بالنسبه لخطوط الترند واهميه رسمها وبعض النقاط الفنيه الخاصه بها
من وجهه نظرى مهم اننا نعرفها ، مش عايز طبعا اتوسع فى معلومات يقدر اى حد يقراها من اى كتاب زى ان الترند محتاج على الاقل نقطتين لرسمه ، لكن لازم تعرف ان اى ترند مار بنقطتين فقط يعتبر ترند مؤقت محتاج على الاقل نقطه ثالثه لتاكيده ، وانه يمكن رسم عدد لانهائى من الترندات ومن اى قاعين ويفضل القيعان الانعكاسيه القويه الرفيعه ذات الاغلاق القريب من اعلى سعر عن القيعان الدائريه ، حتى انه يقال ان السعر عندما يحقق قمم جديده ويصل الى مستوى معين ويبدء التراجع منه فان هذا المستوى هو فى الاصل امتداد لترند ممتد سابقا او عده ترندات تقاطعت فيما بينها فيما يعرف بتكتل الترندات (TREND CLUSTERS)
- الحاله اللى ممكن تقابلنا كتير هى الحاله الموجوده على شارت المؤشر ، ولما يكون عندنا قاعين قريبين من بعض والمسافه الزمنيه بينهما صغيره ، فى الشارت المرقم برقم 1 نلاحظ ان رسم الترند من قاع 9/12/2018 مارا بقاع 25/12//2018 وبعدها النقطه المرقمه برقم 3 حصل انها كسرت الترند كسر مش حقيقى ، هنا كان الاختلاف بين كبار كتاب التحليل الفنى ، وهنبدء بكبير التحليل الفنى وهو ماجى اللى فصل الحاله اكتر من باقى الكتاب الكبار ، وقال لو القاعين كانوا قربيبن زمنيا فيما لا يتجاوز الاسبوع وحصل كسر غير حقيقى للترند وكانت نقطه الكسر الغير حقيقيه دى تمثل النقطه الثالثه اللى بتاكد الترند يبقى الخط فقد اهميته ولازم يتعاد رسمه بدءا من اول نقطه مرورا بالنقطه الجديده ، اما لو كان نقطه الكسر الغير حقيقيه هى النقطه الرابعه او ما بعدها فخط الترند الاصلى يبقى كما هو وتجاهل هذا الكسر للترند ، ولو طبقنا الفكره على الشارت هنا وفى الشارت رقم 2 هنلاحظ ان فيه اختلاف فى التفسير الفنى، بمعنى ان مرور خط الترند بقاع 9/12 و25/12 بيقول ان الترند اتكسر فى النقطه الرابعه كسر حقيقى وان البولباك كمان نجح وقدر السعر يغلق اعلى الترند فى جلسه اليوم وطبعا هيتبنى رأى غالبا هيكون متفائل بحركه السعر القادمه
اما فى الشارت الثانى لو طبقنا ما قاله ماجى هنلاحظ ان الترند اصلا لم يتم كسره بالعكس ده اكتسب قوه اكبر بارتداد السعر من خط الترند وهنلاحظ ان قاع 23/1/2019 قسم الفتره الزمنيه بين النقطه 1 والنقطه 3 الى فترتين متساويتين زمنيا ، والحقيقه من الحاجات اللى مش بتذكر كتير فى قوه خطوط الترند هو اختيار قيعان متناسقه زمنيا يعنى يكون بين كل قاع وقاع اخر فترات متساويه نسبيا بقدر المستطاع وان كان احصائيا بتكون حوالى 28 يوم بين كل قاع واخر حسب احصائيات لبكلوسكى ، شخصيا ممكن اختلف مع الاستاذ الكبير ماجى فى الموضوع ده ، فى حاله انى اتجاهل الكسر لو حقق لى فائده اضافيه لقوه خط الترند زى انه يمر بعدد اكبر من النقاط زى حاله خطوط الترند الداخليه (INTERNAL TRENDLINES) اللى اتكلم عنها استاذنا عبد المجيد المهيلمى وبولكوسكى، واللى بتكون ممتده زمنيا وبنلاقيها بتقطع السعر نفسه وبتمر بعدد كبير جدا من النقاط وبعض المحللين بيعطوها اهميه اكتر من خطوط الترند العاديه
اما استاذنا جون ميرفى ريح دماغه من الموضوع واختار حل وسط وهو الاحتفاظ بالخط الاساسى ورسم خط ثانى مار بنقطه الكسر الجديده ومراقبه سلوك السعر بعدها ، اما استاذنا مارتن برنج ما اتكلمش فى النقطه دى بشكل خاص لكنه اتكلم عن اهميه التاكد من الكسر على المقياس اللوغارتيمى ، بما ان الكسر بيحدث سريعا لخطوط الترند على المقياس الحسابى الاكثر استخداما
- اخر نقطتين بالنسبه للموضوع ده ، ان القيعان القريبه من خط الترند واللى لم يحدث ملامستها بشكل مباشر تعتبر ايضا من نقاط الترند المحسوبه كدعم فى حاله الترند الصاعد او مقاومه فى حاله الترند الهابط وده رأى لمارتن برينج وبولكوفيسكى ، والنقطه الثانيه وكنت اتكلمت فيها قبل كده وهى مستهدف خطوط الترند ، وعلى الشارت لو كمل السعر هبوط كان مستهدف خط الترند عند منطقه 13900-14000
