بسم الله الرحمن الرحيم
ايه يا اخوانا هو الفيلم الامريكانى بدء ولا ايه 😁 😁
الداو اغلق على 1200 نقطه داون
هو بلحه بتاع كوريا الشماليه ضرب بلحه الامريكانى واحنا مش حاسين !
ولا اقتصاد امريكا اذ فجاه كده بقى فى الحضيض ! بانيك بصوره غريبه ومن اكبر الجلسات هبوط اللى شوفتها فى حياتى للداو
هل فعلا الخوف من ارتفاع عوائد السندات وتوقعات التضخم المتزايده ولا الموضوع خاص بفضيحه ترامب وتدخل روسيا فى الانتخابات الامريكيه ! جايز يكون الموضوع كبير برغم ايمانى ان الداو تصحيحه لازم يكون قوى بس اكيد البياع بيكون محتاج حاجه مفرقعه كده عشان يعمل البانيك ده
بالمناسبه عايز اصحح معلومه كده عشان شوفت فتاوى كتير لناس بتقول اننا مش مرتبطين بالداو وللاسف الكلام ده مش من ناس عاديين بس لكنه من ناس بيقولوا عليهم خبراء
اللى يعرف دورات زمنيه اكيد عارف اننا مرتبطين بدوره زمنيه مع الداو والاسواق كلها مرتبطه بيها ومش عايز ادخل فى تفاصيل كتير لكن دوره كوندراتيف العظمى بتجمع الاسواق كلها والدورات الصغيره منها زى دوره شغلر البادئه من قاع ازمه 2008 بتجمع الاسواق العالميه كلها تبعا لمبدء التزامن synchronicity سواء تزامن الدورات ذات الدرجات المختلفه مع بعضها او تزامن الاسواق فى دوراتها الزمنيه يعنى يحصل قمه او قاع فى نفس التوقيت تقريبا
اما ان احد الاسواق يخالف فى القمه او القاع عن الداو او باقى الاسواق ده ااحد مبادىء الدورات الزمنيه اسمه مبدء انحراف القمم والقيعان variation وله اسباب مش عايزين نخوض فيها بس افتكر كده لما الداو فى شهر اكتوبر 2007 كون قمته واحنا بعدها فى شهر مايو 2008 كانت قمه 12000 ، فيه حاجه فى الدورات الزمنيه بيسموها time window بيتم فيها احتساب 10% تقريبا من زمن الدوره وبيتم اضافتها او طرحها للحصول على قمه نسبيه او قاع نسبى زى اطار كده تقديرى للوصول الى قمه الدوره الزمنيه او قاعها بعيدا عن قمتها او قاعها المحسوب سابقا زى دوره شغلر اللى احنا حاليا فيها المفترض انها بتنتهى شهر مارس 2018 مده الدوره دى 9 سنوات محسوبه من مارس 2009 وبالتالى عادى جدا ان الدوره دى كانت تنتهى شهر يونيو او ابريل 2017 او تمتد الى نهايه 2018 او فبراير 2019 عشان كده كنت اتكلمت فى اكتر من مره عن الدوره دى وقلت ان 2018 غالبا مش هيعدى غير بتصحيح متوسط المدى بعيد حتى عن اللى بيحصل الان
ثانيا لو اللى بيتكلم عن عدم ارتباط مؤشرنا بالداو ومش معترف بالدورات الزمنيه فيه حاجه اسمها القانون العمومى لشارلز داو law of commonality ملخصه ان اللى بيحصل فى حركه اسعار سوق الاوراق الماليه لاحد الدول الصناعيه الكبرى بمرور الوقت هيتكرر فى الاسواق الماليه لباقى الدول ومع وجود العولمه اصبح التأثير سريع جدا وده اللى بيسموه positive correlation ولو مش عاجبك كل ده فيه حاجه اسمها intermarket realtionship بين الاسواق سواء كانت علاقه اسواق الاسهم ببعضها او علاقه اسواق الاسهم بباقى اسواق السلع او العملات
طب بلاش ده كله ايه رأيك فى الاجانب الموجودين فى السوق المصرى لهم تأثير فعلى وحقيقى ولا دول خيال مأته مثلا
تفتكر هيقعدوا اد ايه صابرين على مراكزهم المفتوحه بره !
وبعد ده كله نقول انه مؤشرنا ملهوش علاقه بالداو ده على اساس ان الداو ده او الاسواق العالميه فى كوكب زحل مثلا
