بسم الله الرحمن الرحيم
الحقيقه لما تقرأ عن سهم فى السوق الامريكى وهو سهم LONGFIN CORP ارتفع بنسبه 2600% خلال اسبوع واحد من 12/12/2017الى 18/12/2017 زى ماهو موضح فى الرسم البيانى من مستويات 5 دولار الى مستويات 142 دولار ، وحتى لو كان السهم يتم يتداوله خارج المقصوره ( OVER THE COUNTER MARKET) وحتى اذا لم تخضع اسواق خارج المقصوره الى الحدود السعريه فهل يعقل ان يرتفع سهم فى يوم واحد بنسبه 365% من مستويات 39الى 142 حسب الموقع الرسمى للشركه او 2600 % فى اسبوع ! ، الغريبه ان البهوات فى هيئه سوق الاوراق الماليه الامريكى افتكروا انه فيه تلاعب فى السهم بعد 4 شهور من الارتفاعات الجنونيه نتيجه لاستحواذ الشركه دى وقتها على شركه ZIDUU.COM المتخصصه فى منح القروض للتمويل وتقديم الحلول التكنولجيا المعتمده على العملات الافتراضيه وتقنيه البلوكتشين ، قامت هيئه سوق الاوراق الامريكيه بايقاف السهم يوم 6/4/2018 وحتى 24/5/2018 وتجميد 27 مليون دولار نتيجه لبيع اسهم تخص الرئيس التنفيذى للشركه و3 افراد من معاونيه بالمخالفه لقوانين سوق المال وبعد ارتفاع رأس المال السوقى فى ثلاثه ايام الى 3 مليارات دولار
ولو حتى اسهم " البينى ستوكس" PENNY STOCKS مش مطلوب منها افصاحات كتير الا ان موضوع الشركه دى كان حديث الساعه وقتها وفى توجيه نقد لاذع لهيئه الاوراق الماليه واعتبروا اللى حصل ده كارثه كشفت ضعف اليات الرقابه لدى هيئه سوق الاوراق الماليه الامريكى
الحقيقه ان نوعيه وقائع زى دى بترجح عندى ان الاسواق الماليه على مستوى العالم تعانى بدرجات متفاوته من ضعف اليات الرقابه ولا استبعد وجود شبهه الفساد بدرجات متفاوته فى الاسواق العالميه ولكن الفرق بينا وبينهم انهم "اناس يتطهرون" يعنى ما زال اليات كشف الفساد ومحاسبه الفاسدين موجوده حتى ولو فى حدودها الدنيا ، عكس عندنا ان الفساد استفحل واصبح دوله قائمه بذاتها لها اركانها واصبح من ياتى غريبا عن منظومه الفساد يحدث له ماحدث مع سيدنا لوط واتباعه من المؤمنين "اخرجوهم من قريتكم انهم اناس يتطهرون " ، ومنظومه الفساد لا تقتصر فقط على القائمين على الاسواق الماليه ولكن تمتد شبكه المصالح الى بيوت الخبره العالميه فى توجيه الاسواق ، وهو نفس ما يحدث عندنا من امتداد لشبكه المصالح التى تطال بعض شركات التقييم المالى وبعض المحللين المرضى عنهم و الذين يجوبون الشاشات لخداع صغار المستثمرين تحت بند التفاؤل ومش عايزين الناس يزعلوا مننا ولا ننسى منهم اصحاب المصالح المباشره مع شركات بعينها
يعنى سعادتك كمستثمر لازم تعرف انك الطرف الاضعف فى شبكه المصالح دى ويا ريت نبطل نفس الشكوى اللى من اول ما بدئت تحليل فنى وانا بسمعها من حوالى 10 سنين وهى ان العيب فى السوق والعيب فى الميكرز والعيب فى اوراسكوم انشاء وتم ابدلها بالتجارى الدولى وفى العيب فى الراجل اللى مسؤل عن البورصه حاليا اللى انا مش فاكر اسمه وكان قبله واحد تانى قبله كانت نفس الشكوى منه ، يعنى تم الشكوى من افراد المنظومه كلها الا ان المستثمر نفسه يعترف بخطئه ويحمل نفسه المسؤليه المشتركه مع اطراف هذه المنطومه ، على الاقل خد بالاسباب فى التعلم عشان تعرف تحمى نفسك شويه من شبكه المصالح فى الاسواق الماليه و عشان تصبح انت سيد قرارك بجد وما تعتمدش على غيرك فى انه يوجهك وبدل ما كل واحد عنده 200 محلل بيتابعهم ويضيع وقته معاهم -وانا مش هستثنى نفسى منهم - استغل الوقت ده فى انك تتعلم وتضيف لمعلوماتك حاجه جديده ، خد العلم من مصادره الحقيقيه من الكتب الاجنبيه واتعب شويه فى الترجمه بس هتتعلم صح ، وانك تكون ثقافه معلوماتيه بشكل عام وتثقف نفسك فنيا وماليا بشكل خاص هتفرق معاك كتير فى الحياه عموما وفى الاسواق الماليه خصوصا على الاقل رؤيتك لامور كتير هتكون اوضح و هتقدر تكون فيها رأى خاص بيك بدل ما تكون اسير وتابع لرأى شخص تانى
