بسم الله الرحمن الرحيم
مبروك يا جماعه للباشا طارق عامر وصول الاحتياطى النقدى الى 36.4 مليار دولار اكبر احتياطى فى تاريخ مصر كلها ...... انجازات دى ولا مش انجازات يا متعلمين يا بتوع المدارس
ملوحظه : ابقى حضرتك اقرأ كده عن حاجه اسمها صافى الاحتياطى النقدى (اصول - خصوم) بالعمله الاجنبيه (الغطاء الدولارى)
الجراف التالى بيوضح العلاقه بين صافى الاحتياطى النقدى (المنحنى الاحمر) والمعروض من النقد بالجنيه المصرى MO من عام 2010 وحتى بدايه 2016 ودى المعلومات المتاحه عندى الى الان ، الباشا طالع فرحان بيتكلم عن وصول الاحتياطى الى ميلغ 36.4 مليار دولار وما قلناش مجموع الديون من المبلغ ده اد ايه ؟( ودائع بلدان اخرى مثلا زى تركيا تستحق الوديعه السداد على شهر نوفمبر القادم او على الاقل نصفها زى ما اعلن وزير الماليه وسداد اذون خزانه قصيره الاجل وسندات وقروض دوليه ) ببساطه كده هتلاقى الرقم يمكن يكون بالسالب او جزء كبير جدا منه ديون ، ويكفى ان مصر عندها سداد ديون فى الاجل القصير يعنى على اخر 2017 ما بين 8-12 مليار دولار
بالتأكيد كنت هكون مبسوط جدا او اى مصرى هيكون عنده نفس الشعور لو الاحتياطى ده هو احتياطى حقيقى بيعبر عن اتجاه اقتصاد فى مساره الصحيح
لاحظ هنا فى اواخر 2010 كان الاحتياطى 36 مليار دولار بسعر صرف تقريبا 5.5 يعنى حوالى 200 مليار جنيه مصرى زى ماهو واضح فى الجراف وكان المعروض والمتداول من النقد بيساوى 200 مليار جنيه ، نبص على الحركه بعد كده ازاى كانت فى الاتجاه المعاكس (زياده النقود لاكثر من 400 مليار جنيه فى 5 سنوات مع ثبات الانتاج = تضخم) فى حين تناقص صافى الاحتياطى النقدى بالدولار الى ما دون الصفر
