بسم الله الرحمن الرحيم
من خلال التجربه سواء على المستوى الفردى ، او العقل الجمعى اتضح ان طريقه التفكير نفسها هى اللى بتميز فرد عن اخر ، او مجتمع عن مجتمع اخر ، بمناسبه خفض سعر الفائده وفرح العمده اللى بعض الناس عاملاه وتزامنا مع ما اشيع من مخاوف المستثمرين من رفع سعر الفائده ، قرأت فى الفتره الاخيره اكثر من موقع اجنبى متخصص ومقالات لمحللين بيتكلموا عن المخاوف دى ، وفى منهم حافظ زى اللى عندنا وفيه منهم وتقريبا -ده الاغلبيه - ان ماحدش فيهم جاب سيره ان ارتفاع سعر الفائده مثلا هيأثر على الاستثمار الامريكى او هيأثر على البورصه فى امريكا ، لكن الناس دى كانت بتتكلم عن الخوف من رفع اسعار الفائده وتأثيره اولا على الانفاق الاستهلاكى اللى بيمثل حوالى 70% من الاقتصاد الامريكى ، بما ان سعر الفائده هيزيد يبقى فيه تضخم بيزيد يعنى معناه ان القوه الشرائيه بتقل وده نتيجيته فى الاخر اثر سلبى على الانفاق الاستهلاكى اللى بيتم ترجمته فى مؤشرات زى مبيعات التجزئه واللى فيها حاليا عدم ثبات نسبى مابين فتره واخرى ، ده غير ارتفاع العجز التجارى الامريكى الى 550 مليار دولار وهو اكبر عجز تجارى متحقق ، ومن المخاوف ان فى الاقتصاديات الرأسماليه زى ما اتكلمت قبل كده وقلت عنها انها تحمل فى طياتها بذور الفقاعات والازمات (اقتصاد قائم على سعر الفائده الربوى - العقود الوهميه - توليد النقود -تجنيب الدوله -تحويل المجتمعات الى الاستهلاك بما لا يتناسب مع دخولهم- سوء توزيع الدخل) وتخيلوا من عام 1929 الى الان حصلت 100 ازمه ماليه ،ومن المخاوف اللى دايما بتتقال ان ارتفاع سعر الفائده بيفجر الفقاعات وحاليا نقدر نقول ان فقاعه الاصول موجوده اذا عرفنا ان اسعار الاسهم حاليا يعتبر مرتفع وبيقترب من معدلات ما قبل الاثنين الاسود فى ثمانيات القرن الماضى ، وتفجير الفقاعات هيؤدى الى عدم سداد مديونيات قطاع كبير من الشركات ذات المديونيه الكبيره و كثير من الاسر الامريكيه بل والغربيه ، اذا عرفنا معلومه صغيره على سبيل الذكر، ان ديون القطاع الاسرى الامريكى ارتفع الى 13 تريلون دولار ، من الصعب انك تجد اسره من غير ديون فى الغرب وان وجدت يعتبر الاستثناء ، والغريبه ان المشكله بتكرر من وقت للتانى ولو رجعنا لقبل الكساد العظيم هنلاقى ان الوضع هو هو من سهوله الائتمان واسعار الفائده المنخفضه لدرجه ان شركات الوساطه الماليه كانت بتعلق يافطات مكتوب عليها BYING ON MARGIN وارجع كده عن حجم السيارات اللى زاد انتاجها من شركه فورد فى ذاك الوقت واللى تضاعف انتاجها الى 400% خلال سنوات العشرينات لتعرف كيف ان هذا النموذج الاقتصادى الردىء يخلق المشكله ثم يحاول علاجها ليدخل فى مشكله اخرى ويكفى ان ازمه 2008 كلفت العالم 15 تريليون دولار
والجزء الاخر من المحللين اللى رايهم ان الخوف من ارتفاع سعر الفائده او اى اخبار اقتصاديه غير مؤثره على اسواق المال بل ان الضغوط السياسيه المعلنه والخفيه لها اثر على اسواق المال وقالوا ان المناخ الاستثمارى فى امريكا حاليا غير مشجع للاستثمار- ويا ريت تحط عشروميت خط تحت الجمله دى عشان الناس تعرف ان الاستثمار مش سعر فائده بس - ، بسبب ترامب ومشاكله الخارجيه مع دول العالم والمشكله الكبيره للتدخل الروسى فى الانتخابات الامريكيه ، ودخوله فى مشاكل مع الديمقراطيين بسبب اجراءات الصرف وبسبب ان الباشا عايز يقلل من البرامج الاجتماعيه زى اوباما كير بحوالى 2% لزياده الصرف العسكرى وشوفنا نتيجه ده اغلاق الحكومه فى الشهر الماضى لمده 3 ايام والشهر ده اغلقت لمده ساعات
يعنى الناس هناك بيتناولوا ارتفاع سعر الفائده من منظور تانى خالص وبيربطوه مع مؤشرات اخرى مش بس اقتصاديه وكمان سياسيه، وده الشغل العلمى اللى انت وبتقراه تحس ان ناس فاهمه بتتكلم مش ناس حافظه ، واحد من خبراء كولمبور طالع يقول ان ارتفاع سعر الفائده كان مأثر على البورصه المصريه سلبيا 😁 طب ده يترد عليه نقوله ايه !
بصراحه فعلا كان مأثر عليها سلبا ، بدليل ان مؤشر البورصه المصريه حقق قمم تاريخيه ما حدش كان يحلم بيها ، ولا ان المؤشر فى 2017 بس حقق 29 قمه تاريخيه ولا ان البورصه المصريه حققت اعلى مستوى تداول منذ 2009 وصل الى 296 مليار جنيه يعنى اعلى رابع مستوى للتداول فى تاريخ البورصه ، ولا زياده رؤؤس الاموال اللى زاد بنسبه 100% ولا حصل 6 طروحات فى عام 2017 بقيمه 4 مليار جنيه ، ولا صافى شراء الاجانب وصل الى 7.5مليار جنيه بس فى 2017 و13مليار من بدايه التعويم ، ولا زادت القيمه السوقيه باكتر من 200 مليار جنيه ، ولا البورصه المصريه حققت السوق الاكتر نموا عربيا فى 2017 ومن ضمن الاسواق الاعلى نموا على مستوى العالم ، ولا مستويات القيد للشركات زادت بنسبه 156% ، ولا تضاعفت نسبه الاستحواذات والصفقات لتصل الى 146% ولا حصل زياده بنسبه 40% فى متوسط التداول اليومى (مليار جنيه تداول يومى فى المتوسط) ، الكلام ده مش من عندى والله ده فى التقرير السنوى للبورصه اى واحد ممكن انه يطلع عليه على موقع البورصه المصريه ، والكلام الى قلته ده عن عام 2017 اللى الفائده ارتفعت فيه فقط 400 نقطه اساس من اصل 700 نقطه اساس
يا جماعه عيب احترموا عقولنا شويه ، شغل الاستحمار ده ما بقاش يجي منه
