بسم الله الرحمن الرحيم
اعتقد مع موجه البانيك الحاليه اللى بيشهدها السوق المصرى واللى افقدته ما يقرب من 1000 نقطه فى 7 جلسات اتضح ان الامر ليس له علاقه بانخفاض اسعار البترول او ما يحدث للصين فقط ولو جنبنا اسواق الخليج اللى هى اكتر تضررا من انخفاض اسعار البترول يبقى السوق المصرى منفردا بذاته يغرد هبوطا بدون سبب معلوم يقنع المستثمرين فالعنوان الصادر الخاص بسعر البترول والاحداث الخارجيه ما بقاش يجيب همه لان الاحداث دى لوحدها كان ممكن ان يستوعبها السوق المصرى فى 3-4 جلسات على اقصى تقدير وفى حدود 500-600 نقطه ولما نقوم بمقارنه بسيطه بين السوق المصرى والسوق السعودى وهو من المفترض الاكثر تضررا من انخفاض اسعار البترول نكتشف ان المؤشرعندنا تقريبا هبط بنفس نسبه هبوط السوق السعودى -وهو مرشح لمزيد من الهبوط- بل ان السوق السعودى فى اخر 3 جلسات ابدى نوع من التماسك حتى ولو كان تماسك مؤقت لكن عندنا لما نشوف عنف الهبوط وبفوليوم عالى بالشكل ده اعتقد يبقى السبب داخلى اكتر منه خارجى
يا ترى هل هو صدمه الناس من اللى حصل فى اول جلسه من جلسات مجلس القلل وان الناس بدءت تحس ان ده اعاده لمجلس القلل الاسبق بتاع موافقون ولا جديد تحت الشمس وحتى المؤيدون- وابرزهم ساويرس -بدءوا الحديث عن ان السياسات المتبعه هى نسخه طبق الاصل من السياسات السابقه التى ادت الى قيام ثوره 25 يناير ولا هو سبب اقتصادى بحت عن سلبيه الاقتصاد المصرى المتوقعه خلال 2016 نتيجه لانخفاض العمله وانخفاض العائد من القطاع السياحى واللى لوحده هيقلل معدل النمو باكتر من 1.3% من الناتج القومى ولا هو البعبع بتاع كل سنه الخاص باحداث 25 يناير
الحقيقه انا قمت بدراسه تاريخيه عن سلوك المؤشر فى شهر يناير بدايه من2005-2016 لاقيت ان الهبوط الحالى هو الاسوء بعد هبوط 2009 اللى استمر 11 جلسه على التوالى فى بدايات شهر يناير 2009
عموما لا اجد من التفائل اللى ان يكرر التاريخ نفسه ويجد المؤشر قاعا له عند 6180-6200 كمستهدف لنموذج القمه المزدوجه الكبيره اللى اتكلمنا عنه بتاريخ 19/8/2015 وباكتماله عند مستوى 8125 تغير الاتجاه الى هابط فى المدى المتوسط والا فغالبا سنذهب الى حدود 6000 نقطه وربما يبدء الانطلاق من هناك صعودا زى ما حصل فى 2009 وبدون اسباب منطقيه للصعود فى مختلف الاسواق العالميه اللهم الا يأس الناس من الصعود وقتها ووصولهم الى درجه عاليه من التشائم وبالمناسبه كثير من المتشائمين لا يجدون منطق فى الصعود حاليا او فى المستقبل القريب-وعندهم كل الحق فى ذلك- فالاحوال الداخليه والخارجيه لا تعطى املاا كبيرا فى التحسن
لكن احب اقول حاجه وهى ان فى معظم الاحيان الاسواق الماليه لا تخضع للمنطق فأى منطق يقول ان يصعد الداو جونز فى اقل من 8 سنوات بعد كارثه 2008 الى 18350 نقطه مهما بلغت قوه الاقتصاد الامريكى وهو ما زال يتعافى من اثار الازمه العالميه السابقه وبأى منطق يهبط السوق المصرى من 12000 الى 3400 نقطه وقبل كده بكتير اى منطق يهزم نظريه عبقرى التحليل الفنى والهرم الكبير وليام جان اللى كان بيتوقع قمم وقيعان الاسهم بالدقيقه والثانيه ومات الرجل حزنا وغما بعد ما شاهد ما يحدث لنظريته العبقريه بفعل فاعل
يا ساده لا منطق فى اسواق اللامنطق وربما فى بعض الاحيان اميل الى تصديق الاراء التى تقول بان اسواق المال تخضع لنظريه العشوائيه عشان كده ما تتعبوش نفسكم فى البحث عن الاسباب وافتكروا قول احمد راتب فى فيلم الارهابى- بمناسبه حفله الارهاب بتاعه كل سنه قبل 25 يناير- لما قال لعادل امام "لا تناقش ولا تجادل يا اخ على " وهو كده واللعبه كده وعلى المتضرر اللجوء الى بيتهم
