بسم الله الرحمن الرحيم
هو احنا عايزين نمو ولا تنميه !
احنا محتاجين تنميه وتنميه بمفهومها السليم والبسيط واللى بيعنى زياده فى متوسط الدخل الحقيقى للفرد وتحسين معيشه الافراد مع الاهتمام بهيكل توزيع الدخل الحقيقى ونوعيه السلع والخدمات ، على عكس النمو الاقتصادى اللى مش بياخد فى حسابه توزيع الدخل ولا بيهتم بنوعيه السلع والخدمات للافراد يعنى ببساطه النمو الاقتصادى بيهتم بالكم يعنى الاقتصاد بينتج اد ايه سلع وخدمات لكن مش بيهمه ازاى تتوزع السلع والخدمات دى على الافراد ، والنمو الاقتصادى هو جزء من التنميه ، يعنى التنميه مفهومها اوسع واشمل
عشان كده خلى بالك لما تسمع ارقام زى اللى بنسمعها عندنا ويقولك مصر بتحقق نمو 4.5% عام 2017 وكانت وصلت ايام حسنى مبارك 7% نفض للكلام ده ، لانه ببساطه معدلات النمو دى ولو ما حصلش انها اثرت على مستوى معيشتك وزاد دخلك الحقيقى بل وحتى رفاهيتك كمواطن وحريتك معاها ، اعتبر ان معدلات النمو دى مجرد ارقام وبس وفيه حاجه اسمها الاقتصاد الرمزى او الرقمى بيشتغلوا بيها الناس وبتكون بعيده عن الواقع الاقتصادى الفعلى، ملهاش ظل على الواقع ، لما تقولى ان 30 اسره فى مصر هى اللى بتستفيد بحوالى 90% من النمو الاقتصادى وباقى الشعب يسف تراب وتتكلم عن معدلات نمو ووضع مصر الاقتصادى والكلام اللى ماحدش حاسس بيه يبقى صباح الاشتغالات
عايز تعرف انت ماشى صح ولا لاء !
ببساطه روح لاى مواطن وقوله انت مبسوط فى عيسشتك ولا لاء ، روح لاى موظف قوله مرتبك بيكيفك ولا لاء !
اسئل اى حد عن مناخ الخوف اللى مسيطر على الناس وموقف حال ناس كتير ، وكل اللى تكلمه يقولك ماحدش عارف البلد ممكن يحصل فيها ايه !
سياسه اقتصاديه صح لازم ولابد تنعكس اولا على مستويات الدخول وتحسين معيشه المواطن مش بس انك يكون معاك فلوس لكن كمان انك تتعلم كويس وتتعالج كويس وانك تكون حر ، هى دى التنميه بمفهوما اللى اعرفه ، غير كده يبقى كلها اشتغالات وهتقعد تسمع جمله عنق الزجاجه اللى من اول انقلاب 1952 وبنسمعها ، جم بوشهم الفقرى وجابوا الفقر معاهم ، سياسه افقار الدوله والشعب سياسه ممنهجه بقالها اكتر من 65 سنه ، ولسه الطبالين والعوالم بيطبلوا ويرقصوا
ماعنديش تفسير لحاله التماهى مع الجلاد والمغتصب واللى بيفقروا الشعب ويمرضوه اللى عايشها كتير من الناس دى غير انها تكون " متلازمه ستكهولم"
