بسم الله الرحمن الرحيم
بالنسبه يا جماعه من اللى بيشكى من مؤشر egx30 وبيقول انه منفصل عن باقى السوق وان هو مؤشر السهم الواحد ، الغريبه ان الناس بتنسى انه طول عمره هو مؤشر السهم الواحد واسئلوا اوراسكوم للانشاء والبنك التجارى هو وريث اوراسكوم انشاء ، والناس دى نفسها بتنسى انه بالاوراسكومات وحدها وصل المؤشر الى قمته التاريخيه عند 12000 وتقريبا كانت كل قطاعات السوق اشتغلت وقتها ، لكن دايما بقت الشكوى من المؤشر عند النزول بس ، وعشان تريح نفسك وتشترى دماغك من ده كله لازم تعرف ان مافيش مؤشر فى الدنيا بيعبر تعبير صحيح لا عن اسهمه ولا عن الاقتصاد بشكل عام وان مؤشرات الاسهم مش مؤشر حقيقى فى التعبير عن الاقتصاد، ولكن عن جزء منه ، حتى الكلام ده بينطبق على المؤشرات الامريكيه
والحاجه اللى لازم تعرفها انك كمستثمر لازم تحدد انت عاوز ايه !
لان الاجانب عندهم استراتيجيه واضحه وهى انهم بيستهدفوا الاسهم القويه ماليا وذات الاوزان النسبيه الكبيره وبالتالى شغلهم كله فى القياديات وابرزهم التجارى الدولى ، واصبحت معظم السيوله متركزه فى الاسهم دى وهو اللى بيصنع الجاب ده بين الاسهم القياديه وباقى الاسهم
حضرتك ممكن تكون ليك استراتيجه برضوا بانك لو استهدفت الاسهم الصغيره والمتوسطه او بتستهدف الاسهم اللى ليها اوزان متساويه ، يبقا تشتغل على مؤشر egx70 او egx50 ، هتقولى ماهو المؤشرات دى ملهاش لازمه وما اضافتش جديد للبورصه المصريه وبتتأثر بالمؤشر الثلاثينى ، هقولك ان تاريخيه المؤشر الثلاثينى وتدشيه منذ بدايه البورصه فى نسختها الجديده عام 1993 بيعطى له الاولويه والهيمنه على باقى المؤشرات زى الداو جونز مع باقى المؤشرات الامريكيه ، لكن ده لا يمنع ابدا وجود تباين فى اداء المؤشرات زى ماهو ظاهر على الشارت وان مؤشرى egx70 ,egx50 كل واحد منهم تفاعل بطريقه معينه مع المؤشر الثلاثينى، بمعنى ان كان هناك حاله انفصال واضحه بين المؤشر الثلاثينى والسبعينى استمرت تقريبا لمده عام بدايه من عام 2014 وحتى بدايه عام 2015 حبث كان اداء المؤشر الثلاثينى صاعد وانفصل عنه المؤشر السبعينى هبوطا، والسؤال الفرعى هنا هل يكرر التاريخ نفسه ويتماهى اداء المؤشرين هبوطا لاحقا ! وبعد كده تماهى الاداء مره تانيه حتى بدايه 2016 ثم حدث الانفصال مره اخرى بارتفا المؤشر الثلاثينى واستمرار هبوط المؤشر السبعينى فى حين ان المؤشر الخمسينى تماهى ادائه مع اداء المؤشر الثلاثينى حتى منتصف اغسطس الماضى ثم انفصل عنه وهو ما يعنى من وجهه نظرى ان اصحاب الاسهم الصغيره والمتوسطه يهتموا بباقى المؤشرات بعيدا عن المؤشر الثلاثينى اللى مش هيفيدهم بحاجه فى الوقت الحالى ، لان واضح ان المؤشر السبعينى بيعانى من حاله ضعف تستلزم من وجهه نظرى اعاده تدوير السيوله فى باقى القطاعات التى يمثلها المؤشر وممكن للدوله انها تقوم بالدور ده باستثمار جزء من اموال التامينات مثلا زى ما باقى الدول بتعمل بنسبه عالميه تبلغ حوالى 5% من اموال التامينات ومن الممكن انها ترتفع الى 10% لاعاده توصيل الدماء الى شرايين المؤشر السبعينى
ويبقى حل المؤشر الثلاثينى من وجهه نظرنا فى تداول اسهم ذات رؤؤس اموال ضخمه تتقارب فيما بينها بحيث لا يكون هناك ثلاثه الى اربعه شركات ذات رؤؤس اموال ضخمه تستحوذ على معظم الاوزان النسبيه فى المؤشر فى حين يبقى اكثر من 90% من الشركات المتداوله ذات رؤؤس اموال ضعيفه وهو ما يخلق الفجوه الحاصله بين الاسهم القويه ماليا وغيرها من الاسهم
