بسم الله الرحمن الرحيم
من وجهه نظرى الشخصيه ان قرار تحديد هوامش الربح للسلع
الاساسيه قرار ايجابى لانه مش ممكن الارتفاع الجنونى فى الاسعار كل كام يوم
و رغم كده ما زال البعض بيحكى فى المحكى وبيكلمونا عن
الاقتصاد الحر والتنافسيه وما ينفعش الدوله تتدخل فى تحديد الاسعار طب يا حبيب
قلبى لما تضمن لى سوق تنافسى مش احتكارى ولما نوصل لحاجه اسمها منتج رشيد يعنى
بيغطى تكاليفه ويكون له هامش ربح معقول يسمح له بتطوير منتجاته ومستهلك رشيد يعنى
تكون عنده ثقافه الامتناع عن الشراء لو حس ان سعر السلعه مبالغ فيه ، وقتها ابقا
تعالى كلمنى عن السوق الحروكلمنى عن سلبيات القرار ده ، وبرضوا عشان الناس تكون
فاهمه ان السوق الحر مش معناه ان الدوله تعمل نفسها من بنها لكن فيه اليات لردع
المخالفين ، عايز افكر الناس اللى بيكلمونا عن السوق الحر بتجربه الصين لما الدوله
اجتمعت مع كبار الشركات المنتجه والمصدره وحددت هامش ربح لهم 50 % لخدمه الهدف
الاكبر للدوله وهو قدرتها على التنافسيه والتصدير كأحد محاور استراتجيه تبنتها
الصين لغزو الاسواق العالميه واعتقد احنا شايفين الصين بقت فين !
احب اصحح مفهوم عند الناس وعند التجار ان هامش الربح مش هو
سعر المنتج مطروح منه التكلفه ، ده بيتقال عليه اولد فاشون فى المفهوم الاقتصادى
لكن هامش الربح الحقيقى بيتحدد على سرعه دوران رأس المال ، وكلما زاد معدل دوران رأس
المال زاد هامش الربح بنفس عدد دوران رأس المال ، والطبيعى من اساسيات المنافسه
وجود سعر منخفض للسلعه محل المنافسه مع المحافظه على جودتها وانخفاض تكلفتها
واتباع سياسات تسوقيه غير معتاده زى سياسه "التحميل" بمعنى تحميل سعر
سلعه رديئه على سعر سلعه جيده او بيع سلع اساسيه بدون هامش ربح وتحميلها على بعض
السلع الاخرى وهو اللى بيحصل الى حد كبير مع السلاسل التجاريه الكبيره اللى بنلاقى
الاسعار فيها منخفضه الى حد ما عن باقى المنافذ البيعيه ، عشان كده لازم الدوله
تتوسع فى انشاء السلاسل التجاريه الكبرى وتعمل على سهوله وتيسير النقل لتخفيض
تكاليف النقل واعتقد ان الصين لها تجربه رأئده فى الموضوع ده بانشاء الاسواق على
اطراف المدن
واخيرا عشان نضمن نجاح هذه التجربه لازم الدوله تفعل اليات
المتابعه والمراقبه ويكون فيه حساب قاسى للمتلاعبين ويا ريت الدوله تقوم بواجبها
فى توفير السلع (العرض) عشان نقص المعروض لاى سلعه بالتاكيد هيزود الطلب عليها
وهيرفع سعرها ، وانه يكون فيه ما يعرف بخلايا اداره الازمات crisis management وشغله الناس دى بتكون توقع الازمات والعمل
على حلها قبل وقوعها او التعامل مع ما يحدث من ازمات وحلها فى وقت قصير واعتقد
ازمه السكر خير دليل على اللى بقوله
وان شاء الله تكون المشاركه دى مدخل لمشاركه اخرى هنتكلم فيها
على ما يعرف "بسياسه استهداف التضخم inflation
targeting policy "
ا
