والضدان لما استجمعا حسنا والضد يظهر حسنه الضد
الحقيقه ان سهم السويدى عليه حاجتين كنت ببحث عنهم فى التطبيق وهما الحياديه فى التحليل ، وفكره المرايا السعريه
- الامريكان فى ستينيات القرن الماضى لما قاموا بتأسيس روابط للتحليل الفنى كانوا بيعلموا المحللين الفنيين الحياديه عن طريق رسم انماط سعريه معينه زى مثلا الرأس والكتفين فى القمه وفى خلفيه الورقه الشفافه كانوا بيرسموا معكوس الرأس والكتفين فى القاع ، او رسم القاع المزدوج وفى خلفيه الورقه القمه المزدوجه ، وكأن الرساله الموجهه هى ضبط المشاعر والتخلص من الانحيازات المسبقه وهى افه الكثير من المحللين او المستثمرين
- على شارت السويدى تقدر تعتبر الجزء المظلل الاول هو قاع مزدوج قائم بذاته او قاع مزدوج بداخل معكوس رأس وكتفين مركب (COMPLEX HEAD AND SHOULDERS WITH DUAL HEAD) والنمطتين ما حققوش مستهدفهم والصوره انقلبت الى نمط قمه مزدوجه (بداخل التظليل) او تقدر تعتبر النمط ايضا رأس وكتفين مركب ، وبرغم سبايك شمعه المطرقه اللى كسر خط العنق للنمط الا ان الاغلاق كان اعلاها وبكده النمط لسه لم يكتمل بعد
- النقطه التانيه هى فكره المرايا السعريه : والخط الفاصل المرسوم بيوضح الفكره ، فعلى سبيل المثال ،سلوك السهم جهه اليسار - قبل الخط المرسوم رأسيا- هتلاقيه تقريبا هو نفس السلوك فى تكوين قمم او قيعان مقابله فى جهه اليمين برغم الاتجاه المعاكس واستنتجوا من المرايا السعريه انها بتعمل بشكل جيد عند انعكاس السعر وتقدر من خلالها الى حد كبير تتوقع حركه السعر فى الجهه المقابله مستقبلا ممكن تصل لحد فين
- غالبا هتلاقى المرايا السعريه واضحه اكتر فى انماط الرأس والكتفين ومعكوسها ، او القمه المزدوجه ومعكوسها ، ومش لازم تلاقى لكل قمه او قاع صوره طبق الاصل فى الجهه المقابله لكن احنا بنتكلم عن حركه سعر فى المجمل
