بسم الله الرحمن الرحيم
بالصدفه امبارح انا وبغير قنوات التليفزيون تابعت جزء من حديث احد الخبراء كان بيتكلم عن انهيار البورصه وازاى الدوله سايبه الموضوع كده وكان بيقارن الحال فى مصر بالحال فى امريكا وازاى ان اوباما لما حصل انهيار فى البورصه الامريكيه طلع وعمل مؤتمر صحفى طمن فيه الناس والراجل قعد يكلم عن الفروض الغائبه ان المفروض البورصه تعملها
الحقيقه اننا دايما لما بنواجه مشاكلنا بنمسك فى الفروع ونسيب اصل الموضوع واصل الموضوع يا ساده هو نظره الحكام لشعوبهم طبعا اوباما وغيره من حكام الغرب هو عارف ان انهيار القطاع المالى عنده يقلب امريكا رأسا على عقب لان ببساطه كده الناس هى اللى جايباه وانتخبته على اساس برنامج هيتحاسب عليه هو وحزبه وهو عارف انه خادم لشعبه مش سيد عليهم اما النظره الدونيه اللى موجوده عند الحكام العرب تجاه شعوبهم وان الشعب ده يحمد ربنا انه بياكل عيش وكتر خيرى انى بقيت رئيس او ملك عليهم هى اساس المشكله
تفتكر لما واحد انت بالنسباله لا قيمه لك هيشتغل ويتعب نفسه عشانك؟ اذا كان هو جاى عشان يسرقك وينهبك ويمرضك ويفقرك تفتكر اللى زى ده يهمه انك تخسر فى بورصه او سورى يعنى تولع بجاز!
لما طلع فقيه عصره قبل كده احمد نظيف فى انهيارات 2008 وقال ان الدوله ملهاش علاقه بالبورصه وان مجال البورصه ده شويه مضاربين بيكسروا فى بعض ولما يطلع المسئولين يقولوا انه لا يجب تدخل الدوله فى البورصه طيب يا ترى الناس دى درست اقتصاد قبل كده او يعرفوا حاجه عن السياسه! ولا اخرهم زى ما قلت قبل كده انهم شويه موظفين بياخدوا اومراهم بالتليفون
انا كنت اتكلمت عن اهم الاقتصاديين اللى غيروا وجه العالم من وراء الكواليس فى مشاركه فى البلوج ده يوم 5/9/2015 واخترت 3 منهم كانوا بتتكلموا بشكل مباشر عن تلاحم الجانب السياسى والجانب الاقتصادى والمالى وان ازاى بعض الانهيارات العالميه كانت نتيجه لصراع بين السياسين والمصرفيين بتخرج عن نطاق السيطره وان بعض الحكومات او البنوك المركزيه بتضع البورصه كهدف ضمن سياسيتها وبالتالى مجال زى البورصه ده لا يمكن يترك كده بدون تدخل من السياسين الا فى بلدنا مصر المخروصه المسئولين مسقعين ومصدرين الطرشه ودى احسن حاجه بنعرف نصدرها ولما حد منهم بيطلع يتكلم بتقول يا ريته ما طلع اتكلم من ضأله وفقر الفكر
اخر تصريحات وزراء حكومه الفنكوش حاليا خاصه بوزير الاستثمار اللى سعادته سكت دهرا ونطق كفرا بيقول ان البورصه المصريه مرآه مضلله للاقتصاد المصرى وان عدد الشركات المقيده لا يتجاوز 240 شركه فى حين فيه الالاف الشركات المقيده من 1970 وان رأس المال السوقى للبورصه المقدر 380 مليار جنيه لا يمثل اكتر من 25% من الناتج القومى
طيب يا بحر العلم ويا ترعه المفهوميه لما انت عارف انها مرآه مضلله سعادتك ما اخدتش ليه اجراءات تعالج بيها التضليل ولا سمتنى حد يقولك! طب ما تعمل ورشه عمل كده شوف مثلا ايه اسباب إحجام الشركات عن عدم القيد فى البورصه ولو فيه شروط مجحفه حاول انك تصلحها او ازاى انك تزود الوعى الاستثمارى عند المواطنين عن طريق برامج ودورات تدربيبه ترعاها الدوله او انك ازاى توفر مناخ جاذب للاستثمار يسوده الافصاح والشفافيه وحط مليون خط تحت الافصاح والشفافيه لانهم مرتبطين بالمناخ السياسى العام اللى ماحدش يعرف حاجه فيه عن الافصاح ولا الشفافيه
يا ساده مشاكل البورصه هى فرع من اصل والاصل هنا هو البيئه السياسيه والمناخ اللى بيسود البلد مناخ من يومه غير ديمقراطى تحكمه الزعامه الشخصيه بدون عمل مؤسسى مناخ الاصل فيه تعميه الشعب وافقاره واذلاله الاصل فيه ازاى تزود ارضدتك الخارجيه على حساب هذا الشعب المسكين الاصل فيه استحمار هذا الشعب وليس ادل على الاستحمار واللعب بعقول الناس من مرشح يتقدم لمنصب الرئيس بدون برنامج و كتله برلمانيه مصنوعه بايدى الاجهزه الامنيه باعتراف واحد منهم-حازم عبد العظيم- تحصد الاغلبيه بدون برنامج ايضا
للاسف مناخ الاصل فيه كيف تكون فاسدا بامتيازوقد قالها عرابهم حسنين هيكل تعليقا على ثورتى تونس ومصر " الفرق بين تونس ومصر ان هناك فساد دوله اما فى مصر فهى دوله فساد"
يا ساده تذكروا هذا القول بعيد عن ان الراعى هو مؤتمن على رعيته وسيسئل عنهم يوم القيامه "ان غابت الرؤيه غاب الحل"
