016 فى حين ان مصر تراجعت لمستوى 116 على مستوى العالم فى نفس السنه ولما تعرف ان تكلفه الفساد سنويا فى اقل تقدير لها وصلت الى 150 مليار جنيه والكل بيجمع ان التكلفه مش اقل من الضعف الى ثلاث اضعاف الرقم ده سنويا واذا سلمنا جدلا ان 150 مليار هو الحجم الحقيقى يا ترى دى دوله عندها رغبه حقيقيه فى مكافحه الفساد فى ظل ما يقرب من وجود 36 جهاز رقابى اهمهم الجهاز المركزى للمحاسبات وهيئه الرقابه الماليه والاداريه واللى بتعتبر جزء من المخابرات وتمتلك امكانيت مهوله فى متابعه ورصد وتسجيل مكالمات المصريين ولها حق الاطلاع على ادق التفاصيل ، ورغم كده اصبح الفساد دوله قائمه ولها اركانها وده باعتراف عراب الحكم العسكرى "حسنين هيكل" ان الفرق بين تونس ومصر عند قيام الثوره ان تونس كان فساد دوله ولكن مصر دوله فساد ، وقبله قالها زكريا عزمى فى مجلس الشعب ان الفساد فى المحليات للركب ، وكررها راعى الفساد فى مصر السيسى لما كرر جمله زكريا عزمى وهو بيضحك وقال طب اعمل ايه ، مع ان فى ادبيات مكافحه الفساد ان مكافحه الفساد مرهونه دايما بالاراده السياسيه
احنا متخيلين كم الاهدار فى الموارد الاقتصاديه نتيجه الفساد والنهب والسرقه ؟!
يعنى حضرتك لما بتخسر 150مليار على الاقل تكلفه فساد ده غير عدم محاسبه المسؤلين عنه ، وضيف على كده تهرب ضريبى يقدر مش اقل من 400 مليار جنيه (من بينها ان انشطه الجيش الهادفه للربح مش بتدفع ضرائب ده غير الاراضى اللى بياخدها ببلاش من الدوله) غير الاهدار فى بنود الانفاق الحكومى واهمها مؤسسه الرئاسه اللى محدش يعرف كام مصاريفها الحقيقيه ولا بنود المكأفات والبدلات للمستشارين الوهمين فى المصالح الحكوميه ولا حد يعرف الاموال المهدره فى الصناديق الخاصه ولا حد يعرف حاجه عن المزايا العينيه اللى بياخدها الناس اللى فى الاجهزه السياديه واللى بتمتد لاقربائهم واقرباء اقربائهم ، متخيلين المبالغ دى لو اترصدت بجد تعمل كام ! فى تقديرى مش هتقل عن 700-800 مليار جنيه اهدار سنوى وبعد كده يطلع علينا الافاقين والكدابين عشان يوهموا الناس ان ما كانش فيه حل غير انك تقترض من صندوق الفقر الدولى
متخيل حضرتك اننا بنتكلم فى بند واحد بس اسمه الفساد ، يعنى مش بنتكلم فى زياده انتاج وحل مشاكل المصانع المتوقفه ولا التطويروالتحديث فى اساليب الانتاج ورفع كفاءه العماله المصريه كأحد الاسباب فى زياده الصادرات ولا الاستثمار فى الصناعات ذات رؤؤس الاموال الصغيره وكثيفه العماله زى الالكترونيات ، احنا بنتكلم فى بند واحد يغطى عجز الميزانيه وممكن يعمل فائض كمان تستغله فى حاجه تانيه ، ما بالك بقى لو ضفنا على كده الحاجات اللى قلت عليها ممكن شكل مصر يكون ازاى!
اخيرا عايز بس افكركم بمقوله قالتها رئيسه كرواتيا : انهم مش هيقترضوا من المؤسسات الدوليه حتى ولو ماتوا جوعا ، واذا اضطروا الى الاقتراض ستكون القروض لتمويل مشاريع تدر دخلا للاقتصاد الكرواتى واعتقد ان دى رساله للكدابين والافاقين اللى عندنا ان الاقتراض الايجابى بيكون اضافه للاقتصاد مش عشان سد عجز موازنه
اترككم مع فيديو بسيط يوضح اغتصاب صندوق الفقر الدولى للدول الناميه
