حاله متاجره تعليميه
- فى الشارت الاول عندنا معكوس رأس وكتفين واضح وصريح اكتمل بالاغلاق اعلى 695 لمستهدف تقريبا 740 نقطه ، لكن واضح على مؤشر الارون ضعف الترند فى المدى القصير وان الترند الهابط هو اللى مسيطر ، وكانت النتيجه تكوين نمط رأس وكتفين صغير فى القمه يستهدف هبوطا مستوى 700 نقطه
- فى الشارت التانى وهنا الحاله التعليميه اللى انا عايز اتكلم عنها والنظام ده اللى هتكلم عنه كان نظام خاص بيا شخصيا وكنت باستخدمه فى المتاجره وقت ما كنت فى السوق ، لو افترضنا ان ممكن شخص تانى يشوف معكوس الرأس والكتفين انه مثلث متماثل او حتى شخص واحد بس عينيه كويسه على الشارت فى استخراج الانماط الموجوده خصوصا ان المنطقه المشار اليها موجود عدد من النماذج الكلاسيكيه والهارمونيك، والحقيقه فى الحاله المعروضه هنا ، ما عندناش مشكله فى المستهدفات الصاعده للانماط الكلاسيكيه ما بين المثلث المتماثل ومعكوس الرأس والكتفين لانها تقريبا واحده ، ولو فيه اختلاف فى المستهدفات ممكن تجنى ربح عند احد مستهدفات النموذج الكلاسيكى الاقرب وتحتفظ بباقى الكميه لهدف النمط الكلاسيكى الاخر الابعد ، نفس الموضوع لو تخيلنا ان السعر لف قبل ما يحقق مستهدفه الصاعد زى حالتنا هنا وافترضنا مثلا انه كمل هبوط ، يا ترى تخرج على نمط معكوس الرأس والكتفين ولا تخرج بكسر الحد الاسفل للمثلث !!! 🤔🤔
لاحظ ان عندك 3 اختيارات لوقف خسارتك على نمط معكوس الرأس والكتفين موضحين بالارقام وكل مستوى فى وقف الخساره له مميزات وعيوب وشخصيا انا من الناس اللى دايما بكرر ان وقف الخساره يرجع للشخص نفسه فى مدى تحمله للخساره وتعريف نفسه على اى مدى زمنى بيتاجر ، لكن فى العموم لا يجب ان يزيد عن 10% من اجمالى المال المستثمر فى السوق
شخصيا كنت بحب اخرج بالاغلاق تحت الحد الاسفل للمثلث ولك ان تتخيل لو كان النموذج اكبر من كده هيبقى فيه فرق واضح فى السعر ، والغريبه ان الاغلاق تحت الرأس الخاصه بنمط الرأ س والكتفين احصائيا افضل مكان لوقف الخساره بالرغم انها بتكلفك خساره اكبر لكن مش بتضيع عليك فرصه ان السعر يرتد صعودا وممكن تحقق مكاسب وبعض كتاب التحليل الفنى كمان بيفضلوا الخروج على المثلث المتماثل بالاغلاق تحت ادنى قاع للمثلث وهنا ادنى قاع للمثلث هو رأس نموذج الرأس والكتفين😀 ، وشخصيا انا ضد الكلام والاحصائيه دى ، ودايما بقول ان الشراء على اجزاء او الخروج عند مستويات معينه باجزاء من المحفظه هو الحل التوازنى للموضوع ده الا لو كان فيه بانيك او ضغط بيعى كبير يبقى الافضل الخروج مره واحده وعند اقرب مستوى دعم تحت سعر شرائك
- من الملاحظات الماخوذه عن المثلثات ان رأس المثلث TRIANGLE APEX وهى مكان التقاء اضلاع المثلث فى نقطه معينه بتكون نقاط انعكاسيه ، وان خروج الاسعار بعد ثلثى المسافه من بدايه المثلث بيكون اندفاع الاسعار اكبر عند خروجها من المثلث وان كان متوسط صعود الاسعار احصائيا بيصل الى 40% فى المثلث المتماثل ، كمان يفضل الشراء فى المثلثات بعد اختراق السعر لاعلى قمه فى النموذج خصوصا المثلث المتماثل (الحاله هنا عند 706) وان كان فيه مقاومه قريبه من اكتمال الانماط (OVERHEAD RESISTANCE) بصفه عامه افضل الشراء بعد اختراقها ونعتبرها كفلتر اضافى لصحه الاختراق
